Манна уон филиалларыгар спорт 12 көрүҥэр 1167 иитиллээччилээх, Егор Федорович Габышев аатынан Бороҕон оҕо спортоскуолата төрүттэммитэ 50 сыллаах үбүлүөйэ үөрүүлээх быһыыга-майгыга буолан ааста. Национальнай көрүҥнэргэ Россия уонна Саха сирин спордун маастара Готовцев Николай Николаевич дириэктэрдээх түмсүүлээх кэллэктиип тренердэргэ, физкультура учууталларыгар, инструктордарга ыыппыт маастар-кылаастара, төгүрүк остуол, спортоскуола олоҕун көрдөрөр быыстапка болҕомто киинигэр турдулар. Үбүлүөйдээх дьаһалларынан улуус оҕолоро бүтүннүүлэрэ хабылыннылар.
Сталин аатынан Москватааҕы физкультура институтун бүтэрэн кэлбит, хайыһарга Саха сирин хас да төгүллээх чөмпүйүөнэ Габышев Егор Федорович көҕүлээһининэн, 1966 сыллаахха спорт оскуола аһыллыбыта. Оччолорго бастакы тренердэринэн хайыһарга Иван Михайлович Жирков, тустууга Иннокентий Андреевич Халдеев, чэпчэки атлетикаҕа Иннокентий Васильевич Румянцев оҕолору эрчийиини саҕалаабыттара. Ботуччу ситиһиилэр бааллар. Утум салҕанар. Билигин футболга өрөспүүбүлүкэҕэ үһүс, волейболга иккис, мас тардыһыыга иккис, маска өрөспүүбүлүкэ кубогар бастакы, остуол тенниһигэр иккис миэстэлэрдээхтэр. «Азия оҕолорун» спортивнай оонньууларыгар улуус 28 оҕолоро кыттаннар 13 мэтээли, ол иһигэр, боксаҕа Петр Егоров, атах оонньуутугар Айыына Салышева, көҥүл тустууга Ринат Троев, мас тардыһыытыгар Рудольф Жирков кыһыл көмүс мэтээллэри ылаттаабыттара.
Үбүлүөйдээх тэрээһиҥҥэ тренер-преподаватель Туйаара Ларионова салайар «Энергия» үҥкүүһүттэрин бөлөҕө сиэдэрэй, тупсаҕай толоруулара үөрүүлээх түгэни киэргэтэн-тупсаран биэрдэ. Улуус баһылыга Алексей Федотов, Ил Түмэн депутата, өрөспүүбүлүкэ хайыһарга федерациятын бэрэссэдээтэлэ Семен Иванов, ХИФУ профессора, наука доктора Илья Черкашин, арыгы атыытын бэрээдэктээһин департамент уонна "Стимул" скандинавскай хаамыы салайааччыта Матвей Лыткин, оҕо спорка управлениетыттан Константин Абрамов, Зинаида Афанасьева, Саха сирин спордун историятыгар бэлиэ суолу-ииһи хаалларбыт спорт маастардара хайыһардьыт Семен Черноградскай, боксер Дмитрий Никифоров, самбист Анатолий Дьяконов, кылыыһыт Василий Румянцев, Николай уонна Римма Костроминнар, үтүөлээх тренердэр Иван, Степан Сивцевтэр уо.д.а. бочуоттаах ыалдьыттар уһуйуллан тахсыбыт спороскуолаларыгар эҕэрдэлэрин тиэртилэр.
Инники кэскили түстүүр кэпсэтиилэр буоллулар.
Улуус оҕолорун спордунан дьарыктаныыларын сүүс бырыһыаҥҥа тиэрдэргэ, ГТО нуормаларын тутар кыаҕы биэрэр тестирование киинин тэрийэргэ, физкультураҕа уонна спорка маассабаһы көҕүлүүргэ, оҕону эт-хаан өттүнэн иитиигэ үбү-харчыны үгүөрү туттарга туһуламмыт этиилэр оҥоһулуннулар.
Бастыҥнарга үтүө ааттар иҥэрилиннилэр, наҕараадалар, сыаналаах бэлэхтэр туттарылыннылар. Элбэ спорт маастардарын, өрөспүүбүлүкэ чөмпүйүөннэрин ииппит хайыһар тренерэ Дьячковскай Григорий Константиновичка иитиллээччитэ Матвей Лыткин скандинавскай торуоскалары, эмиэ бу спортоскуоланы бүтэрбит, билигин өрөспүүбүлүкэ оҕо спордугар уонна спорка солбугу бэлэмниир управление отделын начальнига Зинаида Афанасьева улуус сүүмэрдэммит хамаандатын оҕолоругар спортивнай көстүүмнэри, улуус баһылыга Алексей Федотов спортокуолаҕа «УАЗ» массыына күлүүһүн, о.д.а. кэлбит ыалдьыттар үгүс элбэх сертификаттары, дохсун ытыс тыаһын ортотугар туттардылар. Тренердэргэ махтал суруктар, анал бэлиэлэр туттарылыннылар, ол иһигэр, элбэх маастардары иитэн таһаартаабыт атах оонньуутун тренерэ Андрей Васильевич Федоровка улуус Бочуоттаах олохтооҕун аата иҥэрилиннэ.
Өрөспүүбүлүкэҕа физкультура уонна спорт сайдыытыгар боччумнаах кылаатын киллэрэр, спорка баай үтүө үгэстэрдээх Бороҕоннооҕу оҕо спорт оскуолата үүнэ-сайда, чэчирии турар аналлаах.
Баһылай ПОСЕЛЬСКАЙ, Бороҕон-Дьокуускай
