ССРС, РСФСР, Саха АССР үтүөлээх тренерэ, Саха АССР үтүөлээх учуутала, “Октябрьскай революция, “Бочуот Знага” орденнар кавалера Д.П. Коркин аатынан республикатааҕы спортивнай олимпийскай эрэллэри бэлэмниир интернат-оскуола спорт эйгэтигэр үтүмэн ситиһиилэри 1965 сыллаахтан саҕаламмыта.
Бу сыл Слава Карпов Махачкала куоракка Советскай Союз чемпионатыгар сахалартан бастакынан педъестал µрдµк чыпчаалыгар дабайбыта. Бу сүҥкэн ситиһии саха тустуутун аартыгын арыйарга сµрµн тирэх буолбута.
Улуу тренер Д.П.Коркин иитиллээччилэрэ үгүс киһи кыайбат кирбиилэрин ылбыттара - Олимп µрдµк чыпчаалын дабайбыттара. Чаҕылхай ситиһиилээх выпускниктарбыт билигин спорка уһуйуллар спортсмен үөрэнээччилэр килбиэннээхсити´иилэригэр бараммат баҕаны бөҕөргөтөллөр, инникигэ эрэли күүһүрдэллэр, үрдүк чыпчаалларга угуйаллар.
Улуу тренер Д.П.Коркин оскуолатыгар 450 оҕо республикабыт 26 улууһуттан, 4 куоратыттан үөрэнэ кэлбиттэрэ. Бу оҕолор сүрүн дьарыктара - спорт.
Биһиги оскуола биир киэн туттар выпускнига, XXI Олимпийскай Оонньуулар чемпиона Павел Павлович Пинигин түҥнэстибэт түөрэх төлкөлөммүт, спорт сайдыы туонатыгар олунньу 19 күнүгэр күндү ыалдьыт буолла.
Павел Павлович Пинигин Олимп чыпчаалын дабайбыта 40 сылыгар аналлаах, өрөгөйдөөх түгэни үйэтитэр стендэ үөрүүлээх аһыллыыта буолла. Стендэ үрдүгэр “Жизнь – борьба. И в ней, как и в борьбе побеждает только тот, кто неустанно трудится над своим разумом, телом, духовным развитием и кто до победного конца идет к своей высокой цели!” диэн этиитин аныгы технологиянан уоттанан-күөстэнэн суруллубут, сүрүн миэстэни Павел Пинигин ситиһиилэрэ уонна олимпийскай символ ылар.
Үөрүүлээх тэрээһини оскуолабыт дириэктэрэ, Российскай Федерация орто уонна уопсай үөрэхтээһин туйгуна Николай Николаевич Гуляев ыалдьыттарга, иитиллээччилэргэ уонна оскуола бары үлэһиттэригэр эҕэрдэ тылынан саҕалаата.
Павел Павлович Пинигин: «Ити стендэҕэ суруллубут тыллар спорка уһуйуллар үөрэнээччилэргэ алгыһым. Мин алгыс тылларбын өйдөөбүт, ылыммыт хас биирдии спортсмен үөрэнээччигэ ситиһии кэлэ туруоҕа. Спорка уһуйуллуум бу томторго 7 кылааска үөрэнэ кэлиэхпиттэн саҕаламмыта. Д.П. Коркин салайыытынан бэйэбит саҥа спортсаала туппуппут. Р. Дмитриев, Н. Захаров – Сахаачча, В. Карпов о.д.а. бааллар этэ”.
Ил Түмэн депутата, оскуолабыт попечительскай советын председателэ Павел Павлович Пинигин уонна кини бииргэ үөрэммит үөлээннээҕэ, Российскай Федерация үөрэҕириитин бочуоттаах үлэһитэ, Саха сирин тыа хаһаайыстыбатын Ыччат политикатын туйгуна Николай Семенович Жирков, спорка бэлэмнэнии регионнааҕы киин дириэктэрэ Александр Николаевич Андреев ыалдьыттаатылар.
“Эдэр коркинец” оҕо тэрилтэтин Павел Пинигин аатын сүгэр этэрээт 7 «Б» кылааһын 18 уола Монреаль куоракка буолбут олимпийскай оонньуу туһунан дьүһүйүүлэрин бэлэх ууннулар.
Салҕыы оскуолабыт бастакы выпускнига, Саха сирин бастакы спорка маастара, Оҕо спортивнай оскуолатын директора Семен Семенович Морфунов: «Күн тыкпыт сиригэр тыгар, чемпион тахсыбыт сириттэн тахсар, онон эһиэхэ, үүнэр көлүөнэ ыччаппытыгар, эрэлбит улахан», - диэн оҕолорго кэс тылын анаата.
Түмүккэ ыалдьыттар, оскуола бары үлэһиттэрэ, иитиллээччилэрэ тэрээһини астынан, Павел Павловиһы кытта хаартыска түһэн, үөрэн-көтөн тарҕастылар.
Ситэн-хотон сириэдийэн Чурапчыттан силис тардан дьулуурдаахтык эрчиллэн Олимп хайатын дабайбыт Павел Пинигиҥҥэ анаммыт стендэ сайдыы спорт туонатыгар албан аат, өрөгөй кыайыы кэрэһитэ буолан, кэнчээри ыччаты ыраахха ыҥыра-угуйа турдун!
Айталина Постникова, Ньургуйана Седалищева