5 км сиргэ сүүрүүгэ Иван Романов, Константин Матаннанов бастаатылар, Иван Слепцов иккис миэстэлэннилэр. Иккис күн гандикапка – саастарынан сөкүүндэ арыттаах олбу-солбу 50 киһи эккирэтиһиилээх куоталаһыыга стаартаабыттарыгар, Николай Захаров көҥүл ньыманан сүүрэн, икки Благовещенскай хайыһардьыттарын сититэлээн, 5 км дистанцияны 17 мүн 24 сөк түмүктээн, бастыҥ көрдөрүүлэннэ. Бэйэлэрин саастыылаахтарыгар Иван Романов бастакынан кэллэ, Валентина Саввина иккис-үһүс миэстэ буолуталаатылар. Николай Захаров Улахан кубогынан наҕараадаланна, Мииринэйтэн 72 саастаах Иван Романов спорт маастарын нуорматын толордо.
Сааһырыыны билиммэт Чурапчы 78 саастаах ветерана Николай Захаров салгыы Киров куоракка буолуохтаах Россия күрэхтэһиилэригэр кыттыыны ыла Москваҕа көттө. Телефонунан кылгас кэпсэтиитигэр: «Хайыһар эрчими биэрэр көрүҥ, сибиэһэй салгыҥҥа сылдьаҥҥын үчүгэй санааны-оноону ылаҕын, бэрээдэккэ, кыайыыга дьулууру иҥэрэр, хайыһары оскуола оҕолоругар күүскэ киллэриэххэ сөп этэ. Россияҕа миэстэлэһиэхпин баҕарабын, икки сыл миэстэлэспитим. Россия күүстээх хайыһардьыттарын билэттиибин, Подмосковьеттан, Татарстантан Евсеев, Михаил Николаев, Андрей Захаров уо.д.а. бааллар. Билсэбит. Сылаас эрэгийиэн дьоно буолан дьарыктара, туруктара үчүгэй буолааччылар. Миигин Шереметьево аэропорка быраатым Дмитрий Петрович Захаров көрсөр. Манна күн-дьыл биир кыраадыс эрэ. Экипировкам толору. Төрдүс сылбын «фишеринэн» сүүрэбин. Дьарыгым үчүгэй. Күрэхтэһэр баҕа санаам баһаам!» .
Баһылай ПОСЕЛЬСКАЙ.
