Дуобат туох туһалааҕый? Бастакынан, оҕолорбут оскуолаҕа киирдэхтэринэ ахсаан уруогар толкуйдуур, өйдүүр дьоҕурдарын сайыннарар, сатаан өйгө таба эппиэти буларга үөрэтэр, сөпкө ыраҥалыыр дьоҕуру иҥэрэр; туруоруммут сыалы ситиһэргэ, болҕомтону түмэргэ үөрэтэр. Иккиһинэн, кыайарга уонна хоттордоххуна хомойбот гына үөрэтэр.
Биһиги кырачаан дуобатчыттарбыт күрэхтэһиигэ үөрэн-көтөн, арыллан оонньоотулар. Күрэхтэһиини көҕүлээччинэн оҕолору дьаныһан туран дьарыктыыр Иван Иванович Щукин, дуобакка спорт маастара, аан дойду бэтэрээннэргэ чемпиона, Россия сүүмэрдэммит хамаандатын чилиэнэ, буолар.
Бэлэмнэнии бөлөххө уолаттар, кыргыттар тус-туһунан уонна улахан бөлөх оҕолоро туспа күрэхтэстилэр. Күүстээх оонньуу кэнниттэн уолаттарга Афанасий Владимиров бастакы, Вова Винокуров иккис, Милан Николаев үһүс миэстэлэри үллэһиннилэр.
Бэлэмнэнии бөлөх кыргыттара түөрт буолан кииристилэр. Бастакы миэстэни Варя Петрова, иккиһи Инесса Максимова, үһүс миэстэни Селена Иванова ыллылар.
Оттон улахан бөлөх оҕолоругар биэс оҕо кытынна: икки кыыс, үс уол. Бу бөлөххө уолаттар төһө да мэник-тэник буоллаллар, сөптөөх оонньууну көрдөрдүлэр. Ол курдук, Аделина Терентьева эрэллээхтик бастаата. Иккис Харысхан Федоров, үһүс Эрсан Иванов.
Людмила ТИМОФЕЕВА,
“Айылгы” оҕо уһуйаанын иитээччитэ,
Октябрьскай нэһилиэк (Күөрэлээх), Горнай улууһа
