Сиинэҕэ аныгылыы матырыйаалынан тутуллубут, культурнай-спортивнай Киин аһыллыытыгар, үгүс үрдүк сололоох ыалдьыттар, бэрт элбэх киһи мунньустан өр күүттэриилээх тутуу олоххо киирэр үтүөкэннээх күнүгэр муһунна.
Күндү ыалдьыттарынан, Ил Түмэн судаарыстыбаннай мунньах бэрэссэдээтэлин 1-кы солбуйааччы А.А.Добрянцев, спорт миниистирэ М.Д.Гуляев, миниистири солб. РФ спордун үтүөлээх маастара, олимпийскай Оонньуулар боруонса призердара Г.Р.Балакшин, Хаҥалас улууһун баһылыга Г.Ю.Алексеев, улуус мунньаҕын бэрэссэдээтэлэ Б.П.Протодьяконов о.д.а дуоһунастаах дьон буоллулар. Нуучча фольклорун ырыата-тойуга, сахалыы айхаллаах алгыс мааныта толорулунна. Түөрт сылы быһа тутуллубут Кииҥҥэ кырата суох өйөбүлү оҥорбут Ил Түмэн дьокутаата, 1975 сыллаахха Сиинэ орто оскуолатын үөрэнэн бүтэрбит убаастабыллаах киһибит А.А.Добрянцев буолар. Кини үтүө санаатын маннык тиэртэ: - Хаҥалас улууһун баһылыгынан үлэлии сылдьан бу Сиинэ орто оскуолатын туттарбытым. Оттон дьокутаат быһыытынан бу Киин үлэҕэ киириитигэр көмөлөспүтүм. Онон, выпускник быһыытынан иитиллибит-үөрэммит иэспин төлөөтүм дии саныыбын. Сиинэттэн кэлиҥҥи сылларга күүстээх спортсменнар таҕыстылар. Культура өттүгэр, норуот кэллэктиибэ «Реченька» кэлэр сылга 40 сылын туолар. Бу комплекс үлэҕэ киирбитэ, дьоҥҥо-сэргэҕэ улахан туһалаах эрэ буолуоҕа,- диэтэ Анатолий Анатольевич. Аалай кыһыл лиэнтэ быһылынна, символическэй күлүүс «Эрэл» КСК дириэктэригэр Егор Бараховка үөрүүлээх быһыыга-майгыга туттарылынна. Эдэр дириэктэр үөрүүтүн маннык үллэһиннэ: - “ «Эрэл» «культурнай-спортивнай Киин дьэ аһыллан, үөрүүбүт муҥура суох. Былааммытыгар араас таһымнаах тэрээһиннэр элбэхтэр. Култуура өттүнэн үгүс куруһуоктар үлэлиэхтэрэ, оттон спорт өттүгэр Хаҥаластааҕы Оҕо спортивнай оскуолата үс тренер штатын биэрбиттэрэ. Спорт национальнай көрүҥнэригэр, чэпчэки атлетикаҕа уонна волейболга секциялар ыытыллар буолуохтара. Манна оскуола оҕолоро, эдэр ыччаттар, нэһилиэнньэ саастаах өттө физкультуранан, спордунан дьарыктаныахтара”.
Киэҥ уораҕай аһыллыытын алгыһын кэнниттэн, оҕотуттан саастаах дьоҥҥо тиийэ Сиинэ олохтоохторо, эрчимнээх үҥкүүнү толорон, олус түмсүүлээхтэрин, тэрээһиннээх нэһилиэк буолалларын көрдөрдүлэр. Маны тэрийсээччилэртэн биирдэстэринэн, олохтоох дьаһалта ыччат бэлиитикэтигэр исписсэлиис Николай Турахов буолар: - Бастатан туран, элбэхтик сүүрэн-көтөн, кэпсэтэн туттарбыт киһибитигэр баһылыкпытыгар С.Ю.Логиновка уонна тутааччыларга махтанабыт. Бу Киин аһыллыыта чуолаан эдэр ыччакка олус үөрүүлээх буолла. Урукку кэмнэргэ эдэр ыччат мустар сирэ, кулууп да спортивнай саала да суоҕа, онон билигин ыччат спортка да култуураҕа да өссө көхтөөх буолуо дии саныыбын. Сиинэ урут-уруккаттан спортивнай нэһилиэк, - диэн санаатын үллэһиннэ Николай. Дьон-сэргэ үөрүүтүн норуот ырыа-үҥкүү ансаамбыллара киэргэттилэр. Кэлбит ыалдьыттар бэлэх-туһах эгэлгэтин туттардылар, үлэлииргэ-хамныырга бары кыах барыта туһаайылынна.
Бүгүн «Эрэл» КСК үлэҕэ киирэн, дьон-сэргэ талба кэллэктиибэ “Реченька” ураты ырыа култууратын, үгэстэрин, абыычайдарын илдьэ сылдьааччылар өссө тэтимирэн туран үлэлиэхтэрэ. 20 саастарын туолбут «Сиинэ кустуга» оҕо талба үҥкүү ансаамбыла өрөспүүбүлүкэҕэ, Россияҕа, кыраныысса таһыгар элбэх араас конкурстар, фестиваллар кыайыылаахтара, лауреаттара, дипломаннара өссө эрчимнээхтик үҥкүүлүөхтэрэ, Сиинэлэрин аатырдыахтара! Сиинэттэн, өрөспүүбүлүкэбит спорт национальнай көрүҥнэригэр абсолютнай лидерэ, Россия таһымнаах күрэхтэһиилэр кыайыылаахтара Егор Филиппов кынат анньынан кыырайа көппүтэ. Инникитин,өссө кыахтаах оҕолор үүнэн тахсыахтара!
Спорт, чөл олох, чиҥ кут, Сиинэ үрдүнэн өрө тутулуннун!
Уйбаан УЙГУУРАП,
Степан САВВИН хаартыскаҕа түһэриитэ.
