Саха спордун национальнай көрүҥнэригэр күрэхтэһии үөрүүлээх арыллыытыгар улуус баһылыга Сергей Винокуров, Бүлүү куорат баһылыга Ян Попов көрөөччүлэри эҕэрдэлээтилэр, боотурдарга кыайыыны баҕардылар.
Быйылгы күрэхтэһиигэ ким кытынна, туох уларыйыы таҕыста?
Бүлүү улууһуттан хотугу многоборьеҕа спорт маастара, «Бүлүү Боотур» хас да төгүллээх кыттыылааҕа Айаал Никифоров, атах оонньууларыгар спорт маастардара Кюндюл Карбаканов, Александр Алексеев, «Бүлүү Боотур — 2022» кыайыылааҕа Михаил Николаев уонна биир кыахтаах боотурбут Любомир Сыромятников кыттан күүстэрин холостулар.
Иккис сылын өрөспүүбүлүкэтээҕи аһаҕас күрэхтэһии ыытыллар буолан атын улуустартан, Дьокуускайтан боотурдар ох курдук оҥостон кэлэллэр. Быйыл Өлөөнтөн мас-рестлиҥҥа спорт маастара Айсен Семенов, Орто Халыматтан хотугу многоборьеҕа спорт маастара, РФ уонна Саха Өрөспүүбүлүкэтин чемпиона Алексей Созонов, Кэбээйиттэн Николай Архипов, Үөһээ Дьааҥыттан многоборьеҕа спорт маастара Петр Прудецкай кытыннылар.
Былырыын «Бүлүү Боотур — 2024″ күрэхтэһиигэ Петр Прудецкай үрүҥ көмүс призер, Айсен Семенов 6 миэстэ буолбуттара.
«Байанай бэлэҕэ» бастакы көрүҥҥэ — оҕунан ытыыга Алексей Созонов бастаата, иккис — Айсен Семенов, үһүс — Айаал Никифоров буоллулар.
«Үс төгүл үс» атах оонньуутугар 31,8 м ыстаммыт Алексей Созонов бастаата, иккис –Кэбээйиттэн Николай Архипов, үһүс миэстэҕэ — Кюндюл Карбаканов таҕыстылар.
«Кыыһы эккирэтии» көрүҥэр боотурдар сүүрүүк кыыһы Зоя Попованы эккирэттилэр да сиппэтилэр. Биэтэккэ бастакынан Алексей Созонов кэлэн үс көрүҥ субуруччу кыайыылааҕа буолла! Иккиһинэн-үсүһүнэн Петр Прудецкай уонна Михаил Николаев кэллилэр.
«Бүлүү Боотур — 2025» бастакы күнүн түмүктүүр күрэхтэһиигэ — мас тардыһыытыгар Михаил Николаев кыайан биир дойдулаахтарын улаханнык үөртэ. Иккис миэстэни мас-рестлиҥҥэ спорт маастара Айсен Семенов ылла, Петр Прудецкай үһүс буолла.
Бастакы күн түмүгүнэн Алексей Созонов 9 бааллаах бастаабыта, иккискэ — 14 бааллаах Николай Архиповтахсыбыта, үһүс — 16 бааллаах Айсен Семенов буолбута.
Михаил Николаев уонна Петр Прудецкай 18-тыы баал суруммуттара.
Бэс ыйын 21 күнүгэр, «Хомустаах» Киин түһүлгэтигэр «Бүлүү Боотур — 2025» таас көтөҕүү, тутум эргиир, хапсаҕай көрүҥнэригэр күрэхтэһиилэр тэрилиннилэр.
Бастакы күн атах оонньуутугар спорт маастара Александр Алексеев күрэхтэһииттэн эчэйэн туораабыта, ононбоотурдар сүрүн бириис иһин 8 буолан кииристилэр.
Күрэхтэһии иккис күнэ «Тутум эргиир» көрүҥтэн саҕаланна. Бу көрүҥҥэ Алексей Созонов эмиэ кыайыы үөрүүтүн биллэ. Кини «Бүлүү Боотур -2025» түөрт көрүҥэр кыайан, уопсай түмүккэ кыайарга төрүөт уурда. Иккис миэстэни Петр Прудецкай, үсүһү — Бүлүүттэн, мас тардыһыы көрүҥэр күрэхтэһии кыайыылааҕа Михаил Николаев ыллылар.
Көрөөччүлэр хапсаҕайдаһан тустууга сытыы хапсыһыылары көрөн астыннылар-дуоһуйдулар. Хапсаҕай көрүҥэр Айсен Семенов бастаата, иккиһи Петр Прудецкай, үсүһү Алексей Созонов ыллылар.
Алексей Созонов бастаан иһэр, иккис тэҥ бааллаах Петр Прудецкай уонна Николай Архипов иһэллэр, төрдүскэ Айсен Семенов таҕыста.
Күрэхтэһиини түмүктүүр «Таас көтөҕүү» көрүҥэ хаалла. Кюндюл Карбаканов 110 киилэлээх тааһы 140 м. илдьэн бастаата, Айсен Семенов 124 м тиэрдэн иккис буолла. Үһүс миэстэни ылбыт Петр Прудецкай тааһы 110 м тиэртэ.
Күрэхтэһии түмүгүнэн Орто Халыматтан Алексей Созонов 19 баалы сурунна, Өлөөнтөн Айсен Семенов уонна Үөһээ Дьааҥыттан Петр Прудецкай 25-тии бааллаахтар, Кэбээйиттэн Николай Архипов 26, бүлүүлэртэн бастыҥ Михаил Николаев 31, Кюндюл Карбаканов 37 бааллары ыллылар.
«Бүлүү Боотур — 2025» кыайыылааҕынан спорт үтүөлээх маастара, хотугу многоборьеҕа спорт маастара, Арассыыйа 5 төгүллээх муҥутуур чемпиона, РФ Кубогын икки төгүллээх хаһаайына Алексей Созонов буолла!
Кини 7 көрүҥтэн бииргэ эрэ — мас тардыһыытыгар 6 миэстэлээх, «Оҕунан ытыы», » Кыыһы эккирэтии», «Үс төгүл үс», » Тутум эргиир» көрүҥнэргэ кыайыыны ситистэ.
«Бүлүү Боотур — 2025» күрэхтэһии иккис призерунан Айсен Семенов буолла. Үһүс үктэлгэ Петр Прудецкай таҕыста.
Хоту дойду хоһууннара «Бүлүү Боотура — 2025» күрэхтэһиигэ күннэрэ таҕыста!
Муҥутуур кыайыылаах мөл. аҥара солк., иккис миэстэлээх 300 тыһ. солк., үһүс миэстэлээх 200 тыһ. солк. сертификаттарынан наҕараадаланнылар! Итини таһынан, көрүҥнэринэн бастаабыттарга, миэстэлэспиттэргэ, номинацияларынан харчы сертификаттара, сыаналаах бириистэр туттарылыннылар.
«Бүлүү Боотур — 2025» күрэхтэһии түмүктэринэн бэҕэһээ социальнай ситимнэр оргуйан олорбуттара. Өрөспүүбүлүкэ идэтийэн дьарыктанар бастыҥ спортсменнарын кытта тэҥҥэ эрийсэр боотурдарбыт суохтарынан, «Бүлүү Боотур — 2025» күрэхтэһиини урукку курдук улуус иһигэрэрэ тэрийэргэ элбэх киһи этиннэ.
Күрэхтэһии түмүктэниитэ улуус баһылыгын бастакы солбуйааччы Иван Евсеев ити туһунан дьон санаатын иһитиннэрдэ. Спорт сайдыытын таһымын көтөҕөргө сылы быһа дьүүллэһэр, ырытыһар төрүөт көһүннэ. Эһиги туох дии саныыгыт?
«Олох суола» Телеграм-ханаалыгар санааҕытын этиниэххит диэн эрэнэбит!
Николай Куприянов, "Олох суола"
