Муус устар 25 күнүгэр Дмитрий Петрович Коркун аатынан Чурапчытааҕы республиканскай олимпийскай эрэллэри бэлэмниир оскуола-интэринээт спортивнай саалатыгар бу оскуолаҕа түөрт уон сыл эҥкилэ суох көҥүл тустуу тренеринэн үлэлии сылдьар Саха республикатын үтүөлээх тренерын Иннокентий Семенович Посельскайы чиэстээтилэр. Кини иитиллээччилэрэ Сахабыт сирин араас улахан түһүлгэлэргэ дорҕоонноохтук ааттаппыттара: Европа икки төгүллээх призера Эдуард Григорьев, Россия оҕолорго икки төгүллээх чемпиона Роберт Окороков, Россия оҕолорго, ыччаттарга кыайыылаахтара Олег Фомин, Владимир Бояновскай, Борис Каженкин.
Бу киэһэ үбүлээри Чурапчы улууһун баһылыга, улуус тустууга федерациятын бэрэссэдээтэлэ С.А. Саргыдаев, улуус депуттарын сэбиэтин бэрэссэдээтэлэ Я.П. Оконешников эҕэрдэлээтилэр уонна Иннокентий Семеновичка “Улуус сайдыытыгар киллэрсибит кылаатын иһин” иккис степеннээх Бэлиэни туттардылар. Чурапчы нэһилиэгин баһылыга В.Д. Сивцев, Чурапчы улууһун спортка салаатын салайааччыта Д.В. Егоров, үөрэх үлэһиттэрин идэлээх сойуустарын председателэ Е.И. Давыдов, Вячеслав Павлович Карпов аатынан оҕо спортивнай оскуолатын директора Александр Романович Неустроев истиҥ тылларын анаатылар. Иинокентий Семенович төрөөбүт дойдутун – Хоптоҕо нэһилиэгин баһылыга А.Л. Бурцев Иннокентий Семеновичка “Хоптоҕо нэһилиэгин бочуоттаах олохтооҕо” бочуоттаах аат иҥэриллибитин иһитиннэрдэ. Иннокентий Семенович аҕата, Посельскай Семен Иннокентьевич – Аҕа дойду Улуу сэриитин ветерана, “Кыһыл сулус” орден кавалера, күн күбэй ийэтэ Марфа Дмитриевна – тыыл ветерана, герой ийэ уон оҕону төрөтөн, улаатыннаран, көччөх гынан көтүппүт саха биир ытык ыала этилэр.
Билии аартыгар бастакы хардыыларын оҥорбут Иван Федосеев – Доосо аатынан Дирин агро оскуолатын директора Е.В. Адамов, спорт оскуолаҕа кылааһын салайааччыта, Саха республикатын үтүөлээх учуутала Л.М. Винокурова, тренер ытыктыыр наставниктара, Саха республикатын физическай культураҕа уонна спортка үтүөлээх үлэһиттэрэ, Чурапчы улууһун бочуоттаах олохтоохторо Е.В. Пудов, С.С. Морфунов, С.П. Макаров, бииргэ үлэлиир коллегалара, иитиллээччилэрэ, В.П. Карпов аатынан этэрээт - 10 А кылаас үөрэнээччилэрэ эҕэрдэлээтилэр. Музыкальнай эҕэрдэлэрин оскуолабыт тустуу салаатын выпускнига, саха эстрадатын сулуһа Арыйаан Свинобоев, республиканскай ырыа күрэхтэрин лауреата Сарыал Сивцев, Саха республикатын культуратын туйгуна Валерий Корякин тиэртилэр.
Бу киэһэ сонун түгэнинэн республикабыт бастыҥ эдэр бөҕөстөрүгэр – ыҥырыынан буолбут күөн көрсүү кыттылаахтарыгар Посельскайдар дьиэ кэргэн аатыттан анал бириистэри – кыайыылаахтарга анал курдары уонна хапсыһыы кыттыылаахтарыгар барыларыгар харчынан бириэмийэлэри туттарыы буолла. Ол курдук, саамай кыра 28 киилэҕэ Чурапчыттан Аржаковтар тустуук династияларын бэрэстэбиитэлэ, бастакы кылаас үөрэнээччитэ Ануфрий Аржаков уонна Мэҥэ Хаҥаластан эдэр кэскиллээх тустуук, эмиэ бастакы кылаас үөрэнээччитэ Эрсан Явловскай кииристилэр. Уолаттары аҕалара Ануфрий Егорович Аржаков уонна Алексей Алексеевич Явловскай бэйэлэрэ эрчийэллэр эбит. Элбэх бырахсыылаах сытыы киирсии 10 : 8 ахсаанынан Ануфрий Аржаков туһатыгар түмүктэннэ. 30 киилэҕэ дылы Оскар Громов (Чурапчы) уонна Айсиэн Степанов (Мэҥэ Хаҥалас) күөн көрсүүлэригэр 10 : 6 ахсаанынан кыайыылааҕынан Чурапчыттан Оскар Громов буолан, Иннокентий Семеновичтан кур уонна уонна уон биэс тыһыынча харчынан бирииһи тутта. Салҕыы 38 киилэҕэ эдэркээн эрээри, номнуо кыайыы амтанын билбит уолаттар Иван Фомин (Чурапчы), Кирилл Кузьмин (Мэҥэ Хаҥалас) сытыы киирсиилэрэ киэһэни киэргэттэ. Манна Иван Фомин утарсааччытын ыраастык ууран, кыайыылааҕынан таҕыста. Кадеттарга 55 киилэҕэ Уһук Илин Федеральнай уокурук чемпионнара, призердара, тустуу көбүөрүгэр кэнники сылларга элбэхтэ илин-кэлин түһүспүт Куоркун оскуолатын иитиллээччилэрэ Эрхан Смирников, Андрей Слепцов таҕыстылар. Хатыһыылаах киирсии түмүгэр Эрхан Смирников кыайыы өрөгөйүн биллэ. Түмүктүүр хапсыһыы 61 киилэҕэ ЧГИФКиС устудьуона Иосиф Никонов уонна оскуола 10 кылааһын үөрэнээччитэ Күндүл Местников икки ардыларыгар буолла. Бэрт сыралаах киирсии Күндүл кыайыытынан түмүктэннэ.
Бу күнү эдэр кэскиллээх тустууктарбыт, чахчы да, өйдүү-саныы сылдьыахтара турдаҕа. Онтон кэлбит дьон Иннокентий Семенович тустуу сайдыытыгар, ыччаттарбыт инникигэ дьулуурдарын, эрэллэрин күүһүрдэллэригэр тус кылаатын киллэрэр үтүө холобурун көрдүбүт. Бу дьоро киэһэ оскуолабыт историятыгар таптыыр идэҕэ бэриниилээх буолуу бастыҥ холобурун көрдөрдө, бэлиэ суолу хаалларда.
Тренер дьиэ кэргэнэ – кини ситиһиилээх буоларыгар саамай олук уурар истиҥ эйгэтинэн буолар. Иннокентий Семенович олоҕун доҕорунаан, үлэ ветерана, эргиэн туйгуна Ирина Никифоровналыын түөрт оҕону төрөтөн, улаатыннаран, дьоһун ыал оҥортоотулар. Кинилэр түөрт оҕону төрөтөн, улаатыннаран, ыал оҥортоон, олох киэҥ аартыгар көччөх гынан көтүппүттэрэ. Улахан уол Александр Иннокентьевич – Марфа уонна Сергей Расторгуевтар ааттарынан Саха государственнай циркатын артыыһа, уус уран салайааччыта, Саха республикатын үтүөлээх артыыһа, кыыстара Анна Иннокентьевна Дьокуускайга транспортнай компанияҕа юрист, Иннокентий Иннокентьевич - саха национальнай ыстаныыларыгар спорт маастара, «ААР ТУТ” хааччахтаммыт эппиэтинэстээх тэрилтэ генеральнай директора, кыра уол Семен Иннокентьевич электрогазосващик идэлээх. Онон Иннокентий Семенович улахан дьиэ кэргэн аҕа баһылыга, эйэҕэс эһээтэ.
Иллэҥ кэмигэр Иннокентий Семенович саха киһитин сиэринэн бултуурун сөбүлүүр, үгүс талааныттан бу киэһэ ырыа ыллаан иһитиннэрдэ. Ол эрээри, олоҕор биир саамай бэлиэ түгэнинэн кини ытыктыыр тренерин Дмитрий Петрович Коркин сырдык аатын үйэтитэн, «Сурэхпэр доготторум бука бары» диэн киинэҕэ улуу тренерин оруолун аан бастакынан уонна олус итэҕэтиилээхтик толорбута буолар. Бу бэлиэ түгэҥҥэ сөп түбэһиннэрэн, дьоро киэһэ бу киинэ ырыатын автора, тренер иитиллээччитэ Арыйаан Свинобоев ырыатынан түмүктэннэ.
Баҕарабыт ытыктыыр тренербитигэр кытаанах доруобуйаны, ыра санаалара барыта туоларыгар.
Д.П. Коркин аатынан Чурапчытааҕы республиканскай олимпийскай эрэллэри бэлэмниир оскуола – интэринээт пресс-киинэ
