Таатта улууһа Манчаары оонньууларыгар бэлэмнэнэр

Улууска оперативнай штаб тэриллэн, эппиэттээхтэр анананнар, үлэ хаамыыта торумнанан былаан быһыытынан баран иһэр.

Алтынньы 24 күнүгэр Таатта улууһугар физическэй культура уонна спорт министирин солбуйааччы Гаврил Михайлович Мохначевскай салайааччылаах спорт министерствотын оробуочай бөлөҕө үлэлээтэ. Оонньуулары көрсө тутулла турар уонна тутуллуохтаах үйэлээх объектары миэстэтигэр сылдьан көрдүлэр. Ол курдук Ытык-Күөлгэ федеральнай уонна өрөспүүбүлүкэ анал бырайыагын иитинэн тутулла турар 450 миэстэлээх, 100 оҕо олорон эрэ үөрэнэр интернаттаах оскуола, элбэх функциялаах чэбдигирдэр-спортивнай комплекс, 1000 миэстэлээх стадион, Саһыл Уйалаах сиригэр тырыбыналаах ипподром, Чөркөөххө модульнай спортивнай саала курдук дьоһун тутуулар барыахтаах сирдэригэр сылдьан үлэ хаамыытын билистилэр. Түмүккэ улуус дьаһалтатыгар сүбэ мунньаҕы иилээн ыыттылар.

Бүгүн Ытык Күөлгэ тутуллуохтаах элбэх функциялаах чэбдигирдэр – спортивнай эбийиэккэ конкурсу кыайан ПК “Монтажник” бэдэрээччит буолара билиннэ. Билигин тутуу барыахтаах учаастагар эргэ дьиэлэр көтүрүллэннэр, бөҕү-саҕы таһыы үлэлэрэ түмүктэнэн эрэллэр.
Ааспыт нэдиэлэҕэ 1000 миэстэлээх стадион тутуутун конкуруһа ыытыллан бэдэрээчитинэн ПК “Монтажник” буолара биллибитэ. Хантараах уопсай сыаната 406 мөл. солк тэҕҥнэһэр. Сотору кэминэн бу икки улахан эбийиэк бастакы сыбаайаларын Бэдэрээччит ПК “Монтажник” үөрүүлээх быһыыга түһэриэҕэ.

Саҥа лицей дьиэтин бары этээһэ тутуллан түмүктэннэ, билигин сылааһынан үллүйүү, электрикатын уонна вентиляциятын таҥар үлэлэр бара тураллар. Ититэр системаҕа тардыы үлэлэр түмүктэннэхтэринэ сылааһын биэрии саҕаланыаҕа. Кыһыҥҥы өртүгэр иһинээҕи оҥоһуутун ыытыахтара. Саҥа тутуу болдьоммут кэмигэр үлэҕэ киириэҕэ.

Тырыбыналаах ипподром тутуутун бырайыактыыр-сметнай докумуоннара судаарыстыбаннай экспертизаҕа сылдьаллар. “Мин Сахам Сирэ 21 үйэҕэ” бүтүн республикатааҕы үтүө дьыала хамсааһыныгар сайаапка ыытыллыбыта.

Өрөспүүбүлүкэҕэ Манчаары оонньууларыгар анаан тутуллар эбийиэктэриттэн бастакынан Чөркөөххө модульнай спортивнай саала «Спорт норма жизни» федеральнай программанан үбүлэнэн тутуллар буолла. Федеральнай программа иитинэн тутуллуохтаах Чөркөөх саалата физическэй культура уонна спорт министерствотын бастакы эбийиэгэ буолар. Онон тутуу суолтата уонна эппиэтинэһэ улахан. Манна даҕатан эттэххэ, ааспыт планеркаҕа улуус баһылыга А.С. Бурцев Октябрьскай нэһилиэк баһылыга А.П. Семеновка, тутуу ыытыллар учаастагын бу ый иһигэр көннөрөн бэлэмнииригэр сорудахтаабыта. Бу күннэргэ тутуу матырыйаалын 80% кэллэ. Ахсынньы ыйга дылы матырыйаал 100% кэлэрэ быланнанна. Тутуу 2024 сылга түмүктэнэрэ былааннанар.

2025 сылга ыытыллыахтаах саха спордун чыпчаал бырааһынньыгар 20 тыһ. кэриҥэ ыалдьыт кэлэрэ былааннанар. Бу дьону сөптөөхтүк көрсөргө, хоннорорго улуус баһылыга А.С. Бурцев, спорт министерствотыттан оҕо элбэх функциялаах киинин тутуутун үбүлээн, спортивнай оонньуулары баттаһа үлэҕэ киирэрин туруоруста. Бу дьоһун туруорсуу боротокуолга киирэн, салгыы спорт министерствотын хонтуруолугар киириэҕэ.