Спортсменнар сарсыарда 11 чааска Модут уонна Бөтүҥ нэһилиэктэрэ быысаһар кыраныыссатыттан сүүрүүнү саҕалыахтара уонна Хатырыкка М.К. Аммосов аатынан СӨ Государственноһын историятын түмэлигэр түмүктүөхтэрэ.
— Бу сүүрүүгэ барыта 25 киһи кыттар, 6 хас киһи эстафеталаан сүүрүөхтэрэ уоннааҕылар үргүлдьү биэтэккэ тиийиэхтэрэ. Манна бэтэрээннэргэ Россия спордун маастардара, араас таһымнаах күрэхтэһиилэр кыайыылаахтара, призердара, суукканан сүүрээччилэр, классическай марафоҥҥа, марафон аҥарыгар, сверхмарафоҥҥа кыттар спортсменнар бааллар. Хатырыкка икки чааһынан тиийэргэ суоттанабыт, — диир дэгиттэр спортсмен, чэпчэки атлетикаҕа РФ бэтэрээннэргэ спордун маастара, бу сүүрүүнү бэһис төгүлүн көҕүлээн тэрийэр Ион Васильев.
Үгэскэ кубулуйбут өрөспүүбүлүкэтээҕи сүүрүүнү Нам улууһун физическэй культураҕа уонна спорка управлениета, «Модут нэһилиэгэ» МТ өйөөннөр, мэтээллэри грамоталары бэлэмнииллэр, көх-нэм буолан ыытарга көмөлөһөллөр. Сүүрүүгэ Дьокуускай куораттан, Нам улууһун «Стайер» сүүрүүнү таптааччылар кулууптарыттан ааттаах-суоллаах, биллиилээх спортсменнар, Намтан, Модуттан сүүрүүнү сэҥээрээччилэр уонна баҕалаахтар кыттыахтара. Чөл олоҕу өрө тутар Ион Ионович үгэһинэн спонсордары булан, кэпсэтиһэн спортсменнарга номинациялары, бириистэри олохтуур.
Сүүрүү физкультурнай хамсааһын 100, Комсомол 105 сылларыгар уонна модуттар «Доруобай нэһилиэк» бырайыакка кытталларынан онно ананан тэриллэр. Сүүрүүнү таптааҥ, сүүрүүнэн дьарыктаныҥ!
Касьян Олесов-Олук, Энсиэли
