Бу күрэхтэһии сүрүн сыала-соруга – куоракка олохсуйбут биир дойдулаахтарбытын түмүү, сомоҕолооһун. Хаһан да буоларын курдук саамай көхтөөх кыттааччыларынан аҕа саастаах дьоммут буоллулар.
Өрөбүл күн да буоллар, сарсыарда эрдэттэн “Эллэй Боотур” спорт дыбарыаһын музейыгар астына-дуоһуйа сырыттыбыт. Бу музей салайааччытынан киэн туттар, ытыктыыр биир дойдулаахпыт, университет профессора Валерий Кочнев таһаарыылаахтык үлэлии-хамсыы сылдьар. Кини дуобат күрэхтэһиитин тэрээһинигэр көмөлөстө, онон Валерий Пантелеймоновичка улахан махталлаахпыт.
Күрэхтэһиибитигэр үс спорт маастара уонна аҕыс маастарга хандьытаат кыттыыны ыллылар. Кинилэр истэригэр Саха сирин 13 төгүллээх чөмпүйүөнэ, биир дойдулаахпыт Николай Савинов баар. Кини кимиэхэ да иннин биэрбэтэ. Иккис миэстэҕэ Чуукаартан төрүттээх Василий Прокопьев, үһүскэ Антоновкаттан төрүттээх Екатерина Жиркова ылла.
Аҕа саастаах биир дойдулаахтарбытын, тыыл бэтэрээннэрин Василий Саввиновы (Чаппандаттан төрүттээх), Василий Прокопьевы, Екатерина Алексееваны (Чуукаартан төрүттээхтэр), Николай Егоровы (Хорулаттан төрүттээх) хайаан да бэлиэтиибин. Иннокентий Тимофеев кэргэнэ Татьяна Никитичналыын Чуукаартан кэлэн кытыннылар.
Маалыкайтан төрүттээх биир дойдулаахпыт, “Аргумент” ХЭТ генеральнай директора Любомир Михайлов эмиэ күрэхтэһиигэ кытынна. Кини бары кыттааччыларга өйдөбүнньүк суруктары туттартаата. “Өрөбүлгүтүн туһалаахтык атаарбыккытыгар, кэлэн ирэ-хоро кэпсэппиккитигэр махтанабын”, – диэтэ кини.
Аны ахсынньыга саахымакка күрэхтэһиэххэ диэн быһаарыстыбыт. Бу тэрээһинтэн олус астынныбыт, дуоһуйдубут, эдэр сааспытын эргиппит тэҥэ сананныбыт.
Михаил НИКОЛАЕВ,
Ньурба “Урожай” обществотын салайааччыта, дуобакка уонна көҥүл тустууга маастарга кандидат
