Күрэхтэһии сааһынан уонна кыргыттар, уолаттар, эр дьоннор, дьахталлар диэн арахсан 14 бөлөҕүнэн ыытылынна. Бу өбүгэлэртэн кэлбит сөрдээх хатыһыылаах оонньууга барыта 112 киһи кытынна. Күрэх сүрүн сыалынан сахалыы остуол оонньууларын үйэтитии, сайыннарыы уонна Манчаары оонньууларыгар бэлэмнэнии буолар.
Оҕону кыра эрдэҕиттэн хаамыска, хабылык оонньууларыгар үөрэттэххэ, угуйдахха оҕо бары өттүнэн тэҥҥэ сайдарыгар, эт-хаан өттүнэн эрэ буолбакка, оҕо толкуйдуур, өйүгэр тутар, дьоҕура күүскэ сайдарыгар көмөлөөҕө науканан дакаастаммыта. Уус Алдан улууһун оҕо тэрилтэлэригэр саха төрүт остуол оонньууларын оскуолаҕа киириэн иннинээҕи саастаах оҕолорго күүскэ тарҕатар, сөбүлэтэр, оҕо толкуйдуур дьоҕурун, мындыр, сымса буоларын сайыннарар сыаллаах-соруктаах бу көрүҥү күүскэ киллэрэн сылын аайы күрэхтэри оҕолорго эрэ буолбакка, үлэһиттэргэ эмиэ ыыталлар.
Оскуолаларга бу көрүҥү Баатаҕай орто оскуолатыгар Николаев Николай Адамович, Найахы орто оскуолатыгар Румянцева Наталья Дмитриевна күүскэ үлэлэһэллэр. Улуус сахалыы остуол оонньууларын федерацията (салайааччы Литвинцев Степан Моисеевич) бу күрэх муҥутуур кыайыылааҕар убаһа бирииһи туруоран күрэҕи ордук күүркэттэ.
Күүстээх киирсии кэнниттэн бастакы миэстэлэри Найахы детсадын иитиллээччилэрэ Гоголева Ванесса хабылыгын 36 сөкүүндэҕэ хабан, Сивцев Марат мүнүүтэ 13 сөкүүндэҕэ хабан буоллулар. Оскуола үөрэнээччилэригэр Федорова Дайаана, Федоров Тимур, Гоголева Анжела, Местников Ганя (Найахы), Гоголева Милена, Готовцев Ян (Баатаҕай) бастаатылар. Улахан дьоҥҥо 40-гар дылы Шепелев Василий (Бэрт Ууһа), Гоголева Ньургуйаана (Найахы) уонна 40-тан үөһээ Готовцева Елена (Найахы), Винокуров Николай (Арыылаах) кыайыы өрөгөйүн биллилэр. Доруобуйаларынан хааччахтаах дьон ортотугар кыайыылаахтарынан Елена Сивцева (Өлтөх), Прокопий Колодезников (Сыырдаах) буоллулар.
Күрэх муҥутуур кыайыылааҕынан Бэрт Ууһун нэһилиэгиттэн Шепелев Василий Васильевич буолла уонна убаһа бирииһинэн наҕараадаланна.
Инникитин даҕаны остуол оонньууларын федерацията бу көрүҥү киэҥник тарҕатар сыаллаах үлэлиирин биллэрдэ, көрөөччүлэр биһирэбиллэрин ылла.
Анна ПОПОВА
