Россия спордун үтүөлээх маастарын, харбааһыҥҥа XIII Паралимпийскай оонньуулар үрүҥ көмүс призерун, аан дойду, Европа элбэх төгүллээх чөмпүйүөҥкэтин, призерун, “Хотугу Сулус” уордьан кавалерын, Саха сирэ бүттүүнэ киэн туттар харбыыһытын Анастасия Диодорованы улахан спортан атаарыытын үөрүүлээх уонна долгутуулаах түгэнэ буолла.
Анастасия Диодорова, кинини улахан спорка тиэрдибит күн-күбэй ийэтэ Людмила Николаевна уонна тренерэ Наталья Викторовна Степанова дохсун ытыс тыаһынан доҕуһуолланан сценаҕа ыҥырыллан олордулар.
Маҥнайгынан эҕэрдэ тыл Саха Өрөспүүбүлүкэтин Ил Дарҕана Айсен Николаевка бэрилиннэ.
Айсен Сергеевич 20 сыл улахан спорка үрдүк көрдөрүүлэрдээх сылдьыы дьиҥ хорсун быһыы буоларын бэлиэтээтэ. Настя оҕо саастарыттан спордунан дьарыктанан Олимп чыпчаалын хайдах дабайбытын бары билэ-көрө, ыалдьа олорбуппутун, улахан үөрүүлэри аҕалтаабытын, тус-бэйэтин ыарахаттарын күннэтэ эрдээхтик туораталаабытын, аҥардас Россия иһинээҕи күрэхтэһиилэриттэн 14 кг мэтээллэрдээҕин, ол барыта уһулуччулаах үлэһит буоларын кэрэһэлиирин, сүүһүнэн, ону ааһан тыһыынчанан доруобуйаларынан хааччахтаах спортсменнарга эрэ буолбакка, доруобай да дьоҥҥо үтүө холобур быһыытынан туһанылларын, кытаанах санаатынан тус бэйэтин кыайбытын, бэйэ кыаҕар эрэли үөскэтии суолтатын; Настя курдук спортсменнар холобурдарын батыһан физкультуранан уонна спордунан дьарыктанааччылар кэккэлэрэ хаҥаан иһэрин; Настя киһи быһыытынан үтүө санаалааҕын, мэлдьитин үөрэ-көтө сылдьарын, үөрүүлэрин, ситиһиилэрин кытта өрүүтүн үллэстэрин; улахан спортан төһө да уурайдар, олоҕу атын түһүмэҕэ саҕаланан эрэрин, баай билиитэ, уопута инникитин туһаныллыахтааҕын, суолун булунарыгар Саха сирэ көмөлөһөргө бэлэмин биллэрдэ уонна Анастасия Диодорованы Ил Дархан Грамотатынан, спорка аҕалбыт ийэтин, общественнай үлэһити, волонтеру Людмила Николаевнаны Саха Өрөспүүбүлүкэтин Бырабыыталыстыбатын Грамотатынан наҕараадалаата.
Сцена эркинигэр туруоруллубут мониторга онлайн-ситиминэн Россия Паралимпийскай Кэмитиэтин Президенэ Павел Рожков эҕэрдэлээтэ. Павел Алексеевич Саха Өрөспүүбүлүкэтигэр Адаптивнай спорт тэтимнээхтик сайдарын, ону саха атлеттара Бүтүн Россиятааҕы улахан күрэхтэһиилэригэр ситиһиилэрэ көрдөрөллөрүн, доруобуйаларыгар хааччахтаах спортсмен оҕолорго уонна маассабай спорка үгүс дьаһаллар, спартакиадалар ыытыллалларын бэлиэтээтэ; өрөспүүбүлүкэ салалтатыгар, чуолаан, Аҕа Баһылык Айсен Николаев адаптивнай физкультуранан уонна спордунан дьарыктанарга, итиэннэ, аан дойду таһымнаах спортсменнары таһаартааһыҥҥа табыгастаах усулуобуйалары үөскэтэрин иһин махталын биллэрдэ; бу Россия үтүөлээх маастарын, Паралимпийскай оонньуулар призерун, аан дойду, Европа улахан түһүлгэлэрин кыайыылааҕын улахан спортан атаарыы кэрэ-бэлиэ түгэнэ ыытылла турарын; Анастасия Диодорова Россия Паралимпийскай уонна аан дойдутааҕы хамсааһынын историятыгар бэйэтин аатын киллэрбитин, мөлүйүөнүнэн аан дойду дьоно бэйэтин холобурунан батыһыннарбытын, Ийэ дойдубут киэн туттуутунан буоларын; инникитин, буолуталыыр күрэхтэһиилэргэ, Россия сүүмэрдэммит хамаандатын дьарыктарыгар элбэхтик көрсүөхтээхтэрин; бэйэтин киэҥ билиитинэн-көрүүтүн, илдьэ сылдьар сатабылын ыччаттарга, үүнэр көлүөнэҕэ тиэрдэригэр уонна саҥа саҕалыыр дьыалатыгар ситиһиилэрдээх буоларыгар эрэнэрин биллэрдэ, ситиһиилэри баҕарда.
Россия Паралимпийскай кэмитиэтин Аан дойдутааҕы отделын салайааччыта Екатерина Пронина Саха Өрөспүүбүлүкэтин Аҕа Баһылыгар, Бырабыыталыстыбаҕа, спорт Министиэристибэтигэр Россия бастыҥ спортсменнарын иитиигэ үлэ барарыгар махтанна, Адаптивнай спорт Киинэ аһылларыгар эрэлин биллэрдэ уонна Россия үтүөлээх тренеригэр Наталья Викторовна Степановаҕа Россия Паралимпийскай Кэмитиэтин Махтал Суругун Анастасия Диодороваҕа, Грамоталары Людмила Николаевнаҕа уонна Наталья Викторовнаҕа туттартаата.
Салгыы, билигин уһулла сылдьар “Диодоровтар” диэн уус-уран киинэ ааптара, режиссера Сандал Баишев тырыбынаҕа тахсан драматическай ис хоһоонноох киинэ туһунан кэпсээтэ. Киинэ Людмилалаах Алексей билсиһиилэриттэн, олимпиада иннинээҕи 2003 сылтан Анастасия улахан спорка маҥнайгы хардыыларыттан, Афинытааҕы Паралимпиадаҕа путевканы ылбытыттан саҕаланарын, көрөөччүлэр дьүүллэригэр экраҥҥа 2025 сыл муус устар ыйыгар тахсарын; киинэни устуу 2019 с. саҕаламмытын, аҕа Алексей оруолун Үүнэр Көлүөнэ Театрын артыыһа, Саха Өрөспүүбүлүкэтин үтүөлээх артыыһа Федот Львов, ийэ Людмила оруолун Саха Театрын артыыһа, Саха Өрөспүүбүлүкэтин үтүөлээх артыыһа Ирина Никифорова, 13 саастаах Настя оруолун үгүс кытаанах кастиннары ааспыт Маша Иванова,
тренер Натальи Викторовна оруолун Россия киинэтин, телевидениетин, театрын сулуһа Татьяна Арнтгольц оонньуулларын кэпсээтэ. Ол кэнниттэн “Диодоровтар” уус-уран киинэни трейлерин көрүү буолла.
Десяткин Роман Васильевич – Анастасия ийэтинэн чугас аймаҕа, биологическай наука доктора, Мэҥэ-Хаҥалас Доллутун нэһилиэгин ытык олохтооҕо, Саха Өрөспүүбүлүкэтин Ытык Сүбэтин чилиэнэ, Настя Мэҥэ-Хаҥаластааҕы ийэтин төрүттэрин Верховцевтар тустарынан билиһиннэрдэ.
Түмүк тылы этэригэр Анастасия Диодорова улаханнык долгуйан, махталын биллэрдэ. Маннык дьаһал ыытылларын күүппэтэҕин, соһуйбутун; кинини өйөөбүт, Адаптивнай спорт сайдарыгар үлэлэри ыыппыт өрөспүүбүлүкэ салалтатыгар, “ыалдьыбыт” дьоҥҥо ьарыларыгар, чуолаан, Адаптивнай спорт общественник-салайааччыларыгар Николай Николаевич Дегтяревка, Вера Петровна Душкевичка, махтанна. За 20 сыл иһигэр наһаа элбэх тэрийээччилэр, салайааччылар, миниистирдэр кэлэн ааспыттарын, киниэхэ аналлаах икки күннээх күрэхтэһиилэр тэриллибиттэрин, ыытыллыбыт дьаһаллар кини 20 сыллаах улахан спорка кыра нэһилиэстибэтин быһыытынан (наследие) хааларын, олох салҕанарын туһунан эттэ.
Үөрүүлээх дьаһал саха эстрадатын сулустарын, уус-уран самодеятельност кыттыылаахтарынан арыалланна. Уопсай хаартыскаҕа түһүүлэр, санаа үллэстиилэрэ буоллулар.
Дегтярев Николай Николаевич – Саха Өрөспүүбүлүкэтин Паралимпийскай Кэмитиэтин бэрэссэдээтэлэ: “Настя бастакы хараҥаччыбыт. Аан-бастаан 2004 с. Афинытааҕы Паралимпиадаҕа кыттыбыта. Тустаах тренеринээн Наталья Викторовналыын Настяны хайдах талан ылбытын туһунан сэһэргэстибит. Туспа историялаах эбит. Кырачаан Настенькалара илиитигэр улахан эчэйии ылан, наһаа ыарахан кэмнэр ааспыттар. Төрөппүттэрэ тапталлаах оҕолоругар улахан болҕомто уурбуттар. Душкевич Вера Петровнадоруобуйаларыгар хааччахтаахтарга Ассоциация тэрийэн, общественнай үлэни ыыппыт. Настя олус ыарахан үлэни ааспыт, мэлдьитин формаҕын тута, эрчииллэ сылдьыаххан наада. Настя көннөрү баран хаалбакка, анал күрэхтэһии ыытан, бэйэтин суолун-ииһин хаалларбыта эмиэ махталлаах. Билигин сүрүн сыал-сорук – Дальнай Востогу бүтүннүүтүн хабар Адаптивнай спорт Киинин тутуутугар баар буоларыгар үлэ барар. Эрэллээхпит”.
Анастасия Диодорова : “Наһаа долгуйдум, тыл да сатаан эппэтим, барыларыгар махтанабын барыларыгар. Мин ситиһиилэрим – барыбыт кыайыыбыт. Ааспыт 20 сыларым улахан спорка наһаа судургута, чэпчэкитэ суохтар, үчүгэй кэмнэр эмиэ бааллар. Саамай улаханнык үөрбүтүм диэн, Паралимпийскай мэтээли ылбыппыттан, аан дойдуга кыайбыппыттан. Маама уонна тренерим көмөлөрө, болҕомтолоро баар буолан спордунан ылсаммын күүскэ дьарыктанным. Тренерим Наталья Викторовна кытаанах ирдэбиллээх, биир сүрүҥҥэ тутар. Спорка мотивациялыыр, дьоҥҥо сыһыаҥҥа үөрэттэ. Хамаандабыт улахан. Барыларыгар болҕомто наада, ол судургута суох. Билигин мин дьылҕам өссө иннибэр. Бэйэбин көрдөнөбүн. Сөптөөх дьыалабын булунуом диэн эрэллээхпин. “Азия оҕолоругар” үлэлээтим. Тапталлаах Сахам сиригэр кэлэ турааччыбын. Дойдубутугар Доллу нэһилиэгин Тумулугар сайылыктаахпыт, астына-дуоһуйа ыраас салгыныгар, кэрэ айылҕатыгар сынньанабын аҕай. Хас биирдии киһи тус олоҕор сыаллаах буолуохтаах, сыалла туруорунуҥ, “мечтаайдаан”, былааннаах буолуҥ. Олору толорорго дьулуһуҥ, ыарахаттартан тохтоон хаалымаҥ. Оччоҕо барыта үчүгэй буолуо!”
Баһылай Посельскай
