Ол курдук муус устар 8 күнүгэр остуол тенниһигэр республика, улуус хас да төҕүллээх призера, чемпиона Чычымахтан сыдьааннаах И. К. Софронов сырдык кэриэҺигэр анаммыт турнир үһүс төгүлүн буолан ааста. Иккис турнира Дьокуускайга 2009 с “Модун” спорткомплеска буолбута. 8 чыыһылаҕа киэһэ култуура дьиэтигэр ахтыы киэһэтэ буолла. Манна бииргэ үөрэмиттэрэ, бииргэ төрөөбүттэрэ, доҕотторо, оҕолоро истиҥ, иһирэх тылларынан Иван Куприяновиһы, биир кэмҥэ үөрэммит, үлэлээбит, алтыспыт сылларын долгуйа аҕыннылар. Ахтыылар быыстарыгар Харбалаах лицейиттэн, олохтоох үҥкүүһүттэр, ырыаһыттар, Иван Куприянович куораттан кэлбит сиэннэрэ ыллаан биэчэри киэргэттилэр. Киэһэ дьиэ кэргэнэ минньигэс астаах фуршет тэрийдэ.
Сарсыарда икки этээстээх таас, сырдык оскуола спортивнай саалатыгар, үөһээ фойенан аҕыс остуолга күрэхтэһии саҕаланна. Күрэхтэһии парадтан саҕаланна. Манна кэлбиттэр Нам, Чурапчы, Мэҥэ Хаҥаластан, Сунтаар, Жатай, Таатта улууһуттан Харбалаах, Хара Алдан, Баайаҕа, Ытык Күөл, Харбалаах, Кыйы уонна Чычымах биирдиилээн оонньооччулара, хамаандалара.
Күрэхтэһии саастарынан арахсан оскуола оҕолоруттан саҕалаан аҕа саастаахтарга тиийэ буолла. Кылаабынай судьуйанан олохтоох оскуолаҕа уһун сылларга физкультура учууталынан үлэлээбит, элбэх оҕону теннис спордугар уһуйбут, Саха сирин үөрэхтээһинин туйгуна Михаил Семенович Кулачиков олордо. Тынааһыннаахтык киирсии элбэх остуол буолан сылбырҕатык барда. Уопсайа 70-ча спортсмен кытынна. Саамай эдэр кыттааччы 11 саастаах Айсен Егоров, саамай саастаах кыттааччы 77 саастаах Иван Яковлевич Павлов оонньоотулар.
Эрийсиилээх киирсии кэнниттэн муҥутуур кыайыылаахтарынан буоллулар Ытык Күөлтэн 10 кылаас. үөрэнээччитэ Арсен Платонов. Арсен И.К. Софронов дьиэ кэргэнэ туруорбут плазменнай телевизарынан наҕараадаланна. Дьахталларга 55 саастарыттан үөһээҕэ Намтан сылдьар Евдокия Староватова ыраастык кыайан, Иван Куприянович бииргэ үөрэммиттэрэ туруорбут аан чороону тутан күөрэччи көтөхтө.
Күрэхтэһии кэмигэр оскуола буфета сылаас аһылыгынан хааччыйда. Бастакы миэстэни ыччаттарга Михаил Эртюков (Ытык Күөл), кыргыттарга Дьокуускайга олорор Михаил Семенович иитиллээччитэ Марианна ыллылар Васильева. Оҕолорго Милена Кириллина (Ытык Күөл), Луковцев Стас (Баайаҕа) иннилэрин кимиэхэ да биэрбэккэ эрэллээхтик бастаатылар.
Үөрүүлээх чааһыгар спорт министрин М.Д. Гуляев илии баттааһыннаах грамоталары Кулачиков М.С. Амма нэһилиэгин баһылыгар С.С Соров туттарылынна. Күрэхтэһии кыттылаахтарыгар сыаналаах бириистэр, сертификаттар үөрүүлээх быһыыга туттарылынна. Бары өттүк харалаах үөрэн-көтөн, астынан тарҕастылар.
Иван Куприянович уолугар Сергей Ивановичка “Нэһилиэк сайдыытыгар кылаатын иһин” бэлиэ туттарынна.
Ити курдук Амма нэһилиэгэ спорду өрө тутан аныгы олох көрдөбүлүгэр тэҥҥэ хардыылаан сайдан иһэриттэн үөрэбит.
Түгэнинэн туһанан бары спонсордаабыт дьоннорбутугар, табаарыстарбытыгар, нэһилиэк дьаһалтатыгар, улуус спорт кэмитиэтигэр, аймахтарбытыгар, күрэхтэһиини өйөөбүт нэһилиэк олохтоохторугар, чуолаан турниры көҕүлээбит, сүүрбүт-көппүт М.С. Кулачиковка дириҥ махталбытын тиэрдэбит. Эһиэхэ өссө да элбэх ситиһиилэри, олоххутугар дьолу-соргуну баҕарабыт.
Иван Куприянович Софронов дьиэ кэргэнэ
