Үрдүк тэрээһиннээхтик түмүктэммит Россия чемпионатыгар классическай уонна блочнай охторунан ытыыга Забайкалье, Бурятия, Москва охчуттара биирдиилээн уонна хамаанданан күрэхтэһиилэргэ бастыҥ көрдөрүүлэннилэр.
Сахабыт сирин сүүмэрдэммит хамаандатыттан Хаҥалас улууһун Покровскай оҕо спортоскуолатыгар Павел Михайлович Алексеев-Стасовка, Анна Павловна Алексеева-Стасоваҕа уонна Михаил Валерьевич Алексеевка оҕо саастарыттан эрчиллэр
норуоттар икки ардыларынааҕы кылаастаах спорт маастардара, Саха сирин хас да төгүллээх чөмпүйүөннэрэ Дайаана Винокурова уонна Павел Мартынов блочнай оххо иккиэ буолан буккаас ытыыга үһүс миэстэни былдьаһыыга Ярославскай уобалас охчуттарын биир очконан баһыйаннар, 148:147 кыайдылар уонна боруонса мэтээллэр хаһаайыннарынан буоллулар! Иккиэн үгүс үрдүк көрдөрүүлэрдээх уопуттаах күрэсчиттэр. Быйылгы Россия чемпионатын таһыма олус үрдүгүн бэлиэтииллэр.
Кэбээйиттэн төрүттээх-уустаах Дайаана Винокурова:
“Биирдиилээн уонна хамаанданан ытыыларга элбэх чемпионаттар, кубоктар, норуоттар икки ардыларынааҕы күрэхтэһиилэргэ миэстэлэһэ сылдьыбытым, олор истэригэр, Россия чемпионаттарын үс төгүллээх призерабын. Дойду атын куораттарыгар ыытыллар күрэхтэһиилэри кытта тэҥнээтэххэ, бу уон сыл иһигэр, маннык үчүгэй тэрээһини көрө иликпин. Туруоруммут сыалбын-сорукпун ситистим. Саамай соһуйбутум диэн, квалификацияҕа 70 миэтэрэҕэ 2022 с. өрөспүүбүлүкэҕэ бэйэм олохтообут рекорпун 351 очкону ыламмын, үс очконан тупсардым. Боруонса мэтээли ылбыппытыттан олус үөрэбит. Боруонса мэтээл диэн, быһааран эттэххэ, “Все, или, ничего” буоллаҕа дии. Ол иһин “до конца” үлэлиэххин наада. Үрүҥ көмүстээҕэр күндү. Кыра финалга хоттордоххуна туга да суох хаалаҕын. Ол иһин, боруонса мэтээл иһин улахан киирсии буолааччы. Атырдьах ыйыгар Санкт Петербурга буолар Россия Кубогар уонна норуоттар икки ардыларынааҕы турнирга бэлэмнэниэхпит. Ол кэнниттэн Екатеринбурга “Спартакиада сильнейших” кыттыахпыт. Салгыы, итинник бэлэмнэнэн иһиэхпит.
Хамаанданан түмүккэ Россия икки төгүллээх чөмпүйүөнэ, Россия Кубогын кыайыылааҕа Павел Мартынов: “2019 с. Иркутскайга буккаас ытыыга Дайаана Винокуровалыын Россия үрүҥ көмүс призердара буолан турабыт. Ох ытыытыгар кытаанах ньиэрбэ наада. Сайыҥҥы күрэхтэһиилэргэ “погодабыт” эмиэ улахан оруолу оонньуур. Ким-хайдах бэлэмнээх, “устойчивай” үчүгэй көрдөрүүнү ситиһэр. Куйаас күн кимиэхэ эрэ мэһэйдиир, кимиэхэ эрэ мэһэйдээбэт. Холобур, сыралҕан күн миэхэ квалификацияҕа ытарбар кыратык мэһэйдээтэ. Сыалым-соругум диэн, кыһыҥҥы чемпионакка, күрэхтэһиилэргэ бэлэмнэниэм”.
Бэргэн охчуттар тэҥ саастыылаахтарын, ыччаттары спордунан дьарыктанарга, чөл олоҕу батыһарга, көнө суолу тутуһарга ыҥырдылар. Мэтээллэри аҕалбыт охчуттарбытын эҕэрдэлиибит, мэтээллэр кэлэ, үксүү турдуннар!
Баһылай Посельскай
