Спордунан киһи күрэхтэһиигэ кыайан-хотон, мэтээл ылаары дуу, эбэтэр биллэн-көстөн аат-суол ылаары дуу дьарыктаммат. Спорт чиргэл, тэтиэнэх буолууну сэргэ, оҕону-ыччаты, киһини иитэр-үөрэтэр, кэрэҕэ-сырдыкка ыҥырар-угуйар, олоххо, үлэҕэ активнай позициялаах буоларга ыҥырар суолтата сүдү.
Маныаха сахавалар холобур буолар дьаһаллары ыыталлара сэҥээрдэр.
Дьокуускайга VIНоруоттар икки ардыларынааҕы "Азия оҕолоро" спортивнай оонньуулар ыытыллалларынан, олоҕу тупсарыыга уонна ырааһырдыыга куорат уокуруктарыгар кулун тутар, муус устар, ыам ыйдарыгар үс ыйдаах тэрээһиннэри ыытар туһунан быһаарыы тахсан турар. Ити быһаарыыга олоҕураннар, волейболистары түмэр Саха волейболга ассоциациятын общественнай тэрилтэтэ куорат биир эмэ уокуругун территориятын ыраастааһыҥҥа тыл көтөхпүтэ. Көрдөһүү тута ылыныллыбыта. Областной балыыһа иннигэр баар Щорс күөлүн тулатын ыраастыырга этии киирбитэ.
Ыам ыйын 20 күнүгэр СахаВА волейболистара күргүөмүнэн субуотунньукка таҕыстылар. Сахава ветерана Николай Кронников, “Сахакредитбаан” бэрэссэдээтэлэ, СахаВА президенэ Сергей Иванов субуотунньук сыалын-соругун билиһиннэрдилэр, эҕэрдэ тыллары эттилэр. Сыһыарыллыбыт территорияны сыыстан-бөхтөн ыраастаан, кыраабыллаан кэбистилэр. Өрөспүүбүлүкэҕэ биллэр "Сэргэлээх", "Сахамедстрах", "Аргыс", "Тулагы" волейболист уолаттара-кыргыттара бэриллибит учаастагы күлэ-үөрэ, эдэрдии эрчимнэринэн аҕыйахтык хамсанан кэбистилэр. Щорс күөл кытыла көрүөх-бэтэрээ өттүгэр ырааһыра, волейболу өрө тутааччыларга махтаммыттыы, долгуннурар уута сааскы чаҕыл күҥҥэ күлүмүрдүү, мичилийэ түстэ.
СахаВА Үтүө Дьыалалара ветераннарга болҕотону ууруунан салҕаналлар.
Бэйэтин кэмигэр тахсыылаахтык оонньообут, билигин ыарахан ыарыыга ылларан спорт сонунун дьиэтигэр олорон истэр-билэр СахаВАбочуоттаах маастара Дмитрий Избеков сааскы бырааһынньыктарынан эҕэрдэлэри тутта, истиҥ-иһирэх кэпсэтиилэргэ улаханнык сэргэхсийдэ, махталын биллэрдэ.
Нам I Хомустааҕар саҥа спортсаала киллэриллэн, СахаВА бочуоттаах ветерана Анатолий Софроновка аналлаах тыа сирин волейболистарын уон сэттэ хамаандаларын аһаҕас турнира тэрилиннэ. СахаВА президенэ Сергей Иванов, улуус баһылыга Александр Атласов, нэһилиэк баһылыга Василий Жирков эҕэрдэлээтилэр. Салгыҥҥа күөрэйэр тирии мээчиги өрө тутан, Анатолий Софронов оҕолору волейболга уһуйбут, улууска аан бастакынан "Хомустаах" аатынан кулуубу тэрийбит, балассааккаҕа бастыҥ быраҕааччынан, туруорааччынан биллэн хамаандатын кыайыыларга кынаттаабыт.
Сахакредитбаан салайааччытын быһыытынан, СахаВА президенэ Сергей Иванович Иванов билигин атаҕынан инбэлииккэ пенсияҕа тахсан олорор Анатолий Михайлович Софронов олорор чааһынай дьиэтин септик туруоран, туалетын, уу кутар буочукатын, уунуу хачайдыыр насоһун барытын, дьиэни аны биир ыйынан толору хааччыллыылаах оҥорорго сертификат туттарбыта дохсун ытыс тыаһынан доҕуһуолланна.
Итинник көмөлөр СахаВА ветераннарыгар сыллата оҥоһуллуоҕа.
Бэртээхэй бачыым батыһааччылардаах буоллун!
Баһылай ПОСЕЛЬСКАЙ
