Былырыын “Прогресс” ХЭТ “Дыгын оонньууларын” абсолютнай чөмпүйүөнүнэн буолары ситиспит Алексей Уваровскайга сүрүн бирииһи 1 мөл.солк. уу-харчынан туттарбыта. Итинник үс сыл кыайыылаахтарга төлөнөн кэлбитэ. Быйыл эмиэ салҕаныаҕа.
Бу аҕыйах хонуктааҕыта эмиэ биир дьоһун хардыы оҥоһулунна. Быйылгы дьылы көҥүл тустуу түһүлгэлэригэр, олор истэригэр, Н.Н. Тарскай кэриэһигэр Саха Өрөспүүбүлүкэтин чемпионатыгар 70 кг бастаабыт, “Иван Ярыгин” норуоттар икки ардыларынааҕы Гран-при турнирыгар боруонса, Улан-Удэҕэ Бурятия Өрөспүүбүлүкэтин Президенин “Baikal-open” Кубогар Россия күүстээх бөҕөһүн Евгений Жербаевы ыраастык хотон кыһыл көмүс мэтээл хаһаайынынан буолары ситиспит, Карачаево-Черкесияҕа буолан ааспыт Россия студеннарын чемпионатыгар боруонса мэтээллэммит Константин Капрынову уонна кини тренерин Егор Терентьевич Пономареву кытта “Прогресс” тутуу тэрилтэтин кэллэктиибэ көрүстэ, эҕэрдэлэр этилиннилэр. Таһаарыылаах үлэлээх тэрилтэ салайааччыта Алексей Пинигин инникитин элбэҕи эрэннэрэр эдэр бөҕөскө “Baikal-open” Кубогын кыайбытын иһин 50 тыһ.солк, Россия студеннарыгар үһүс миэстэлэммитин иһин 30 тыһ.солк. наҕараадалаабыта дохсун ытыс тыаһынан доҕуһуолланна. Эдэр бөҕөскө алгыс тыллара этилиннилэр.
Билигин Константин Капрынов тренеринээн өрөспүүбүлүкэ сүүмэрдэммит хамаандатын кытта Алданнааҕы хайыһар киинигэр эрчиллэр-бэлэмнэнэр түмсүүгэ сылдьаллар. Тирээн турар сыал-сорук: бэс ыйын 16-19 күннэригэр Дагестан Каспийскай куоратыгар буолар Россия чемпионатыгар бэлэмнэнии.
Баһылай Посельскай
