Оскуола саастарыттан спортинынан дьарыктанар, спорка солбугу бэлэмниир өрөспүүбүлүкэ Киинигэр спортиҥҥа тренерэ, Россия спордун маастара “Тренер” бу ааспыт сыл алтынньытыгар мобилизацияланан анал байыаннай дьайыыларга барбыта. Инники кирбиигэ киирэн, сэрии толоонугар бааһырыыны ылан, госпиталга эмтэнэн үтүөрэн байыаннай чааһыгар төннүбүтэ. Хорсуннук сэриилэһэн, сулууспалыыр чааһыттан ый аҥардаах уоппуска ылан тапталлаах Сахатын сиригэр күүс-уох ыла, сынньана кэллэ:
“Кыайан иһэбит, ол эрээри, чэпчэкитэ суох, ыарахан. Оборонаны тутабыт, атаакаҕа киирэбит. Сүрүн доҕоруҥ – күрдьэх. Күннэтэ окуопа хастар түбүгэр сылдьабыт. Төһөнөн дириҥ да, оччонон үчүгэй. Саха сириттэн уолаттар бааллар, дойду регионнарыттан элбэхтэр. Бииргэ үлэлээбит уолаттарбынаан бииргэ тутуһан сылдьабыт. Саха сириттэн көмө кэлэ турар буолан үчүгэй. Сибээс баар. Этэҥҥэ сылдьарбыт туһугар сахалыы сиэринэн, сири-уоту аһатан күн аайы айыылартан көрдөһөбүн. Көмөлөһөр. Биһи, сахалар, айылҕаҕа сыстаҕаспыт туһалыыр. Бииргэ төрөөбүттэрбин көрөммүн олус үөрдүм. Төрөппүттэрбин улаханнык аҕынным. Бэриллибит 17 күннээх уоппускабын туһалаахтык, көдьүүстээхтик атаарар баҕа санаалаахпын”.
Спорка солбугу бэлэмниир өрөспүүбүлүкэ киинин дириэктэрин солбуйааччы Аграфена Колесова Саха Өрөспүүбүлүкэтин спорка солбугу бэлэмниир киин үлэһиттэрэ, киин дириэктэрэ батальон хамандыырынан гражданскай ытык иэстэрин толороннор, бэйэлэрин баҕа өттүлэринэн анал байыаннай дьайыыга сулууспалыылларын туһунан; улуус нэһилиэгин баһылыга Николай Аммосов нэһилиэктэн биэс ыччат-дьон сэрии толоонугар сылдьалларын, сибээһи тутуһалларын, “Тренер” позывнойдаах байыас, спортсмен быһыытынан бастыҥ ыччаттара буоларын; спортинынан дьарыктанааччылар ааттарыттан Василий Попов, Иннокентий Барашков “Тренери” оскуолатааҕы саастарыттан булт саатынан ытарга уһуйбуттарын, үөлээннээхтэринэн киэн тутталларын кэпсээтилэр.
Дьиэ-кэргэттэрин, бииргэ төрөөбүттэр ааттарыттан эдьиийэ Евдокия уолларын, оҕолорун ахтыбыттарын, күүппүттэрин, өр буолан баран көрсүбүт үөрүүлэрин, дьиэтигэр-уотугар кэтэһэ олороллорун, кылгас уоппускатыгар күүс-уох ылынарыгар, сир астаан, оттоон-мастаан күүс-сэниэ ылынан, сынньанан барарыгар баҕа санаатын эттэ. Бары көрсө кэлбит дьоҥҥо махтанна.
Спорт миниистирэ Леонид Спиридонов, миниистири 1-кы солбуйааччы Александр Бугаев уоппускатыгар кэлэ сылдьар “Тренери” анаан-минээн көрсөн, истиҥник кэпсэттилэр, “Учур” булт-алт фирма маҕаһыыныттан сөбүлүүр малын ылынарыгар сертификат туттардылар.
Ийэ дойдутун туһугар анал байыаннай дьайыыларга сулууспалыы сылдьар эр-хорсун санаалаах байыас сулууспатын этэҥҥэ түмүктүүрүгэр баҕа санаалар бастыҥнара этилиннилэр.
Баһылай Посельскай
