2021 сыллаахха “Саха сирин Олимпиадатынан” ааттанар Манчаары оонньууларын көрсө, Оонньуулары үрдүк таһымҥа тэрийэн, Бэрдьигэстээх дэриэбинэтэ дьиҥ куораттыы мөссүөннэммит. Дьокуускай куораттан 180 км айан суола олорчу асфальтанан, массыыналар улуус киинигэр балтараа-икки чааһынан тиийэллэр. Бөһүөлэк уулуссалара эмиэ асфальтаммыттар. Светофордар туруоруллубуттар. Олохтоохтор куоракка наадаларын ситэн күнүнэн эргиллэллэр. Таас тутуулар бөҕө бара тураллар. Спорка аналлаах тутуулар, стадион, балассааккалар бөһүөлэги киэргэтэллэр. Элбэх функциялаах спортивнай саала дьарыктанааччыларынан туолан ньиргиччи үлэлиир. Бэртээхэй бөһүөлэккэ нэһилиэнньэ ахсаана эбиллэн иһэрэ бэлиэтэнэр.
Бороҕоҥҥо буолар VIII Саха сирин норуоттарын спортивнай оонньууларыгар сүүмэрдиир өрөспүүбүбүкэ күрэхтэһиитин кэмигэр, муус устар 8 күнүгэр, ытыы тиирэ үөрүүлээх быһыыга-майгыга аһылларга бэлэм. Буулдьанан уонна ох саанан ытыыга аналлаах 50 миэтэрэ усталаах, 18 миэтэрэ кэтиттээх тиир аныгылыы сөҕүмэр тутуута болҕомтону тардар, сөҕүүнү-махтайыыны үөскэтэр. Бу иннинэ Дальнай Востокка Хабаровскайга уонна Бурятияҕа улахан тиирдэр бааллара биллэр. Билигин Сахабыт сиригэр Бэрдьигэстээххэ баар буолла!
Онуоха эбии, ытыыларынан уонна тустуунан дьарыктанар оҕолор олоруохтаах, 50 миэстэлээх, үс этээстээх таас интэринээт тутуута кэлэр үөрэх дьылыгар аһылларга толору бэлэм. Туох баар уута-хаара, уота-күөһэ, дизайнын өттүнэн киэргэтиллиилэрэ, спортоскуола иитиллээччилэрэ кэлэн олорор, үөрэнэр, дьарыктанар хосторо, саалалара, остолобуойдара бүүс-бүтүннүү оҕолору, үлэһиттэри көрсөргө бэлэмнэр.
Интэринээккэ Сахабыт сирин спорка дьоҕурдаах, бастыҥ оҕолоро кэлэллэрэ күүтүллэр. Универсальнай ытыы тиирэ биэс хаамыылаах сиргэ кэккэлэһэ турар. Дьарыктанар миэстэлэрэ барыта үрдүттэн – интэринээттэн комплекстара аҕыйах миэтэрэ. “Тиир сарсыардаттан киэһээҥҥэ диэри аһаҕас, ким ди кинилэри мэһэйдээбэт, астына-дуоһуйа ытыынан дьарыктаныахтарын сөп, анал бэлэмнээх тренердэр эрчийэллэр”,- диэн Олимпийскай эрэллэр оҕо спортоскуолатын дириэктэрэ Роман Романович Пахомов үөрэ-көтө кэпсиир. Оҕунунан ытыыга Константин Тимофеевич Бурцев, буулдьанан ытыыга Марк Алексеевич Никифоров, көҥүл тустууга Петр Андреевич Сивцев сүрүн тренердэринэн үлэлииллэр.
Өрөспүүбүлүкэни бүтүннүүтүн хабан, разрядтаах оҕолору ыла сатыыллар. Табыгастаах усулуобуйаҕа 5-10 кылаас оҕолоро кэлэн үрдүттэн олорон, үөрэнэн, эрчиллиэхтэрэ. Үрдүк спортивнай көрдөрүүлэри ситиһиэхтээх оҕолор кэлиэхтээхтэр. Талааннаах оҕолор түмсэн дьарыктаналларыгар, сынньаналларыгар, үөрэнэллэригэр өрөспүүбүлүкэҕэ биир бастыҥ интэринээт. Бу түөлбэҕэ оскуолалаахтар, чугастыы онно үөрэниэхтэрин сөп. Уонна Мытаах диэки барыыга саҥа үс этээстээх таас оскуола эмиэ тутулла турар, бу сыл бүтүүтэ киириэхтээх. Саҥа тутуулар оҕолор спорка сиһиилэнэллэригэр анаммыт тутуулар.
Имбэнтээр, оборудование, саҥа охтор, саалар, установкалар аҕалыллыбыттар уонна өссө кэлиэхтээхтэр. Бу иннинээҕи спортоскуола комплекса, базата бүтүннүү тустуу отделениетыгар бэриллибит. Лаппа кэҥээһин буолбут. Дьэ, кырдьык, дьоллоох оҕолор дьарыктанар сирдэрэ! Үрдүк көрдөрүүлэри ситиһии оҕолортон бэйэлэриттэн уонна тренердэртэн тутулуктаах буолуоҕа. Бачча үчүгэй объектарга көрдөрүүлэр баар буолалларыгар спортоскуола уонна интэринээт үлэһиттэрэ бигэ санаалаахтар.
Баһылай Посельскай
