Быыстапка тэрийээччитэ-көҕүлээччитэ Саха Өрөспүүбүлүкэтин спорка албан аатын Музейын дириэктэрэ, биллиилээх коллекционер, физическэй культура уонна спорт үтүөлээх үлэһитэ, улуу тренер Д.П. Коркин иитиллээччитэ, көҥүл тустууга ССРС спордун маастара Михаил Егорович Друзьянов.
Аҕа дойду сэриитигэр уонна улуу полководец И.В. Сталиҥҥа аналлаах экспонаттар болҕомтону тардаллар. Кыайыы маршалларын мэтириэттэрэ, Сталин үлэлэрэ, кинигэлэр, “Генералиссимус” диэн суруктаах уруһуйдаммыт улахан мэтириэтэ, Саха сиригэр соҕотох, дойдуга да сэдэхтик түбэһэн көрүөххэ сөп, 1949 с. тахсыбыт, улахан кээмэйдээх олус халыҥ, ыарахан ыйааһыннаах “Иосиф Виссарионович Сталин” диэн тус ыарахан олоҕун, революция кэминээҕи сэбиэскэй былаас туһугар охсуһуутун, дойдуну сайыннарбыт үлэтин, фашизмы эспит, кыайыыны аҕалбыт сүдү ис хоһоонноох, сөҕүүнү үөскэтэр кинигэ, историяны кэрэһэлиир докумуоннар, хаһыаттар, ааспыт героическай кэмнэргэ төнүннэрэллэр.
Көҥүл тустууга Олимпийскай оонньуулар чөмпүйүөнэ, аан дойду үс төгүллээх, Европа, ССРС чөмпүйүөнэ, ССРС үтүөлээх маастара Павел Пинигин төрөппүт аҕата, Дьокуускайга Национальнай байыаннай оскуоланы бүтэрбит Павел Титович Пинигин Финскэй уонна Аҕа дойду сэриилэригэр туттубут маллара, уордьаннара, мэтээллэрэ, экспонат быһыытынан аҕалан туруоруллубуттар. Аҕата туттубут малларын суолталарын, Сталин мэтириэтин ханна тиийэр да ”хамандыырым этэ” диэн мэлдьитин илдьэ сылдьарын туһунан албан аатырбыт бөҕөс киэн туттан кэпсээтэ.
Михаил Егорович Друзьянов быыстапка туһунан санаатын кытта үллэстэригэр, Арктическай улуустары өйүүр сыаллаах-соруктаах “Арктик-капитал” тэрилтэни көҕүлээн тэрийбит М.Н. Евсеевтиин, историческай наука кандидата Е.С. Шишигинниин, саха норуотун суруйааччыта Д.Ф. Наумовтыын сүбэлэһэннэр, Саха сиригэр Сэбиэскэй былаас төрүттэммитэ 100 сылыгар анаан, “Кыайыы маршаллара” диэн ааттааннар, 2022 сыллаахха аан бастаан быыстапканы көрдөрүүгэ туруорбуттарын, биэс коллекционердар кэлэн кыттыспыттарын, быыстапка улахан сэҥээриини ылбытын, билигин Ньургун Васильевич Гольдеров Сталин бөлөҕүн салайарын кэпсээтэ.
Быйыл быыстапка киэҥник хабыллыбыт. 1950 сылга диэри тахсыбыт кинигэлэр көрдөрүүгэ бааллар. Быыстапкаҕа спорт үлэһиттэрэ, чугас табаарыстара, доҕотторо ыҥырыллан кэлэн көрдүлэр. Быыстапка кэмигэр Улуу Кыайыыга аналлаах куонуруска хоһооннору аахпыт оҕолорго уонна сэриигэ кыттыбыт эһээлэрин туһунан экспонаттары аҕалан туруорбут куорат олохтоохторугар “Арктик-капитал” пресс-киинин үлэһитэ Сардаана Сивцева Махтал суруктары, бэлэхтэри туттартаата.
Юридическэй наука доктора А.Н. Ким-Кимэн, Ил Түмэн депутата, КПРФ сэкэрэтээрэ И.И. Романов, Ил Түмэҥҥэ депутааттаабыт М.С. Санников, Г.Г. Местников биһирииллэрин биллэрэн махтал тыллары эттилэр. Быыстапканы тэрийбит Михаил Егорович Друзьянов “Россия Коммунистическай партиятын идеяларын пропагандалааһынын иһин” Г.А. Зюганов илии баттааһыннаах Кыайыы 80 сыла мэтээлинэн наҕараадаланна.
Быыстапка ыам ыйын 14 күнүгэр диэри үлэлиэҕэ. “Арктик-капитал” аана аһаҕас, дойдубут историятын билсиҥ. Киһи сэҥээрэр, билиэн-көрүөн сөптөөх сэдэх матырыйааллар бааллар. Улуу Кыайыыны уһансыбыттар албан ааттара умнуллубат!
Баһылай Посельскай
