Олунньу 27 күнүгэр Покровскайга Спорт дыбарыаһын уораҕайыгар, саахымат-дуобат кулуубун саалатыгар нуучча дуобатыгар энтузиаст дуобаччыт, ССРС спордун маастарыгар кандидат Владимир Егоров сырдык кэриэһигэр уонна аны сайын Уус Алдаҥҥа Бороҕоҥҥо ыытыллар Саха сирин норуоттарын VIII Cпортивнай оонньууларыгар путевка ылар иһин күрэхтэһиигэ кыттарга, сүүмэрдиир турнир буолан ааста.
Хаҥаластааҕы Оҕо спортивнай оскуолатын тириэньэрэ Александр Соломонов кылаабынай судьуйанан үлэлээтэ. Турнир аһыллыытыгар «Хотой» илиҥҥи күөн көрсүү Киинин, Олимпийскай солбук анал өрөспүүбүлүкэтээҕи спортивнай оскуолатын дириэктэрэ Александр Куприянов, Хаҥалас улууһун баһаары утары сулууспа этэрээтин начаалынньыга, Ис сулууспа подполковнига Федор Севостьянов кыттыыны ыллылар уонна В.Р. Егоров туһунан ахтан-санаан аастылар.
Күрэхтэһиини Хаҥалас улууһугар саахымат-дуобат кулуубун төрүттээччи, улуус Мунньаҕын дьокутаата Юрий Яковлев уонна Владимир Егоров уола кик-боксиҥҥа норуоттар икки ардыларынааҕы кылаастаах спорт маастара Сергей Егоров көҕүлээн тэрийдилэр. Манна 10 бастыҥ оонньооччу кытынна, кинилэр ортолоругар дьахталларга Европа чөмпүйүөҥкэтэ Арассыыйа спордун маастара Сандаара Апросимова, араас сылларга Саха өрөспүүбүлүкэтин дуобакка кыайыылаахтара спорт маастардара Покровскайтан Александр Якушев, Булгунньахтаахтан Иван Павлов, спорт маастарыгар кандидаттар Покровскайтан Айсен Егоров, Төхтүртэн Олег Афанасьев, Нөмүгүттэн Лена Романова, Тиит Эбэттэн Тускул Соловьев, Дьокуускай куораттан Дайаана Кондратьева уонна Александр Кондратьев кытыннылар.
Турниры тэрийээччи Владимир Романович уола, кик-боксиҥҥа Аан дойду чөмпүйэнээтин 1995, 1997 сыллардааҕы боруонса, 1999 сыллааҕы үрүҥ көмүс призера, Европа чөмпүйэнээттэрин 1996 уонна 1998 сыллардааҕы үрүҥ көмүс призера Сергей Егоров аҕатын туһунан маннык ахтан ааста:
- Тэрийээччилэргэ нуучча дуобатыгар Сэбиэскэй Сойуус спордун маастарыгар кандидат аҕабын Владимир Романовиһы санаан, сыаналаан үйэтитэн маннык турниры тэрийсибиттэригэр олус улаханнык махтанабын. Мин аҕам Владимир Романович I Дьөппөнтөн, ийэм Мария Сергеевна Хоточчуттан төрүттээхтэр. Бастаан Нөмүгүгэ, онтон Покровскайга Селекционнай микрооройуонугар олорбуппут. Аҕам олус үлэһит сэмэй киһи этэ. Мин киһини өйдүөхпүттэн дуобаттыыра илиитигэр наар кинигэлээх, дуобат кыбыныылаах сылдьара. Кини биир кэмҥэ Саха сирин чөмпүйүөнэ буола сылдьыбыта. Бэйэтин дьыалатыгар олус бэриниилээҕэ, үлэлиир сиригэр уонна оскуолаҕа үөрэнээччилэр ортолоругар күрэхтэһиилэри тэрийэрэ. Аҕам Нөмүгүгэ олорор эрдэхпитинэ тырахтарыыстаабыта. Ол кэмнэргэ кэтэхтэн инженер-мэхээнньик үөрэҕин бүтэрбитэ уонна Покровскайдааҕы ОПХ конструкторскай бюротугар үлэлээбитэ. Мин оҕо сырыттахпына тимиринэн штанга оҥорон биэрбитэ. Кыра сылдьан өсссө туста сылдьыбытым. Эдэр дуобаччыттар аҕабын биллиннэр уонна үйэтиттиннэр диэн бу улуус дуобакка турнирын тэрийистим. Турниры тэрийэрбэр оскуолаҕа бииргэ үөрэммит доҕорум «Сахатранснефтегаз» АУо генеральнай дириэктэрэАлексей Колодезников, улуус дьокутааттара Юрий Яковлев, Сергей Гребнев, тастыҥ быраатым Николай Егоров уонна элбэх табаарыстарым, билэр дьонум өйөбүл буоллулар, кинилэргэ олус махтанабын. Күн сирин көрдөрбүт төрөппүттэрим иннилэригэр ытык иэспин бу курдук төлөөммүн үйэтитэ туруом, -диэтэ.
Владимир Романовичтыын эдэр сылдьан Дьокуускайдааҕы тыа хаһаайыстыбатын научнай-чинчийэр институтун иһинэн конструкторскай бюроҕа Покровскайдааҕы салаатыгар эдэр сылдьан бииргэ үлэлээбит кэмнэрин туһунан, билигин Хаҥалас улууһун баһаары утары сулууспа этэрээтин начаалынньыга Федор Севостьянов бу курдук ахтан-санаан ылла:
- Мин Владимир Романовичтыын тыа хаһаайыстыбатын механизациятыгар,ону сэргэ сүөһү аһылыгын бэлэмнээһиҥҥэ механизмнары саҥардыыга, оҥорон үлэлэтиигэ саҥа тэриллэри үлэлэтиигэ аналлаах конструкторскай бюроҕа үлэлээбиппит. Кини конструкторынан үлэлээбитэ, эдэриттэн механизатор буолан барыны бары ымпыктаан-чымпыктаан ылсан үлэлэһэрэ. Бэйэтэ тимиргэ да, маска да олус сыстаҕас уус киһи буолара, сыбаарскалыыра, хайдахтаах да уустук үлэлэри иһэрдэрэ, сыһыарара. Токарнай станогунан тугу баҕарар оҥороро, оннук уһулуччу мындыр киһи этэ. Рационализатор буолан поризводствоҕа саҥаны, тупсарыыны наар киллэрээччи. Өссө биир кэмҥэ бурдугу куурдууга күүскэ үлэлэспитэ. Киһи быһыытынан сэмэйэ, элбэх саҥата-иҥэтэ суоҕа,бэйэтэ бэйэтигэр холку баҕайытык сылдьара. Үлэтин кэлэктиибигэр сылга иккитэ, Улуу Өктөөп бырааһынньыгар уонна олунньу ыйга Сэбиэскэй аармыйа күнүгэр дуобакка турнирдары тэрийэрэ. Итиннэ өссө остуол тенниһигэр, бильярдка күрэхтэһиилэри ыытааччы. Хонтуорабытыгар бокуойданныбыт да дуобаттаан киирэн барааччыбыт, ардыгар эбиэккэ барбакка элбэхтик оонньуурбут, оннук умсугутуулаах буолааччы. Ол курдук дуобаты өрө тутара, сөбүлүүрэ. Оройуон күрэхтэһиилэрин көтүппэт буолара, грамоталаах өрүү кэлээччи. Коммунист буолан эппиэтинэстээх да, уопсастыбаннай да үлэтэ элбэҕэ. Саас ыам ыйынааҕы Маай бырааһынньыгар, күһүн Өктөөп күнүгэр параадтаан хаамыыга, фестивалларга, спартакиадаларга уонна субуотунньуктарга сүрүн тэрийээччи буолара. Булка-балыкка барытыгар сылдьарбыт, олоххо олус көхтөөҕө, -диир Федор Михайлович.
Күрэхтэһиибитигэр киирдэххэ, спортсменнарбыт сарсыардаттан тура оонньооннор, бэрт сытыытык киирсэннэр дуобаччыттар ким бастыҥын быһаарыстылар. Саха сирин, Арассыыйа, Европа, Аан дойду күрэхтэһиилэригэр бэйэтин саастыылаахтарыгар кыайыылаах Айсен Егоров бу да сырыыга иккитэ тэҥнэһэн уоннааҕы утарсааччыларын кыайталаан Куубак хаһаайынынан буолла. Иккис миэстэҕэ таһыччы дэгиттэр спорт маастара Покровскайтан Александр Якушев таҕыста. Үһүс бириистээх миэстэҕэ Булгунньахтаахтан спорт маастара Иван Павлов тигистэ. Төрдүс миэстэҕэ спорт маастара Сандаара Апросимова уонна бэһис миэстэҕэ Дайаана Кондратьева тиксэн Бороҕоҥҥо барар путевканы быһаарсар күрэхтэһиигэ кыттар буоллулар. Турнир бары кыттааччылара анал бириистэри тутан, күрэхтэһииттэн астынан тарҕастылар.
ССРС спордун маастарыгар кандидат В.Р. Егоров сырдык аатын үйэтитэн бэрт тэрээһин буолан ааста. Кыттааччылар уонна тэрийээччилэр сүбэлэһиилэринэн сыллата бу турнир ыытылла турарыгар баҕа санааларын тиэртилэр. Ити курдук Владимир Романович Егоров сирдээҕи олоҕо салҕанар, тыыннаах ситим быстыбат…
Уйбаан УЙГУУРАП.
