Бу соторутааҕыта, остуол тенниһигэр биирдиилээн бастыыр иһин улуус чемпионата, кулун тутар 13 күнүгэр Ой нэһилиэгэр буолан ааста. Маны, биллэрин курдук улуус физическэй култуураҕа уонна спортка управлениета (сал. Ю.Ю.Никифоров), остуол тенниһин федерациятын кытта (бэрэссэдээтэл А.В.Михайлов) сүүрэн-көтөн тэрийдилэр. Үтүө үгэс быһыытынан, күрэхтэһиини үөрүүлээхтик арыйыы сиэригэр-туомугар, Мария Филипповна Иванова дириэктэрдээх «Түһүлгэ» култуура киинин үлэһиттэрин кыһамньыларын, “Айастаан” үҥкүү ансаамбыла, «Тирэх» эбээлэр ансаамбыллара (сал.У.С.Данилова) кыттыыларын, оскуола буфетыттан А.Д.Романова ас атыылаан көмө-тирэх буолбуттарын, нэһилиэк дьаһалтатын спортка тэрийээччитэ Олеся Афанасьева олус эппиэтинэстээхтик тэрийсибитин бэлиэтээн ааһар тоҕоостоох. Остуол тенниһин кылаабынай судьуйтынан, спорт бэтэрээнэ, Саха өрөспүүбүлүкэтин үөрэҕириитин туйгуна Анатолий Афанасьевич Архипов үлэлээтэ уонна күрэхтэһии туһунан маннык кэпсээтэ: - Саамай кыра саастаах кыттааччы бэһис кылаас оҕотоИванов Петя буолла, онтон саамай саастаах оонньооччу 72 саастаах В.Д.Данилов кытыннылар. Улууспутугар остуол тенниһэ сыллата сайда турар көрүҥ буолар. Бу күрэхтэһии түмүгүнэн, улахан дьоҥҥо өрөспүүбүлүкэ чемпионатыгар кыттарга хамаанда сүүмэрдэннэ. Оттон ити тэрийсибит, күрэхтэһиибит аһыллыытын-сабыллыытын иилээбит-саҕалаабыт дьоммутугар махталбыт муҥура суох,-диэн иһитиннэриитин түмүктээтэ.
Остуол тенниһигэр улуус чемпионатын кыайыылаахтара:
Эр дьоҥҥо
50-60 саастаахтарга
1 миэстэ -Михаил Громов (Ой)
2 миэстэ – Иннокентий Кононов (Булгунньахтаах)
3 миэстэ – Геннадий Скрябин (Покровскай к.)
60 үөһэ саастаахтарга
1 миэстэ - Николай Максимов (Хачыкаат)
2 миэстэ – Афанасий Свинобоев (Покровскай к.)
3 миэстэ – Валерий Данилов (Ой)
Абсолютнай чемпион – Вячеслав Игнатьев (Булгунньахтаах)
Дьахталларга
40 саастарыгар диэри
1 миэстэ - Саргылана Федорова (Булгунньахтаах)
2 миэстэ – Алина Захарова (IIДьөппөн)
3 миэстэ – Анастасия Петрова (Улахан-Аан)
40 үөһэ саастаахтарга
1 миэстэ - Муся Александрова (Ой)
2 миэстэ – Альбина Петрова
3 миэстэ – Гера Шишигина (Покровскай к.)
Абсолютнай чемпионка – Саргылана Федорова (Булгунньахтаах)
Уйбаан УЙГУУРАП,
Спиридон ШИШИГИН хаартыскаҕа түһэриитэ.
