Нэһилиэк баһылыга Василий Васильев сахалыы мандар оһуордаах таҥастаах сиэдэрэйдик симэммит арыалдьыттарынан эҥэрдэһэн киирэн, ыһыах аһыллыытын биллэрдэ. Алгысчыт Алиса Иннокентьева аал уоту саһарчы буспут алаадьынан, уохтаах кымыһынан, Дьөһөгөй оҕотун үрүҥ сиэлинэн маанылаата.
Сарсыарда чаҕыл күн уота күлэ-үөрэ оонньоотун кытта Муоһааны Эбэ барахсан киэҥ кырдалыгар дьон-сэргэ тоҕуоруһа муһунна. Марха орто оскуолатын Софья Петрова салайааччылаах «Үрдэл» ансаамбылын үҥкүүһүттэрэ, сыанаҕа кыырай халлаантан күөх сирэмҥэ түспүт кыталыктарга тэҥнээхтик ойон-тэбэн бардылар. Оҕолор Сочига норуоттар икки ардыларынааҕы күрэххэ лауреат буоланнар, Үрүҥ Тунах ыһыахха дьонноругар дьоһун бэлэҕи ууннулар.
Оройуон, нэһилиэк дьаһалталарын аатыттан үлэни өрө туппут хоһууттарга, общественнай үлэ актыбыыстарыгар, дьон киэнэ чулууларыгар наҕараадалар туттарылыннылар. Онтон «Киэргэллээх түһүлгэбит кэрэ түгэнэ» диэн оһуохай этээччилэр күрэхтэрэ саҕаланаатын кытта эдэрдиин-эмэнниин илии-илиилэриттэн ылсыһан оһуохай түһүлгэтигэр киирдилэр. Аар-саарга аатырбыт оһуохай этээччи улуус култууратын управлениетын салайааччыта Розалия Тихонова, саха саҥалаах ытыктыыр оһуохайдьыта Виссарион Гаврильев о.д.а. чөллөрүйбүт куоластарынан өрө күүрүүлээхтик эттилэр. Саха норуотун мандардаах таҥаһын күрэҕэ саҕаланан сибэккилии симэнэн Үрүҥ Тунах ыһыах күн таркаайылар ох курдук оҥостон, хаарыс солкоҕо сууланан, сайбалдьыһа хаамсаннар хараҕы сымнаттылар, кэрэни кэккэлээтилэр. «Алыптаах ырыа дорҕооно» куонкуруска сахалыы дэгэрэҥ, кылыһахтарынан рэп ааҕыллан сонуннук иһилиннэ. Сыана бэтэрээнэ Людмила Николаевна, сир симэхтэрэ-кырачаан кыргыттар ырыалара ытыс тыаһын хомуйдулар, бириистэргэ тигистилэр.
Күүтүүлээх «Таркаайы Баатыр» диэн күүстээхтэр-быһыйдар илин-кэлин түсүһэр күрэхтэрэ саҕаланна. Көрүҥэ арааһа элбэх. Күрэххэ Таркаайы сиригэр-уотугар төрөөбүттэр эрэ кыттар усулуобуйалаахтар, оҕолорбут барахсаттар бары даҕаны успуорду өрө туппут, чөл олохтоох, инники кэскиллээх эгил-тэгил саастаахтар. Көрөөччү элбэҕэ күрэҕи эбии сытыырхатта. Уопсай түмүгүнэн Спартак Иннокентьев тыынан, Кеша Кычкин сахалыы сервиһинэн, 5 тыһыынчалаах сертификатынан, Николай Ефремов сыбааркалыыр аппараатынан, Егор Егоров холодильнигынан, Виталий Филиппов — ЖК телевизорынан, Василий Иванов — МР саа сертификатынан, Иван Иванов үһүс миэстэ буолан МР саа сертификатынан, Киирэп с. Борис Иванов иккис миэстэлэнэн убаһа бириистэннилэр. Аян Петров бастаан ыһыах түһүлгэтиттэн «Минскэй» матасыыкылынан дьон-сэргэ уруйунан доҕуһуоллатан сүүрдэн таҕыста. Уоттаах-күөстээх күрэҕи комментатор Иван Моргусов ситэрэн-хоторон, хомоҕой тылынан киэргэттэ. Михаил Гаврильев, Афанасий Кириллин, Айталина Алексеева күрэхтэһии үрдүк таһымнаахтык ыытылларыгар сыраларын уурдулар.
Киэһэ киэҥ программалаах кэнсиэр кэнниттэн кэргэннии Нарыйа, Егор Свешниковтар дьиэ кэргэттэрэ лотерея оонньоттулар: «Минскэй» матасыыкылы, Айфон телефону, күлүүс нобуордарын, духуопканы о.д.а. Саамай улахан сүүйүү — матасыыкыл, Аканаттан ыалдьыт Сардана Захароваҕа тиксэн үөрүүтэ үксээтэ. Айфон телефону Таркаайы олохтооҕо Мария Семенова, күлүүс нобуорун олохтоох оскуола ытыктанар үлэһитэ Мария Федорова, духуопканы Михаил Гаврильев сүүйэннэр сүргэлэрэ көтөҕүлүннэ.
Нэһилиэк баһылыга Василий Васильев кыһаллан, сүүрэн-көтөн спонсордары булаттаан, сыаналаах бириистэри туруорда. Олохтоохтор сыаналаах малы-салы спонсордаабыт дьоһун дьонноругар истиҥник махтаннылар.
Афанасий Моргусов аатынан норуот айымньытын дьиэтин үлэһиттэрэ тэрээһини үрдүк таһымнаахтык ыыттылар. Кииннэрэ түспүт сирдэрин ыһыаҕар кэлбит ыалдьыттар олус диэн астыннылар, нэһилиэк инники кэскилэ кэрэтин өссө төгүл итэҕэйдилэр.
Ааптар: Елизавета АЛЕКСЕЕВА, Газета «Ньурба – Огни Нюрбы»
