Ахсынньы ый 5-6 күннэригэр Нам улууһун КСК спортивнай саалатыгар,волейболга 14-15 саастаах кыргыттарга, “Азия оҕолоро” VI-с норуттар икки ардыларынааҕы спортивнай оонньууларын Саха сирин сүүмэрдиир күрэхтэһиитин III-с этаба ыытылынна.
Барыта тоҕус хамаанда, тирии мээчик спортивнай оскуолаларын уонна филиалларын хамаандалара мунньустан, бу быһаарыылаах оонньууну көрдөрдүлэр. Сунтаар,Үөһээ Бүлүү курдук ыраах улуустар кэлэн кыттыбыттара күрэхтэһии таһымын киэргэттэ. Икки күннээх бэрт интириэһинэй уонна быһаарыылаах оонньуулар кэннилэриттэн эдэркээн Чурапчы оскуолатын иитиллээччилэрэ финалга Мэҥэ-Хаҥалас хамаандатын сабырыйан кыайыылааҕынан таҕыста. Манна Россия спордун маастара Светлана Муратова салайааччылаах Дьокуускай оскуолатын иитиллээччилэрэ үһүс миэстэни ыланнар кыахтарын ситэ туһамматахтара көһүннэ.
Ким үчүгэй тэрээһиннээх ол инникигэ, хаһан баҕар ситиһиилээх буолар. Бастакы күҥҥэ «Боотулу»(Үөһээ Бүлүү) Амманы 2:0, Мэҥэ-Хаҥалас Дьокуускайы 2:0 кыайаннар улахан буккууру таһаара сылдьыбыттара. Онтон оонньуур таһымнара арыый үрдээн,сыыһаларын көннөрөн үчүгэй өрүккэ тахсыбыттарын дакаастаатылар. Икки күннээх күрэхтэһии хамаандаларга элбэх саҥа сүүрүүлээх-көтүүлээх хамсаныылары,тренердэртэн элбэх сүбэлэри-амалары ылан улахан дуоһуйууну ылан бардылар.
Бу турнирга Дана Апросимова (Чурапчы) - «Бастыҥ оонньооччу», Лариса Шишигина (Мэҥэ-Хаҥалас) – “Бастыҥ охсооччу”, Лиза Игнатьева (Чурапчы) – “Бастыҥ туруорааччы” уонна Надя Сентизова (Дьокуускай) – “ Бастыҥ көмүскээччи” анал бириистэринэн наҕараадаланнылар. Бу күүстээх састааптан Саха сирин сүүмэрдэммит хамаандата тахсан дьаныардаах эрчиллиинэн, аны сайын улахан тирии мээчик кинилэри истиҥ көрсүһүүгэ тириэртиҥ диэн алҕыы хаалабыт.
Анатолий Софронов – Онтуон. Нам.
