көмө оҥордулар, эҕэрдэлэрин анаатылар. Сэбиэт исполкомун чилиэннэрэ, ветераннар сэбиэттэрин бэрэссэдээтэлэ Гаврил Гарильевич Сивцев, волонтер Егор Егорович Неустроев, түөрт игирэ сиэннэрдээх Петр Гаврильевич Платонов ветераннартан хомуллубут харчынан аптекаттан эм-том атыылаһан илдьэн туттардылар.
Россия “ДОСААФ” байыаннай-патриотическай тэрилтэтин Саха сиринээҕи отделениетын дьиэтигэр волонтердар базалара баар. “Саха сирэ эйиигин кытта”девизтээх общественнай хамсааһын Анал Байыаннай Дьайыы байыастарыгар улахан көмөнү, өйөбүлү 2022 сылтан тиһигин быспакка оҥорор. Иһирдьэ киирэри кытта үлэ күөстүү оргуйар. Иис сыаҕар иистэнэр массыыналарынан дьахталлар байыаннай көстүүмнэри тигэллэр. Иккис кэҥэс соҕус хоско хахха буолар маскировочнай сеткалары баайыы үгэнэ. Бэлэмнэммит малы-салы улахан куулларга, ас-үөл өттүн өр кэмҥэ ас сибиэһэйин тутар, буортуйбат пенопласт дьааһыктарга угуталыыллар.
Сивцев Гаврил Гаврильевич: “Дойдуну кытта тэҥҥэ Сахабыт сирэ Анал Байыаннай Дьайыы кыттыылаахтарыгар көмө оҥорбута ыраатта. Спорт бэтэрээннэрэ үтүө санааланыы уопсай хамсааһыныгар кытыһаммыт, туох наадатын билэн бараммыт, эмп атыылаһан туттардыбыт”.
Неустроев Егор Егорович: “Байыастарбытыгар көмө оҥоруу улам күүһүрэн, тэнийэн иһэр. Өрөспүүбүлүкэ бары улуустарыттан бааллар. Холобур, бу иистэнэр сыахха киин, өрүс илин эҥэринээҕи, Бүлүү эргин улуустар, хоту Орто-Халыматтан тиийэ көмөлөр кэлэллэр. Элбэх көмө оҥоһуллар”.
Волонтердар
Аҕам саастаах, бочуоттаах сынньалаҥҥа тахсаннар пенсияларыгар олорор үлэ бэтэрээннэрэ, общественнай төрүккэ олоҕуран хамнаһа суох күннэтэ үлэлиир дьон санааларын кытта үллэһиннилэр. Чөл олох аргыстаах, “Чэгиэн кулууптан” Ксения Иванова:
“Төрдүс сылыбын үлэлиибин. Көстүүм тигэбин. Баар кыахпытынан-баарбытынан көмөлөһөбүт. Матырыйаалбытын биирдиилээн дьон, тэрилтэлэр аҕалан биэрэллэр”. Надежда Иванова:
“Ааспыт сыл балаҕан ыйыттан волонтердуубун. Спорт бэтэрээннэр кэлэн көмө оҥороллоруттан наһаа үөрдүбүт. Итинник бары көмөлүүрбүт буоллар, кыайыы түргэнник кэлиэ этэ”.
Аркадий Иванов: "Сааһым 79-һум, тиэйэр-таһар үлэҕэ сылдьабын. Эр киһи үлэтэ баһаам, сиэккэ баайыытыгар тиийэ. Мал-сал, дойдуларын аһын ыытаммыт Сахаларын сирин ахтар-саныыр буойуттарбытыгар эрэли үөскэтэбит. Аймахтара эмиэ баарбыт”.
Людмила Андросова – “педагогическай үлэ бэтэрээнэбин, Уус-Алдаммын, 2022 сылтан үлэлиибит. Сарсыардаттан киэһээҥҥэ диэри сетка баайабын. Эбээһинэһим курдук ылынаммын кэлэбин. Байыаннай техникаҕа, биирдиилээн байыастарга баайабыт. Сеткаларбыт дьыл кэмиитэн көрөн кыһы маҕан, сайын от күөҕэ, күһүн араҥас өҥнөөхтөр. Күҥҥэ үс-түөрт сетканы бэлэмниибит. Элбээтибит. Антах сылдьар уолаттарбыт “быыһаабыта” диэн махтаналларын наһаа күндүтүк истэбит, сүрэхпитинэн олус чугастык ылынабыт. Ийэм Аҕа дойду сэриитин кэмигэр комбайнер-тракторист этэ. Тыылга кыайыыны уһансыбыта. Ол династиятын салҕааммын, бүгүҥҥү ыарахан кэмҥэ көмө оҥоро сылдьабынан үөрэбин, киэн туттабын. Сеткаҕа АБДь уолаттара наһаа наадыйаллар. Хас биирдии байыаска наада, доҕотторугар бэлэх курдук эмиэ илдьэ барааччылар. Матырыйааллары дьон, тэрилтэлэр биэрэллэр. Харчынан биэрдэхтэринэ атыылаһабыт. Сороҕор адьас ыксаатахпытына бэйэбит харчы бырахсаммыт матырыйаал ылабыт. Эйэлээх олох кэлиэр диэри бу сеткалары баайарбыт буолуо”.
Күннэй Соргоева: “Статистыыбын, суот-учуот оҥоробун. Туох-ханнык үлэ оҥоһуллубутун, АБДь хаһан-төһө ыытыллыбытын барытын компьютерга киллэрэн иһэбин. Өрөспүүбүлүкэ үрдүнэн элбэх көмө оҥоһуллар. Ас-аһылык, таҥас-сап, араас көрүҥнэрэ бааллар. Холобур, тоҥ ас, эт, собо, үүт, бэрэски үүт хаалана тураллар. Наһаа үчүгэй, түмсүүлээх кэллэктииптээхпит. Бэлэмнэммит дьааһыктарбыт ыарахаттар. Онон сүгэр-көтөҕөр эр дьон олус наадалар. Нэһилиэнньэ, олохтоохтор күн аайы посылка биэрэллэр. Нүөмэрдиибит, акталыыбыт, Украинаҕа, Донбас таһыгар тиэрдэбит, онно икки уолбут үлэлииллэр, туталлар уонна туһааннаах сирдэригэр тиэрдэллэр”.
Ефимова Анна Николаевна – волонтерскай хамсааһын салайааччыта: “Бу общественнай хамсааһыҥҥа 2022 сылтан тоҕус хайысханан үлэлиибит: иистэнии, сетка баайыыта, массаж, гуманитарнай көмө, аадырыстаммыт посылкалар, маастар-кылаастар, ас астааһына, бэрэски, собо ыһаарыта. Туохха наадыйалларын билэбит. Хомуллубут малбытын, посылкарабытын тиэрдэ командировкаҕа көтөөрү сылдьабыт. 500 кг илдьэбит. Хомуйдубут, оҥордубут. Сыалбыт-сорукпут: байыастарбытыгар таҥас-сап, ас-үөл таһынан, харысхаллары биэрэбит. Улахан кулгаахтаах “Чебурашка” дроҥҥа киирэн биэримэн диэн чуор буолуҥ диэн сэрэтэр; “Крокодил Гена” эрэл доҕор буолар. Нэһилиэктэринэн сылдьаммыт маастар-кылаастары көрдөрөбүт, көстүүм тигэргэ үөрэтэбит, выкройкалары биэрэбит. Уолаттарбыт тоҥмокко-хаппакка, сылаастык сылдьалларыгар, көмүскэллээх буолалларыгар кыһаллабыт. Антах иккис сырыыбыт буолар. Онно балаһыанньа кытаанах. Байыаннай. Украина кыраныыссатыгар байыаннай самолеттар, вертолеттар, таанкалар ааһаллар. Тыас-уус этиҥ этэринии ньирилээн олорор. Мариуполь буомбаланан, урусхалланан, көрөргө олус ыарахан, киһи хараастар хартыыната. Окуопаны, аһылыгы сылытар, куурдунар оһох, термобелье, ис-тас таҥас, үтүлүк, кээнчэ, плащ-палатка,сеткалары, аадырыстаммыт посылкалары тиэрдэбит. Дария Федоровна Павловалыын иккиэ буолан барабыт”.
Волонтердар хамсааһыннара - түмсүүлээх буолуу арылхай көстүүтэ!
Донецкайга
Ити курдук, Анна Ефимова уонна Дария Павлова олунньу 18-26 күннэригэр салгыы көмөлөһөргө, посылкалары өссө хайдах ыытар, тиэрдэр табыгастаах буолуон сөбүгэр уопут атастаһар сыаллаах-соруктаах Донецкайга тиийдилэр. Былаан быһыытынан опорнай пууннарга үлэлэрин саҕалаатылар.
Кинилэр этэллэринэн, ыскылаакка хараллан турар посылкалары хаартыскаҕа түһэрбиттэр, тоҕо байыастарга тута, кэмигэр тиийбэккэ туралларын токоолоспутунан, быһаарсыбытынан барбыттар. Посылкалар сорохторо олус өр турбуттар. Байыастар телефоннарын нүөмэрэ, ыытааччы телефона суох буолан мунан хаалбыттара билиннэ. Сорох посылкалар буорту буолбуттар, хомойуох иһин сорох байыастар суох буолбуттар, сорохтор бааһырыы ыланнар госпитальга сыталлар, сорохтор улаханнык эчэйэннэр сыыллыбыттар. Онон дьоннорун кытта сибээстэһэн бу посылкалары Саха сириттэн сылдьар биир дойдулаахтарыгар биэрэргэ көҥүл ылбыттар. Сорох посылкалары аадырыһын уларыттаран аймахтарыгар, байыастар табаарыстарыгар тиксэрэргэ, посылка тутарга хонтуруолу күүһүрдэргэ; төлөпүөнүнэн сибээһи, контаагы ирдииргэ кэпсэтиилэр буолбуттар.
Байыаннай чаастарынан, полигоннарынан, бу күннэргэ байыастарга ас, таҥас түҥэтэ сылдьаллар. Волонтердар астаабыт бэрэскилэрин, ыһаарылаабыт соболорун, соботтон хатарыллан оҥоһуллубут ухааларын, иистэнньэҥнэр тикпит көстүүмнэрин, баайбыт кааска иһинэн кэтиллэр бэргэһэлэрин, харысхал, былаах, шевроннарын, эбэлэр, эдьиийдэр өрбүт наскыларын, хаххалыыр сеткаларын байыастарга туттартыыллар. Аҕа дойдуну көмүскээччилэр Күннэринэн волонтердарынан оҥоһуллубут бэлэхтэри туттартыылларыттан байыастар үөрүүлэрэ муҥура суох.
Саха сирин волонетрдара тиийэ сылдьыылара туһалааҕа, махталлааҕа бэлиэтэннэ.
Байыастарбыт дойдуларыгар кыайыы көтөллөөх эргилиннинэр!
Баһылай Посельскай
