Ааспыт сыл түмүгүнэн Саха сирин бастыҥнарын, чулууларын түмэн, элбэх хаартыскалаан, “2021 олимпийскай сыл чулуулара” диэн ааттаах бэртээхэй өҥнөөх сурунаал оҥорон таһаарбыт.
Илья Ильич былырыын эмиэ, 2020 сыл түмүгүнэн маннык сурунаалы таһааран турар. Онон сырдатыы бу эйгэтигэр дьиҥнээхтик ылсыбытын көрдөрөр. Бу сурунааллары – үйэлээх өйдөбүллэр диэххэ сөп. Урут, сэбиэскэй саҕана сылларынан “Панорама спортивного года” диэн ыйынньык-сурунааллар тахсаллара. Онно спорт биирдиилээн көрүҥнэрин сүрүн көрдөрүүлэрэ, сыл бастыҥ спортсменнара бэчээттэнэллэрэ.
Син эмиэ онно сиэттэрэн И.И. Скрябин сылларынан республика спордун үйэтитэн сурунаал оҥорон таһаарара кэрэхсэниэх эрэ тустаах. Дьиҥэ, бу кини тус бэйэтин санаатынан, сүрэҕин ыйыытынан оҥорон таһаарар диэххэ сөп. Тыа сиригэр бочуоттаах сынньалаҥҥа олорор спорт бэтэрээнин бу дьарыгар, кини айар үлэтин өйүүр, күүс-көмө буолар дьон бааллара махталлаах.
Саҥа сурунаалга Д.П. Коркин аатынан физическэй культура уонна спорт эйгэтигэр Саха Республикатын Государственнай бириэмийэтин бары лауреаттара, спорт национальнай көрүҥнэригэр “Манчаары оонньуулара” спартакиада бары муҥутуур кыайыылаахтара эбии киллэриллэн биэрэн, таһаарыы ис хоһооно өссө байытыллыбыт. Спорт статистикатын, сыыппаралары-чахчылары мунньар дьоҥҥо сүрдээх туһалаахтар.
Илья Ильич маннык сурунаалларынан эрэ муҥурдаммат. Саҥа сылы көрсө спорка сыһыаннаах халандаар бэчээттэтэр буолбута хаһыс да сыла. Быйылгы, спорка баай ис хоһоонноох олимпийскай сылбытыгар хаһан, ханна, туох күрэхтэһиитэ буоларын барытын киллэрэн оҥорбут халаандарын миэхэ эмиэ эрдэ бэлэхтээбитэ.
Илья Ильич, бастатан туран, манныгы сөбүлүүр, мунньар киһиэхэ бэйэҥ таһаарыыларгын бэлэхтээбиккэр улахан махтал! Спорду дьоҥҥо-сэргэҕэ маннык тарҕатар, бастыҥ спортсменнары үйэтитэр айымньылаах үлэҕэр өссө ситиһиилэри баҕарабын.
Петр Павлов, "Дьулур5ан"
