Дьокуускай куорат көҥүл тустууга чемпионата алтыс төгүлүн ыытылынна. Чемпионат кыттыылаахтарын Дьокуускай куорат баһылыгын солбуйааччы Руслан Тимофеев, Дьокуускай куорат тустууга Федерациятын бэрэссэдээтэлин солбуйааччы, Саха Өрөспүүбүлүкэтин үтүөлээх тренерэ Прокопий Иванов, Дьокуускай куорат физическэй культуратын уонна спордун Управлениетын начальнига Эдуард Ефимов, Саха Өрөспүүбүлүкэтин культуратын үтүөлээх үлэһитэ, В.П. Керемясов бииргэ төрөөбүт балта Лена Петровна Керемясова эҕэрдэлээтилэр.
Бастыҥ үлэлээх тренердэргэ Владимир уонна Ян Емельяновтарга “Тустуу сайдыытыгар киллэрбит кылааттарын иһин” РФ Бочуотунай грамоталара туттарылыннылар. Турнир сүрүн судьуйата Станислав Афанасьев турнирга 93 бөҕөс кыттарын, турнир ыытыллар бэрээдэгин билиһиннэрдэ. Саха эстрадатын артыыһа Станислав Гольдеров толоруутугар эҕэрдэ ырыа дьиэрэйдэ.
Биллэрин курдук, Чурапчытааҕы спортивнай оскуола-интэринээккэ улуу тренер Д.П. Коркин тустууга оскуолатыгар өрөспүүбүлүкэ оройуоннарыттан элбэх оҕолор тиийэн үөрэммиттэрэ, дьарыктаммытара. Дмитрий Петрович Коркин уонна кини соратнига Константин Сергеевич Постников спортоскуоланы бүтэрбит тустуук уолаттары дойду киин куораттарыгар үөрэххэ ыыталаабыттара, салгыы тустуунан дьарыктаналларыгар киэҥ аартыгы арыйбыттара. Спортивнай оскуола-интэринээти 1967 с. бастакынан бүтэрбит Василий Уваров, Прокопий Шестаков Белоруссия киин куоратыгар Минскэйгэ физкультура институтугар киирэн, ситиһиилээхтик үөрэнэн 1972 с. бүтэрбиттэрэ. Кинилэр суолларын элбэх тустуук уолаттар батыспыттара. Саха тустууктарыгар Минскэйгэ үөрэнэллэригэр, үлэлииллэригэр кыах үөскэтиллибитэ. Дьокуускай куоракка 3 № оҕо спортоскуолатыгар тренердиир Валерий Петрович Керемясов бэйэтин бастыҥ иитиллээччитин Владислав Андреевтыын Минскэйгэ анаан-минээн дьарыктана тиийбиттэрэ.
Ити туһунан, Саха Өрөспүүбүлүкэтин үтүөлээх тренерэ Василий Петрович Уваров маннык кэпсээтэ: “Саха сирин күүстээх маастара, Россия чөмпүйүөнэ, тренер Валерий Керемясов Белоруссияҕа тиийэн айымньылаах үлэтинэн бэйэтин үөрэнээччитин Владислав Андреевы Белоруссия элбэх төгүллээх чөмпүйүөннэринэн, норуоттар икки ардыларынааҕы турнирдар кыайыылаахтарынан, Европа, аан дойду призердарынан оҥортообута. Валерий Петрович киһи быһыытынан сиэрдээх, үтүө майгылаах, дириҥ билиилээх-көрүүлээх тренер быһыытынан биллибитэ. Айар-тутар үгэнигэр сылдьан, массыына оһолугар түбэһэн хомолтолоохтук биһи кэккэбититтэн туораабыта. Бэйэтин кэнниттэн Дьокуускайга тустуу бигэ базатын туттаран, Белоруссия курдук улахан дойдуга таһаарыылаахтак үлэлээн, үтүө өйдөбүлү хаалларда. Чулуу иитиллээччитэ Владислав Андреев билигин Минскэйгэ олохсуйан, ыччаттарга сүрүн тренеринэн үлэлиир”.
Дьокуускай куорат физическэй культураҕа уонна спорка Управлениетын начальнига, тустуу маастара Эдуард Ефимов турнирга кыттааччылар ахсааннара сыллата элбээн иһэрин; эдэр, кэскиллээх саҥа ааттар тахсалларын; Валерий Петрович туруорсуутунан 3 № тустууга аналлаах оҕо спортоскуолатыгар 1998 сыллаахха спортивнай саала киллэриллибитин; билигин спортоскуола В.П. Керемясов аатын сүгэрин; “Иван Ярыгин” Гран-при турнирын кыайыылааҕын Ньургун Иванову, норуоттар икки ардыларынааҕы кылаастаах маастардары Павел Капитоновы, Алексей Соловьеву уо.д.а. таһаартаабыт үтүөлээх тренер Михаил Степанович Скрябины кытта бииргэ алтыһан үлэлээбиттэрин; 90-ус сылларга улуустар үксүлэрэ кыайталыыр, тустууга улахан хаалыылаах Дьокуускай куорат билигин күүстээх утарсыыны (конкуренцияны) оҥорор буола сайдан, инники күөҥҥэ тахсыбытын; тустуук оҕолорго “Ботурдар оонньууларыгар” бастаабыттарын; быйыл 9 № оҕо спортоскуолатын арыйбыттарын; Мархаҕа, Автодорожнай уокурукка, ДСК диэки спортоскуолалары аһар санаалаахтарын; куоракка тыһыынчаттан тахса оҕо тустуунан дьарыктанарын; инникитин Дьокуускай куораттан олимпийскай чөмпүйүөннэр, призердар тахсалларыгар киэҥ өрүттээх үлэ ыытылларын; спорт миниистирэ Леонид Спиридонов, куорат баһылыга Евгений Григорьев өйүүллэрин; физкультуранан уонна спордунан дьарыктанар дьон ирээтин элбэтэргэ, итиэннэ, “хас биирдии киһи чөл туруктаах, чиргэл, тэтиэнэх буоларын ситиһэр соруктаахпыт”,- диэн бигэ санаатын уонна онно эрэнэрин биллэрдэ.
Бэрт сэргэх хапсыһыылар түмүктэринэн, 57 кг Любомир Ашеин (Чурапчы института), 61 кг Яков Павлов (ХИФУ), 65 кг Эдуард Попов (Чурапчы института), 70 кг Игорь Матвеев (Р.М. Дмитриев аатынан ОЭУ), 74 кг Айсен Потапов (ХИФУ), 79 кг Анатолий Никитин (ХИФУ), 86 кг Виталий Ефремов (Чурапчы института), 92 кг Степан Иванов (Р.М. Дмитриев аатынан ОЭУ), 97 кг Максим Толмачев (ХИФУ), 125 кг Никита Валеев (3№ оҕо спортоскуола) кыайыылары ситистилэр. Бары бириистээх миэстэлэргэ тиксибиттэр Дьокуускай куорат дьаһалтата оҥорторбут кыраһыабай оҥоһуулаах В.П. Керемясов мөссүөннээх өйдөбүнньүк мэтээллэринэн, кубоктарынан, дипломнарынан, Керемясовтар аймах олохтообут “Одарич” маҕаһыын сэртэпикээттэринэн наҕараадаланнылар.
В.П. Керемясов бииргэ төрөөбүттэрэ, дьиэ-кэргэнэ туруорбут 100 тыһ.солк. сүрүн бирииһинэн Р.М. Дмитриев аатынан Олимпийскай эрэл училище IV кууруһугар үөрэнэр, 19 саастаах Нам ыччата Игорь Матвеев наҕараадаланна: “Түһүлгэ биэрбититтэн үөрүүм улахан, быйыл маастары толорбутум, Дальнай Восток чемпионатыгар улахан дьоҥҥо бастаабытым, тренерим Прокопий Семенович Иванов. Кумирым 74 кг тустар дагестанец, Олимпийскай оонньуулар чөмпүйүөнэ Разамбек Жамалов. Кини олус чаҕылхай тустуулаах. Россияҕа уонна аан дойдуга бастыыр сыаллаахпын-соруктаахпын”.
Дьокуускай куоракка спорт, тустуу сайдар кэскиллэрэ киэҥ.
Баһылай Посельскай
