1944 сылтан үтүө үгэскэ кубулутуллан быйыл 79-с төгүлүн ыытылынна. Доҕордоһуу болуоссатыгар турар Суорун Омоллоон аатынан Опера уонна Балет театрын иннигэр эстафета үөрүүлээхтик аһылынна.
Саха Өрөспүүбүлүкэтин физическэй культураҕа уонна спорка миниистирин э.т. Гаврил Мохначевскай, Дьокуускай куорат физическэй культураҕа уонна спорка Управлениетын начальнига Эдуард Ефимов, “Саха Бэчээт” ген.дириэктэрэ Ньургуйаана Стручкова, “Якутия” хаһыат сүрүн редактора Матрена Кондратьева, боксаҕа аан дойду үрүҥ көмүс призера, Россия биэс төгүллээх чөмпүйүөнэ, Россия спордун үтүөлээх маастара, Кыайыы Эстафетатын амбассадора Василий Егоров күрэхтэһии кыттыылаахтарын эҕэрдэлээтилэр.
Эстафета үгүс көлүөнэ быһыйдар хамаандаларын туһугар кыайыыга дьулуһар, үрдүк көрдөрүүлэри ситиһэр, кыайыылаахтары чиэстиир, улахан күрэхтэһиилэргэ кынаттыыр, саҥа ааттары таһаарар. Улуу Кыайыыны уһансыбыт сэрии бэтэрээннэрин, быыра быһыйдарбыт тустарынан үтүө өйдөбүнньүк быһыытынан билиниллэр, тапталлаах Сахабыт сирин сураҕырдар уҕараабат суолталаах. Номоххо киирбит “Эстафета палочкатын” аныгы көлүөнэҕэ тиэрдэн, салҕаан иһэр историяҕа тиһэр үрдүк аналлаах.
Кыайыы Эстафетатын сүрүн судьуйатынан бэйэтин кэмин күүстээх сүүрүгэ-быһыйа, оҕолорго уонна студеннарга Бүтүн Россиятааҕы, Дальнай Восток уонна Саха Өрөспүүбүлүкэтин чөмпүйүөнэ, кыайыылааҕа, билигин 1 № оҕо спортоскуолатыгар тренердиир, чэпчэки атлетикаҕа өрөспүүбүлүкэ оҕолорун сүрүн тренерэ Сергей Гуляев үлэлээтэ. Эрчимнээх куолаһынан хамаандалаан, эстафетаны саҕалаабытынан барда. Өрүскэ уу кэлэн иһэр сибикитэ биллэр буолан тыаллаах, тымныы салгыннаах.
Эстафета сүүрэр суола биир барыы. “Стаартаабыт” сирдэриттэн Ленин проспегын устун элээрэ тураллар уонна Ленин проспегын 1-гар турар “Алмаз Эргиэн Баан” тиийэн бараннар, төттөрү эргиллэн кэлэннэр “фиништииллэр”.
Оскуола оҕолорун 25 хамаандалара бастаан саҕалаатылар. Айсен Григорьев (850 м), София Васильева (350 м), Алексей Татаринов 500 м), Виолетта Ионова (390 м), Сулустаан Шишигин (390 м), Эркин Эркинов (300 м), Милена Самсонова (200 м), Арчын Саввин (350 м), Илиана Куприянова (650 м), Илья Билюкин (200 м) састааптаах А.Г., Н.К. Чиряевтар ааттарынан Дьокуускай куорат национальнай гимназиятын хамаандата 11 мүн 21 сөк көрдөрүүлээх биэтэккэ бастакынан кэллэ. 31-с оскуола иккис (11 мүн 37 сөк), 23-с оскуола үһүс (11 мүн 41 сөк) миэстэлэннилэр.
Бириистээх 1-кы этаабы оҕолорго Россия быйылгы чөмпүйүөнэ, чэпчэки атлетикаҕа өрөспүүбүлүкэ кыһыҥҥы чемпионатын улахан дьону кыайбыт, сэттис миэстэлэммит Дьокуускай куорат лицейин сүүрүүгэ улахан дьоҕурдаахүөрэнээччитэ Богдан Куценко бастакынан түмүктээтэ уонна 5000 солк сүрүн бирииһинэн наҕараадаланна:
“В принципе, бежал хорошо, но ветер и погода прохладно, но ничего, в любую погоду бегаем. О дистанции не думал, просто бежал и бежал. Короткий отрезок, 850 метров всего. После победы в январе на чемпионате республики, мы готовились к Первенству России среди юношей до 16 лет, и там успешно выступил и стал двухкратным чемпионом на дистанциях на 1500 м и 3000 м. Тренируюсь в ДЮСШ-5 у тренера Сотниковой Натальи Дмитриевны. Сейчас готовимся к Первенству России “Ю-18”, который пройдет в г. Челябинск. Готовимся очень активно на хороший результат. Бег для меня это то, что движет меня в жизни. Не представляю себя без бега”.
Үрдүк уонна орто анал үөрэх кыһаларыгар М.К. Аммосов аатынан ХИФУ Станислав Саввинов (850 м), Анна Николаева (350 м), Иван Саввинов (500 м), Яна Бережецкая (390 м), Эрсан Бурцев (390 м), Аркадий Тимофеев (300 м), Валерия Олесова (200 м), Данил Федоров (350 м), София Ефимова (650 м), Владислав Яколвев (200 м) быһыйдардаах хамаанда бастаата. С.Ф. Гоголев аатынан Дьокуускайдааҕы педколледж иккис, Арктическай государственнай агортехнологическай университет үһүс миэстэлэннилэр.
Үлэ кэлэктииптэригэр үөрэх профсойууһун үлэһиттэрин Петр Сячиков (850 м), Диана Адасько (350 м), Александр Нечаев (500 м), Сардаана Калитина (390 м), Александр Ушницкай (390 м), Виктор Попов (300 м), Валентина Иванова (200 м), Леонид Филиппов (350 м), Анастасия Охотина (650 м), Сергей Чунарев (200 м) быһыйдардаах хамаандата 11 мүн 37 сөк көрдөрүүлээх бастаата, Россия Саха сиринээҕи “МЧС” быһыйдара иккис, спорт Министиэристибэтэ үһүс бириистээх миэстэлэргэ тигистилэр.
Бириистээх 1-кы этаапка “МЧС” байыаһа, өрөспүүбүлүкэ чөмпүйүөнэ, марафоҥҥа спорт маастара Роман Алексеев кыайыыны ситистэ: “Күрэхтэһии үчүгэйдик ааста. Арыый тыаллаах, ол да буоллар, кыттааччылар син бааллар. Урут бастакы этаапка 1100 м сүүрэр эдэхпитинэ ордук этэ. 850 м арыый кылгас дии саныыбын. 800, 1500, 3000 м дьарыктанар эдэр уолаттар бааллар. Мин сүүрэр дистанциям уһун. Кыайыыбыттан үөрдүм. Бэйэм тактикабын тутустум. Дистанция аҥарыттан үлэлээн киирэн барбыппар уолаттар хаалбыттара. Ыам ыйын 3 күнүгэр Казаньҥа Россия чемпионатыгар кыттан кэллим. Хомойуох иһин, тумуулаан, ыалдьан хаалбытым, ол да буоллар сүүрбүтүм эрээри, харыстанаммын туораабытым. Тоҕо диэтэххэ, от ыйын 4 күнүгэр Санкт-Петрбурга “Белые ночи” сүүрэбин уонна сүрүн соругум - бу кэлэр күһүн Россия чемпионатыгар 100 км кыттаммын, норуоттар икки ардыларынааҕы кылаастаах маастар нуорматын бигэргэтиэхтээхпин. Онно бэлэмнэнэ сылдьабын”.
Күүстээх, үчүгэй дьарыктаахтар кыайыылары ситистилэр. Сэрии сылларыгар саҕаланан төрүттэммит “Кыайыы Эстафетата” үйэлэргэ салҕанар аналлаах.
Баһылай Посельскай
