Атах тэпсэ олорон кэпсэтии буолла. Покровскайдааҕы единоборствоҕа Олимпийскай эрэл оҕо спортоскуолатын дириэктэрэ Александр Куприянов кыттыыны ылла. Көрсүһүүнү профсоюз бэрэссэдээтэлэ Гаврил Сивцев салайан ыытта.
Өрөспүүбүлүкэ физическэй культураҕа уонна спорка үлэһиттэрин идэлээх сойуустарын салайааччыта этэринэн, бу ааспыт күһүн алтынньы ыйыгар военкомат бэбиэскэтинэн ыҥырыллыбыт уонна бэйэлэрин баҕаларынан Украинаҕа анал байыаннай дьайыыларга 13 спорт үлэһиттэрин атаарбыттар. Министиэристибэ, профсоюзнай тэрилтэ уонна спортоскуола өртүлэриттэн үбүнэн-харчынан, таҥаһынан-сабынан күүс-көмө оҥоһуллубут, дьиэ-кэргэттэрин кытта ситим олохтоммут. Күн бүгүнүгэр диэри гуманитарнай көмөлөр оҥоһулла тураллар.
Анал байыаннай дьайыыттан этэҥҥэ эргиллии, хаһан баҕарар, кэтэһиилээх уонна үөрүүлээх түгэн. Кулун тутар 14 күнүгэр Дьокуускай аэропордугар кэлбит байыастары спорт миниистирэ Леонид Спиридонов көрсөн махталын биллэрдэ, сэртипикээт туттарда. Дойдуларыгар эргиллэн кэлбит байыастар ортолоругар Покровскайдааҕы единоборствоҕа Олимпийскай эрэл оҕо спорт оскуолатын каратэҕа, тхэквондоҕа тренердэрэ, бэйэлэрин кэмнэригэр өрөспүүбүлүкэ биллиилээх спортсменнара Андрей Артамонов, Михаил Абрамов, Иван Самсонов бааллар.
Михаил Абрамов Ис Дьыала органнарыгар үлэлии сылдьан Чечняҕа байыаннай дьайыыларга кыттыыны ылбыта. Спорт ветерана. Уола анал байыаннай дьайыыларга ыҥырыллан сулууспалыы сылдьар. Эдэр-эмэн саастарыгар боксаҕа өрөспүүбүлүкэ чөмпүйүөнэ, бэстилиэтинэн ытыыга өрөспүүбүлүкэҕэ элбэхтик бастаабыта.
Андрей Артамонов Покровскай спортоскуолатыгар патриотическай иитии сэбиэтин чилиэнэ. Контакт-каратеҕа, фул-контакт каратеҕа, саньдаҕа, саватка, быраабылата суох охсуһууга уонна хапкидоҕа Сахатын сиригэр аан-бастаан суолу тэлбит спортсмен. Кыраныысса таһыгар күрэхтэһиилэргэ ситиһиилэринэн хара курдаах. Сэбиэскэй кэмҥэ профессионалларга WKA каратэҕа чөмпүйүөнэ, Ленинград куорат икки төгүллээх чөмпүйүөнэ, үгүс Бүтүн Союзтааҕы уонна норуоттар икки ардыларынааҕы турнирдар кыайыылааҕа. ССРС боруонса призера. Финляндия уонна АХШ хамаандаларын кытта матчевай көрсүһүүлэр кыттыылааҕа. Япония хамаандатын утары киирсиигэ аан дойду сүүмэрдэммит хамаандатын чилиэнэ. Аан дойду үс төгүллээх чөмпүйүөнүн Иннокентий Макаровы, Азия чөмпүйүөнэ Виталий Шадрины, Европа медалискатын Маргарита Колодезникованы уо.д.а. ииппит тренер.
Иван Самсонов Покровскай спортоскуолатын тхэквондоҕа тренерэ.
Байыастар снайпер, разведчик, артиллерист быһыытынан атын-атын чаастарга сулууспалаабыттар. Чечня Гудермес куоратыгар “спецназ университетыгар” бэлэмнэниини ааспыттар. Сахаларын сириттэн көмө оҥоһулларынан улахан махталларын биллэрэллэр. Байыастары единоборство көрүҥнэригэр үөрэппиттэр, патриотизм тыыныгар иитии-өйдөтүү үлэтин ыытан болҕомто ортотугар сылдьыбыттар. Сахалар элбэх буоланнар сэргэхтик сылдьаллар. Сытар ынаҕы туруорбат сымнаҕас майгылаах уолаттар тиийэннэр “харахтара уоттанар”, хамсаналлара-имсэнэллэрэ сылбырҕа, хамандыырдара биэрэр сорудахтарын, бирикээстэри улгумнук, дэбигис толороллорунан хайҕаналлар. “Тревожнай рюкзактарын” аттыларыгар уурунан, хаһан-ханнык баҕарар хайысхаҕа барарга мэлдьитин бэлэм буолаллар. “Боотур хаанын” илдьэ сылдьаллар.
Айылҕаҕа, булка-алка сыһыаннара, көтөртөн-сүүрэртэн, кыылтан-сүөлтэн астарын булуналлара, сатабыллара, кытаанах усулуобуйаҕа тулуурдара, толлугаһа суохтарынан, хорсуннарынан атытары сөхтөрөллөр. Сахаларын быһаҕын иилинэн, сиргэ-туомҥа сыһыаннарынан, саха итэҕэлин тутуһа сылдьалларынан, атын омуктар, олохтоохтор убаастабылларынан туһаналлар эбит.
Хомойуох иһин, сүтүктэр тахсаллар. Анал байыаннай дьайыыга бииргэ тиийбит доҕоттора-атастара “Груз-200” угуллан дойдуларыгар атаарыллалларыттан киһи хараастар.
Босхоломмут уонна урусхалламмыт куораттары, дэриэбинэлэри чөлүгэр түһэрии күргүөмнээхтик барар. Саха сирэ Кировскай куораты кытта шефтэһэн, саҥардан тутууга үлэ бөҕөнү ыытара биллэ-көстө олорор дииллэр. Олохтоох нэһилиэнньэ Россия көмөлөһөрүттэн үөрэрин, махтанарын биллэрэр.
Кэлэллэригэр бииргэ сулууспалыыр уолаттара, олохтоохтор сайыһа хаалбыттар.
Сахаларын сиригэр төннөн, этэҥҥэ эргиллэн тиийиилэригэр, ыччаты спорка уһуйуунан эрэ муҥурдаммакка, байыаннай-патриотическай иитиигэ болҕомтону күүһүрдэргэ сорудах, ыйыы-кэрдии ылбыттар. Умнууга хаалбыт начальнай-байыаннай бэлэмнэнии (НВП) сөргүтүллүөхтээҕэ күүтүллэр. Дойдуларыгар тыа хаһаайыстыбатынан дьарыктанар санаалаахтар.
Көрсүһүү түмүгэр, байыастар Украинаҕа сэрии толоонугар дэлби тэппит снаряд тоорохойун аҕалан сэрии алдьархайын өйдөбүнньүгүн быһыытынан Спорт музейыгар диэн биэрдилэр. Профсоюз аатыттан гражданскай ытык иэстэрин эрдээхтик толорбут байыастарга Махтал Суруктар туттарылыннылар.
Ити курдук, Сахабыт сирин спортсменнара инники кэккэҕэ тураллара хайҕаллаах.
Баһылай Посельскай
