Спорка солбугу бэлэмниир Өрөспүүбүлүкэ Киинин дириэктэрин солбуйааччылар Александр Николаевич Андреев, Аграфена Львовна Колесова арыаллаатылар.
Албан аатырбыт бөҕөһү Аллараа Бэстээхтэн, Чурапчы кыраныыссатыттан саҕалаан, музейынан, спорт тэрилэтэлэринэн, улуус баһылыгын 1-кы солбуйааччы Егор Афанасьевич Сивцев, ба7ылыгы солбуйааччылар Афанасий Николаевич Дьячковскай, Мария Филипповна Кронникова, депутаттар улуустааҕы мунньахтарын бэрэссэдээтэлэ Афанасий Афанасьевич Захаров, улуус физическэй культураҕа уонна спорка управлениетын начальнига Дьулустаан Васильевич Егоров, Д.П. Коркин аатынан Республиканскай оҕо спортивнай оскуола-интэринээтин дириэктэрэ Станислав Афанасьевич Захаров, оҕолорго ССРС чөмпүйүөнэ, аан дойду боруонса призера Семен Прокопьевич Макаров, Алаҕар нэһилиэгин баһылыга Иван Иванович Оконешников, далбар хотуттар, сахалыы сиэринэн-туомунан эҕэрдэлээн көрүстүлэр.
ССРС, РСФСР, Саха АССР үтүөлээх тренерэ, Саха АССР үтүөлээх учуутала Дмитрий Петрович Коркин иитиллээччитэ, оҕолорго ССРС чөмпүйүөнэ, оһуохайдьыт, тойуксут Семен Семенович Морфунов аал уоту оттон, арыылаах алаадьынан күндүлээтэ, сылгы сиэлинэн арчылаата, уохтаах кымыһынан алгыстаата. Олимпийскай чөмпүйүөн махталын биллэрдэ, салама симэниитигэр кытынна.
Чурапчы улууһун баһылыгын 1-кы солбуйааччы Егор Афанасьевич Сивцев:”Быйыл Дмитрий Петрович Коркин 95 сылыгар аналлаах дьаһаллартан биирдэстэрин ыыта турабыт. Маннык көрсүһүүлэри ыытарга эрдэттэн үлэлээбиппит. Ыччаттарбыт Олимп чыпчаалын дабайалларыгар көмө-тирэх курдук буолара саарбахтаммат”.
Д.П. Коркин биир баттаамалаах иитиллээччитэ, оройуон спордун уһуннук салайбыт, Д.П. Коркин аатынан спорка албан аат Музейын дириэктэрэ Егор Васильевич Пудов музей экспонаттарын, аан дойдуну сөхтөрбүт улуу тренер айымньылаах үлэтин-хамнаһын билиһиннэрдэ, сэдэх экспонаттары көрдөрөн сиһилии кэпсээтэ. Сослан Рамонов Улуу тренер үлэтин сөҕөн, санаатын кытта үллэстэригэр: “Дмитрий Петрович курдук тренердэр дойдуга элбэхтэрэ, кини суолун батыһааччылар элбэхтэрэ буоллар, үйэлэргэ умнуллубат, олус наадалаах уонна туһалаах дьыаланы оҥорон хаалларбытын, Россия сүүмэрдэммит хамаандатыгар сиһилии үөрэтиллэрэ, дойду тренердэрэ билэллэрэ буоллар”,- диэн эттэ.
А.И. Федотов аатынан Спортивнай Комплекс киэҥ-куоҥ саалатыгар спортоскуола иитиллээччилэрэ, тренердэр нэһилиэктэргэ баар тустуу филиалларыттан кытта кэлэн, Олимпийскай чөмпүйүөн ыыппыт маастар-кылааһыгар астына-дуоһуйа сырыттылар, улаханнык биһирээтилэр.
Улуус тустууга Федерациятын сүрүн тренерэ Альберт Гаврильевич Макаров: “Олимпийскай чөмпүйүөн бэйэтинэн кэлэн бэйэтин сөбүлүүр албастарын көрдөрө махталлаах дьыала. Оҕолор өйдөрүгэр-санааларыгар букатыннаахтык иҥиэҕэ. “Кочерга”, “миэлиҥсэ”, партерга эргитиилэри көрдөртөөбүтүн биһирээтим. Оҕолорбут ылынаннар, сүрдээх болҕомтолоохтук ити көрө-истэ олороллор. Олимпийскай чөмпүйүөннэр күн аайы кэлбэттэр, сонун. Осетияҕа элбэх түмсүүлэргэ сылдьабыт, онно тустуунан олороллор, элбэх Олимпийскай чөмпүйүөннэрдээхтэр, призердардаахтар. Тустууну олохпутун аргыһа оҥостубуттар, биһи, туһанарбыт элбэх. Биһиэхэ, тренердэргэ уонна Сослан Рамоновка бэйэтигэр даҕаны, Коркин үлэтин туһунан билэн, олус наадалаах, туһалаах көрсүһүү буолла”.
Сослан Рамонов: “Номоххо киирбит Чурапчыга кэлэммин олус астынным. Истэр этим. Оҕолор да үчүгэйдик тустарга баҕалаахтара биллэр. Баҕалаах оҕолору кытта алтыһарбыттан үөрэбин, астынабын. Өтөрүнэн өйтөн-санааттан сүппэт сырыыны сырыттым. Дьоҕурдаах оҕолор баалларын бэлиэтии көрдүм. Үчүгэй тустуук буолан тахсаллара кинилэр тренердэриттэн, төрөппүттэриттэн уонна бэйэлэриттэн тутулуктаах. Спортивнай саалаҕа элбэхтик сылдьыахтарын наада. Кылаабынайа, тустууга интэриэстэрэ сүтүмүөн наада. Талааннар ханна баҕарар бааллар. Мотивациялаах буоллахтарынан кыайыылар кэлиэхтэрэ. Чөмпүйүөн буолар инниттэн көбүөргэ элбэхтик үлэлиэххэ уонна күүһү хачайдыахха наада. Талааннаах оҕолорго ситиһии чэпчэкитик кэлэр, ол иһин сүрэҕэ суох буолааччылар. Ким сүрэҕэлдьээбэт, элбэхтик үлэлиир – ол туруоруммут сыалын-соругун ситиһэр. Баҕа санаам диэн – оҕолор күннэрин-дьылларын халтайга бараабатынар, спордунан дьарыктаннынар”.
Маастар-кылаас кэнниттэн автограф ылыыта, хаартыскаҕа түһүүлэр буоллулар.
2016 с. Бразилия киин куоратыгар Рио-де-Жанейротааҕы Олмипийскай оонньуулар, аан дойду, аан дойду Кубоктарын, Россия түрбүөннээх, ыһыылаах-хаһыылаах түһүлгэлэрин кыһыл көмүс мэтээллэрин хаһаайына Сослан Людвикович РамоновЧурапчыларга үтүө өйдөбүлү хаалларда.
Баһылай Посельскай
