Матвей Матвеев сүрүн тренердээх эдэр бөҕөстөрбүт классическай тустууга кэккэ ситиһиилэринэн үөрдэллэр. РФ алта спордун маастардара баар буоллулар. Федерация вице-президенэ Дмитрий Румович Ушницкай ылсыаҕыттан уонна Олимпийскай оонньуулар үс төгүллээх чөмпүйүөнэ Александр Карелин кэлэн алҕаабыта. Икки төгүллээх Олимпийскай чөмпүйүөн Роман Власов Дьокуускайга кэллэҕинэ хайаан да таарыйан, маастар-кылаас көрдөрөр. Онон, биллэ-көстө хамсааһын, сэргэхсийии тахсар.
Сэтинньи 12-13 күннэригэр Барнаулга маастар нуормалаах РФ үтүөлээх тренерэ А.А. Кишицкэй Бүтүн Россиятааҕы улахан дьон турнирдарыгар Амма ыччата Федор Устинов 60 кг үрүҥ көмүс мэтээллэнэн, Россия спордун маастарыгар кандидат нуорматын толордо. Бастакы тренерэ Кирилл Иннокентьевич Павлов. Былырыын кандидаты толорбут Алдан Хатыыстыырыттан Родион Степанов 55 кг уонна Үөһээ-Дьааҥы толуу ыччата Андрей Слепцов 130 кг кандидаты толорон, боруонса мэтээллэргэ тигистилэр.
Сэтинньи 17-19 күннэригэр Омскайга РФ үтүөлээх тренерэ Ю.А. Крикуха Бүтүн Россиятааҕы турнирыттан Федор Устинов 60 кг кыһыл көмүс мэтээли ылан маастары толордо. Андрей Слепцов 130 кг боруонса мэтээллэннэ.
Сэтинньи 25-26 күннэригэр Владивостокка түмүктэммит Дальнай Восток чемпионатыгар уолаттарбыт ситиһиилэрин өссө лаппыйан биэрдилэр. Федор Устинов 63 кг бастакы миэстэни ылан маастарын нуорматын чиҥэттэ. Артур Константинов (Амма) иккис, 60 кг Эбээн-Бытантайтан Семен Стручков үһүс, Мэҥэ-Хаҥаластан бырааттыы “классиктар” 72 кг Владислав Павлов уонна Сергей Павлов эмиэ иккис-үһүс бириистээх миэстэлэннилэр. Семен Стручков уонна Владислав Павлов маастарга кандидат нуормаларын толордулар. Бастакы тренердэрэ Иван Романович Филиппов.
Турнирдарга тустууктары тренер Христофор Потапов илдьэ сырытта.
Турнирдарга кыттан кэлиилэри Дмитрий Румович Ушницкай вице-президеннээх Саха Өрөспүүбүлүкэтин спортивнай тустууга федерацията, Варвара Николаевна Погодаева быраатыгар Андрей Слепцовка өйүүр-көмөлөһөр, Саина Витальевна Матвеева дириэктэрдээх “Атлетикс” спортивнай маҕаһыын, Иван Заровняев дириэктэрдээх “Солобуода” атыы-эригэн дьиэтэ, Эбээн-Бытантай улууһун дьаһалтата, Олимпийскай эрэл училище, төрөппүттэр үбүлээн улаханнык көмөлөспүттэригэр тренердэр махталларын биллэрэллэр.
Улуустартан кэлбит классик-тустууктар Матвей Матвеев уонна Рустам Аджи салайааччылардаах тренердэр илиилэригэр киирэллэр. Классическай тустууга Саха сиригэр спорт маастардарын үрдүк ааттарын Булунтан Иван Шамаев, Артур Константинов, Александр Андреев, Сергей Павлов илдьэ сылдьаллар уонна бэһис спорт маастарынан Федор Устинов буоллулар.
Эдэр бөҕөстөр маастар буола үүнүүлэрэ айымньылаах, утунаах үлэ түмүгэ.
Баһылай Посельскай
