Тоҕус хамаандаттан 111 теннисис оҕолор Россия чемпионаттарыгар путевка былдьастылар. Инникигэ эрэли түстүүр сэргэх оонньуулар буоллулар. Сүрүн судьуйанан Сахалинтан Геннадий Кан, сүрүн сэкэрэтээринэн Новосибирскайтан Надежда Пичугина, остуол судьуйаларынан Саха сириттэн үлэлээтилэр.
Остуол тенниһигэр Дальнай Восток оҕолорго чемпионатыгар Уһук-Илиҥҥи регионнар хамаандаларын бары аҕалбыттара күрэхтэһиини сытыырҕатта. Чемпионат сүрүн сыала-соруга – бастаабыт хамаандалар уонна биирдиилээн оонньууларга бастакы-иккис миэстэлэри ылаттаабыттар муус устар бүтүүтүгэр Россия оҕолорун чемпионатыгар уонна атырдьах ыйыгар Россия үөрэнээччилэрин Спартакиадатыгар сүүмэрдэнэллэр. Онон, туох-баардарынан, баар кыахтарынан күрэхтэстилэр.
Күрэхтэһии саҕаланыан аҕай иннинэ, кыайыыга суоттанар күүстээх теннисистэр кыргыттарга Бурятия уонна Приморье, уолаттарга Бурятия уонна Саха сирин хамаандаларыгар баалларын туһунан, Чурапчы Хатылытын уолаттара Изот Кривошапкин уонна Арсен Аржаков үчүгэй оонньуулары көрдөрүөхтэрэ диэн сылыктааһын баара. Саха Өрөспүүбүбүкэтин оҕолорго сүрүн тренерэ Аркадий Никифоров этэринэн, Изот Кривошапкин рейтинэ атыттартан үрдүк. Бурятиялар эрэнэр уоллара Павел Шубин иккис үрдүк рейтиннээх. Бу уолаттар финалга көрсөллөрө буолуо диэн ити уолаттары сетка үөһээ уонна аллараа туруортаабыттар.
Түөрт уолбут Кытай Хэйлунцзян провинциятыгар дьарыктаммыттара, онно ылыммыт үөрүйэхтэринэн Россия оҕолоругар куһаҕана суох көрдөрүүлэрдээхтэр. 13 саастаах Изот Кривошапкин Германияҕа норуоттар икки ардыларынааҕы турнирга боруонса мэтээли ылары ситиспитэ. Россия атын регионун уолунаан паараҕа бастаабыттара. Красноярскайга, Орехово-Зуево, Бурятия, Санкт-Петербургбуолуталаабыт Бүтүн Россиятааҕы турнирдарга бастакы-иккис миэстэлэри ылаттаабыта. Көстөрүн курдук, “выезтара” элбэх. Саха Өрөспүүбүлүкэтин спорка спорка бэлэмниир киин (дир.Егоров В.И.) уонна биирдиилээн спонсордар үбүлүүллэр. Онон, теннисис оҕолорбут үүнэллэрэ-сайдаллара үөрдэр.
Бурятия Өрөспүүбүлүкэтин эрэллэрэ 12 саастаах Павел Шубин уонна 15 с. Тимур Бадмаев Россия оҕолоругар үһүс буолан тураллар. Киин сиртэн чугас буоланнар, кэлиилэрэ-барыылара, күрэхтэһиилэрэ быдан элбэх.
Оонньууттан оонньуу аайы үчүгэй бэлэмнээхтэр, күүстээхтэр биллэн истилэр. Оҕолор бары да оонньуур техникалара тупсубута харахха быраҕыллар. Мээчиги подачалыыллара, охсоллоро, эрийэллэрэ, ыраахтан ылаллара сүрдээх. Биһиэннэрэ Бурятиялары кытта эристилэр. Атыттары тулуппаттар.
Уолаттарбыт тахсыылаахтык күрэхтэстилэр.
Изот бэркэ баран иһэн Бадмаевка 1:4 баһыйтарда. Ону сүрүн тренер Аркадий Иванов быһаарарынан, ити иннинээҕи күн киэһэ хойукка диэри оонньоон, уолбут илистибит буолуон сөп. Онон Хатылыга Геннадий Изотович Кривошапкиҥҥа бииргэ эрчиллэр уолаттарбыт – 6 кылааска үөрэнэр Изот Кривошапкин уонна 8-ка үөрэнэр Арсен Аржаков үһүс миэстэни былдьаспыттарыгар Изот 3:2 кыайыыны ситистэ. Инньэ гынан, финалга Бурятия уолаттара Павел Шубин уонна Тимур Бадмаев утарыта тахсыбыттарыгар Павел Шубин баһыйда уонна Дальнай Восток чөмпүйүөнүнэн буолла. Пааранан оонньооһуҥҥа Изоттаах Арсен бастаатылар, Бурятиялар иккис, үһүс миэстэлэри ылаттаатылар. Буккаас паараларга Изот Кривошапкин уонна Диана Пахомова (Үөһээ-Бүлүү) үһүс бириистээх миэстэлэннилэр, иккис-үһүс миэстэлэри эмиэ Бурятиялар ылаттаатылар.
Хамаанданан түмүккэ, Изот Кривошапкин, Арсен Аржаков, Владимир Печкуров, Антон Нестеров, Егор Слепцов састааптаах Саха сирэ бастакы, Бурятия Өрөспүүбүбүкэтэ иккис, Забайкальскай кыраай үһүс миэстэ буоллулар.
Кыргыттарга Үөһээ-Бүлүү Тамалакааныгар Владимир Федорович Федотовка эрчиллэр 8 кылаас үөрэнээччитэ Диана Пахомова ордук тахсыылаахтык оонньоон биирдиилээн киирсиилэргэ иккис буолла. Паараҕа Забайкальеттан Виктория Беломестныхтыын оонньооннор үһүс миэстэлэннилэр. Хамаанданан түмүккэ, Диана Пахомова, Эмилия Аввакумова, Елизавета Боброва, Елизавета Соломова, Дайаана Иванова састааптаах кыргыттар иккис буоллулар.
Сахабыт сирин теннисис оҕолоро үтүө өйдөбүлү хааллардылар. Остуол тенниһэ сайдан иһэрэ көһүннэ. Теннисис оҕолорбут муус устар ый бүтүүтүгэр Россия чемпионатыгар уонна атырдьах ыйыгар Россия үөрэнээччилэрин Спартакиадатыгар кыттар путевкалары ыллылар – уолаттар хамаанданан бастааннар уонна Диана Пахомова иккис миэстэлэнэн. Өтөрүнэн ситиһиллибэтэх ситиһии кэллэ. Сэттэ мэтээл кэллэ: икки кыһыл көмүс, икки үрүҥ көмүс уонна үс боруонса. Тренердэр Бурятияҕа баар курдук остуол тенниһин Киинин тутары туруорсаллар. Спорка баһырхай тутуулары ыытарга үөрүйэх Сахабыт сиригэр кыаллыан сөп дии саныыбыт.
Дальнай Восток чөмпүйүөннэринэн буолары ситиспит оҕолору эҕэрдэлиибит!
Баһылай Посельскай
