Нэһилиэкпитигэр 2016 сылы түмүктүүр тэрээһинигэр уон бастыҥ көрдөрүүлээх спортсменнарбыт таҕыстылар. Ол курдук, Николай Константинов уонна кини төрөппүт оҕолоро Намыына,Сергей Константиновтар (масрестлинг), Антон Тойтонов (хапсаҕай), Сайыына Попова (нуучча дуобата), Дьулустаан Баишев (гиирэ спорда), Рената Тимофеева (сахалыы остуол оонньуута), Айаал Охлопков (көҥүл тустуу),Олеся Слепцова (гиирэ спорда) уонна Денис Соловьев (инбэлиит оҕолорго пауэрлифтиҥҥэ «Азия оҕолорун” призера).
Бу үөрүүлээх тэрээһиҥҥэ улууспут аҕа баһылыга Александр Атласов, олохтоох нэһилиэкпит баһылыга Василий Жирков, биир дойдулаахтарбыт,спорт ветераннара – масрестлиҥҥэ Россия сүүмэрдэммит хамаандатын сүрүн тренерэ Николай Константинов, нуучча дуобатыгар сахаттан бастакы гроссмейстер Александр Азаров, Саха Республикатын спордун ветерана, волейболга СахаВА бочуоттаах маастара Анатолий Софронов, нэһилиэк спордун дьиэтин дириэктэрэ, уһун сүүрүүгэ Россия уонна Саха Республикатын спордун маастара Семен Охлопков эҕэрдэ истиҥ тылларын этэн, нэһилиэк эдэр ыччаттарыгар уонна биир дойдулаахтарыгар алгыс тылларын тириэртилэр.
Биир үтүө түгэнинэн, үөрүүлээх быһыыга-майгыга 17 спорт федерацияларын салайааччыларыгар туоһулуур дөкүмүөннэрин туттарыыта буолла. Ол курдук, нэһилиэкпитигэр аҕыйах сыллааҕыта дьоҕус авиация тэрилтэтэ аһыллан аэродром оҥоһуллубута. Манан сибээстээн, республикатааҕы ДОСААФ линиятынан Дьокуускайдааҕы общественнай тэрилтэ иһинэн "Покровитель" диэн авиационнай кулуубу кытта сүбэлэһии түһэрсэн,аны саас парашютнай спорду сайыннарар сыалтан,оҕолортон саҕалаан саҥа федерация тэриллибитин бэлиэтиир тоҕоостоох.
Анатолий Софронов – Онтуон
