Бүлүү куоракка Венгрия Будапеш куоратыгар Европа чемпионатын боруонза призера, международай кылаастаах тустуук, Европа чемпионатын икки төгүллээх боруонза призера Эдуард Григорьев Баһылай Румянцев аатынан “Эрчим” спортивнай саалаҕа Бүлүү эдэр тустууктарын көрсөн тустуу араас албастарыгар маастар кылаас көрдөрдө.
Эдуард Григорьев бу иннинэ Хампа сэлиэнньэтин спортивнай саалатыгар оҕолору, нэһилиэнньэни кытта көрсүбүтэ. Кинини кытта тустуук тренердара Окоемов Р.Г.,Неустроев Д.Р. Чурапчытааҕы РЦСП директора Андреев А.И. уонна спорт маастардара Власов К.Г.Барашков Нь.Н. уонна Бүлүүттэн спорткомитет бэрэсэдээтэлэ Евсеев Г.С., ДЮСШ директора Нифонов В.В., тренер Харлампьев А.Н. тахса сырыттылар.
Баһылай Румянцев аатынан “Эрчим” спортивнай саалаҕа Бүлүү эдэр тустууктарын көрсөн тустуу араас албастарыгар маастар кылаас көрдөрдө.
Ол кэннэ Эдуард Григорьевка истиҥ эҕэрдэ тыллардаах суруктары кытта Бүлүү улууһун баһылыгын бастакы солбуйааччы Иван Евсеев Бүлүү улууһун дьаһалтатын аатыттан 100 000 солк. сууммалаах сертификаты, тренердэргэ Роман Окоемовка уонна Данил Неустроевка 30 000 солк сертификаттары туттарда.
Эдуард Григорьев биир дойдулаахтарын 1 Күүлэт нэһилиэгин дьонун-сэргэтин аатыттан истиҥ тыллардаах Эҕэрдэ суругу уонна Бастакы Күүлэт олохтоох дьаһалтата олохтообут 100 000 солк. сертификатын Эдуард биир дойдулааҕа, журналист Андрей Яковлев-Чуос, туттарда.
Эдуард Григорьев уонна Данил Неустроев тренер үлэтин үрдүктүк сыаналааннар, махтананнар Роман Окоемовка кыһыл көмүс чаһы бэлэхтээтилэр.
Улуустааҕы спорткомитет бэрэсэдээтэлэ Гаврил Евсеев: “- эдэр тустууктарга Эдуард Григорьев курдук аан дойду күүстээх тустууктарын курдук иэмэх мастыы эрийсэн кыайыы иһин сыралаһан туран үлэлиирэ түмүктэрдээх буолуута хас биирдии Бүлүү улууһун эдэр тустууктарын кынаттыыр, кыайыыга дьулууру үөскэтэр”,- диэтэ. Салгыы кини улуустааҕы спорт комитетын аатыттан убаһа сертификатын туттарда уонна Чурапчы улууһун этиитин өйөөн Бүлүү улууһун салатата Эдуард Григорьев төрөөбүт Сахатын сиригэр кэлэн, Дьокуускай куоракка олохсуйан, айымньылаахтык үлэлиир усулуобуйатын тэрийэн, Дьокуускай куоракка квартира эбэтэр дьиэ атыылаһарга күүстэрин холбуулларыгар сүбэлэспиттэрин иһитиннэрдэ.
Венгрия Будапеш куоратыгар Европа чемпионатын боруонза призера ,биир дойдулаахпыт международай кылаастаах тустуук, Европа чемпионатын икки төгүллээх боруонза призера Эдуард Григорьев Бүлүү улууһун эдэр тустууктарыгар анаан, тустуу сыралаах үлэ буоларын, тустууга элбэх сыраҕын уонна көлөһүҥҥүн тохтоххуна эрэ кыайыы кэлэрин быһаарда уонна эдэр тустууктарга барыларыгар ситиһиини, кыайыыны баҕарда.
Түмүккэ Эдуард Григорьев кэлэр 2023 сылтан өрөспүүбүлүкэ улахан түһүлгэлээх күрэхтэһиилэригэр: Николай Тарскай аатынан көҥүл тустууга,Саха сирин Спортивнай оонньууларыгар төрөөбүт Бүлүүм аатыттан тустуом, ону Бүлүүм дьонугар эрэннэрэбин диэтэ уонна салгыы Бүлүү улууһугар, дьонугар-сэргэтэригэр өрүү көмөлөһөллөрүн, өйүүллэрин иһин махтанна.
Маннык көрсүһүүлэртэн оҕолорбут сүбэ-ама ылан,үрдүккэ дьулуһан, спорт чыпчаалларыгар дабайалларыгар эрэл улахан, онон Эдуард Григорьев Бүлүү эдэр тустууктарын кытта көрсөн, сүбэ-ама биэрбитигэр, ыалдьыттаан барбыттарыгар, кини тренердарыгар, улуус спордун салалтатыгар барҕа Махтал буоллун!
Андрей Яковлев -Чуос
