“Тардыныы” - онлайн ситиминэн бара турар бэртээхэй бырайыак.

Былырыын, 2020 сыл от ыйын 1 күнүгэр Чурапчы Кытаанаҕыттан төрүттээх-уустаах, физкультураны уонна спорду өрө туппут, чөл олох аргыстаах, билигин сылаҥҥа оҕолору тустууга иитэр-уһуйар Саха Өрөспүүбүлүкэтин үтүөлээх тренерэ Егор Иванович Яковлев уонна Москваҕа “РИК-финанс” генеральнай дириэктэрэ Дмитрий Петрович Захаров “Тардыныы бөлөҕү” тэрийбиттэрэ, номнуо, биир сыл буола оҕуста.

Киһи санаа хамначчыта диэн сахаларга олус бэргэн өс хоһооно баар. Аны санаан көрдөххө, “Тардыныы” бөлөх күүһэ-кыаҕа аҥардас былчыҥы эрэ сайыннарыы буолбакка, өй-санаа күүһүрүүтүн иҥэриигэр сытар. Бастаан санаа күүһэ баар буолбутун кэннэ, онтон, дьэ, былчыҥ сайдыыта барар.

“Тардыныы” - онлайн ситиминэн бара турар бэртээхэй бырайыак. Бөлөх сүрүн сыала-соруга чэгиэн-чэбдик сылдьыыны, бөлөххө дьон киирэрин көҕүлээһин. Улуу тренер Д.П.Коркин аатынан Чурапчытааҕы Олимпийскай солбук оҕо спортивнай оскуола-интэринээтин дириэктэрэ Николай Николаевич Гуляев истээт, тута киирбитэ. От ыйын бүтүүтүгэр тардыныы бөлөҕүн кэккэтэ 54 киһи буолбута. Билигин 129 киһиэхэ тиийдэ. Аан дойдуга, Европаҕа, Россияҕа бастаталыыр Сахабыт сирин бастыҥ спортсменнара Сергей Фролкин, Евгений Самсонов, Виталий Никифоров, Тургун Егоров, ММА тренерэ Эркин, Борис Винокуров, бырааттыы тустуу маастардара Константин, Михаил Пахомовтар перекладинаны баһылаабыттарын, чахчы күүстэрин-кыахтарын көрдөрөллөр. 70 саастарын лаппа ааһан да бараннар спортивнай формаларын тута сылдьар аан дойду чөмпүйүөннэрэ Иннокентий Семенович Кочкин, Петр Иванович Наумов, маҥнайгы ыытыллыбыт “Дыгын оонньууларын” үс төгүллээх чөмпүйүөнэ, “Үс түмсүү” салайааччыта Иннокентий Федорович Макаров, көҥүл тустууга Россия икки төгүллээх чөмпүйүөнэ, гурман-асчыт Петр Михайлович Малардыров, армияҕа сулууспалыы сылдьар Москваҕа Кыһыл болуоссакка быйылгы Кыайыы парадын кыттыылааҕа Алгыстан Скрябин уо.д.а. группаҕа киирэннэр улахан сэргэхситиини таһаардылар, үтүө холобурунан туһаналлар.

Хирург быраас, дьаарай волейболист Владимир Ильич Чичигинаров, Нерюнгритээҕи оҕо тустууга оскуолатын тренерэ Афанасий Петрович Ноговицын, Анаабыртан дьарыктаныы фаната Василий Туприн, улуу тренер Д.П. Коркин ылгын иитиллээччитэ ыарахан ыйааһыҥҥа Россия чөмпүйүөнэ Петр Николаевич Калачев күүс-күдэх өттүнэн бэйэлэрин лаппа кыанар уолаттара Николай уонна Петр Калачевтар, Саха Өрөспүүбүлүкэ үөрэҕириитин салайааччылара Ян Николаевич Алексеев, Афанасий Имматулович Андреев, гиирэ спордун маастара Михаил Варламов, Саха сирин норуоттарын спортивнай оонньууларын уонна Баһылай Манчаары Спартакиадаларын мас тардыһыыга чөмпүйүөнэ Николай Барашков, Чурапчытааҕы физкультура уонна спорт институтун ректора Иннокентий Иннокентьевич Готовцев, ректор солбуйааччылара  Яков Павлович Оконешников, мас тардыһыыга аан дойду чөмпүйүөнэ Василий Алексеев, Василий Иванович Давыдов, Үөһээ-Бүлүүттэн сир-түннүгэ, бөһүлүөк, мандар уус Батас Мөндүкээн, арочнай спорт саала өһүөлэринэн трдынан эргийэн көрдөртүүр Федор Иванов, сахалыы тылы тарҕатааччы Ньургун Боотур уо.д.а  группа киэн туттуулара.

Хас ый саҥатыгар бэйэни тургутар тардыныылар буолаллар. Ким-төһөтө эбиллэн иһэрэ арылхайдык көстөр. Кэмиттэн кэмигэр ыытыллар онлайн ZOOM-кэмпэриэнсийэлэргэ кэккэ боччумнаах боппуруостар   дьүүллэһиллэллэр. Дмитрий Петрович салайааччынан биир санаанан талыллыбыта. Бөлөхпүт “SakhaLifting” ааты баһыйар үгүс куолаһынан ылыммыта. Сыл устата үгүс сэргэх кэпсэтиилэр буоллулар, хамаанданы түмэр дьаһаллар ыытылыннылар. 

Ватсаап нөҥүө сэлэһии-кэпсэтии, санаа атастаһыыта, эти-сиини бөҕөргөтүүгэ, өйү-санааны чэбдигирдиигэ туһааннаах ис куту күүһүрдэр, таба суолу тутуһарга аналлаах информациялар кэлиилэрэ үтүө үгэскэ кубулуйда. Ким-кими кытта алтыһар да оннук билиилээх-көрүүлээх буоларыныы, эбэтэр, “Эт миэхэҥ доҕорун кимин, оччоҕуна этиэм, эн кимҥин” дииллэринии, үчүгэйи, үтүөнү этэр информация үчүгэйи уонна үтүөнү эрэ түстүүр.

Сүбэ-ама биэрэр холобурдар ситимин быспакка ыытыллаллар.

Олорто биирдэстэрин бэлиэтиир буоллахха, массыына улахан саахалыгар түбэһэн илиилэрин-атахтарын, сиһин бүттэтэ суох гына алдьатан баран, санаатын күүһүнэн атаҕар турбут, уҥуох-сүһүөх институтун төрүттээбит, 150 дойдуларга институттардаах медицина доктора, профессор Сергей Бубновскай күүһү хачайдыыр хамсаныылар хаан баттааһынын намтаталларын, сүрэх-тымыр, сүһүөх-былчыҥ үлэлэрин тупсаралларын, киһи атаҕын былчыҥнарын сайдыыларын туругуттан киһи чэгиэн-чэбдик сылдьыыта тутулуктааҕын, хас биирдии киһи олоҕун сиэрэ өйтөн-мэйииттэн, күүстэн-сэниэттэн тутулларын тустарынан үөрэҕэ, ханнык да ыарыыттан хамсаныы энергията үтүөрдэр кыахтааҕын уонна чэгиэн туругу биэрэр усулуобуйаттан аккаастанар табыллыбатын, сүрүн сыал-сорук киһи доруобуйата буоларын өйдөтөр үөрэҕэ болҕомтону тардар.

Саппаҕырдар өйү-санааны оптимизмынан - үтүө, күүстээх, үчүгэй санаанан солбуйуу, саҥаны билиигэ-көрүүгэ тардыһыы, эргиччи сайдарга дьулуһуу сайдыыга тиэрдэрин, ситиһии бэйэбит илиибит иһигэр баарын, бэйэҥ хайдаҕын сиэркилэҕэ көрүннэххинэ сирэйгиттэн-хараххыттан биллэр диэн биллиилээх психолог этиитэ эмиэ оруннаах. Ыраас, көнө майгылаах, дьоҥҥо туһалаах, сүрэҕэлдьээбэт буоларга дьулуһууну, бэйэни кыанар, күүстээх-уохтаах буоларга, чөл буоларга, мөкү, быдьар быһыыны, киэр илгии олохпут сиэринэн буоларын өрүүтүн өйдөтө-саната сылдьар көнө сүрүннээх Дмитрий Петрович Захаров курдук салайааччыга түбэспиппититтэн “SakhaRestling” бөлөх хас биирдии чилиэнэ тус олоҕор табыллыбыт киһинэн ааҕынар. Ол эбэтэр, дьарыктан астыныыны-дуоһуйууну ылыы, бэрээдэги, күннээҕи режими тутуһуу олохпут сүрүн ирдэбиллэринэн буолаллар. Эти-хааны утумнаахтык эрчийииттэн көдьүүһү ылыы, былчыҥ үлэтин таптааһын, эрчимнээх клеткалары үөскэтии, күннээҕи олохтон тыҥаабыт ньиэрбэни уоскутуу, чөл турукка киллэрии – “тардыныы” бөлөх күннэтэ туттар, туһанар сүрүн быраабылаларбытынан буоллулар. Киһи сааһыттан, кимиттэн-тугуттан тутулуга суох былаһын тухары үөрэнэр, иитиллэр.

Бөлөхпүт биир сыл иһигэр дириҥ ис хоһооннонно. Сыала-соруга дьэҥкэрдэ, чопчуланна. Күнтэн-күн, дьыллар-хонуктар ааһан истэхтэрин аайы үүнэн-сайдан иһии харахха быраҕыллар. Группабыт түмсүүлээх буолуута, хардарыта сүбэ-ама бэрсиитэ, көмөлөсүһүү-өйөнсүү баара инникигэ кынаттыыллар. Быстах моһоллор, эчэйиилэр биллибэтинэн-көстүбэтинэн ааһан иһэллэр, оннук үөрүйэҕи ылбыттар атыттарга үөрэҕи үөскэтэллэр. Инники диэки баран иһиини туох да тохтоппот.

Санаа күүһэ баар эбит модун күүс. Күүстээх, эрчимнээх санааттан бэйэни кыайыылар саҕаланаллар. Дьэ, маны түстээтэ – биир сыллааҕыта тэриллибит “Тардыныы” бөлөх. Олох сайдыытын тэтиминэн “SakhaLifting” аатынан сүрэхтэммит биһи хамаандабыт кэскилэ киэҥ!

 Спортивнай формаҕытын, чэгиэн туруккутун тута сылдьыҥ!

“SakhaLifting” биир сылынан эҕэрдэ! Ситиһии эҥэрдэстин, табыллыы арыаллаатын!

Баһылай Посельскай

Поделиться:

Добавить комментарий

#Новости