Былыргы өбүгэлэрбит бэлэхтээн хаалларбыт сахалыы илии-атах оонньууларыгар, күүстээх-күдэхтээх боотурдар, кус-быһый уоланнар күөн-күрэс былдьаһыыларыгар, сымса-түргэн-тарҕан туттунуулаахтар кыайыылары ситистилэр. Сүрүн бириистэр бэйэлэрин аналларын буллулар.
Оҕунан ытыыларга “Байанай бэлэҕэр” сахалыы төрүт оҕунан ытыы күрэҕэр 15 эр киһи, 5 дьахтар кыттыбыттарыгар, эр дьоҥҥо “куобаҕы”, “куһу”, “тииҥи табыыларга” 33 очколаах Бүлүү бэргэн ытааччыта Николай Васильев бастаата. Бүлүү ыччаттара университет студена Никита Николаев, Алдантан кэлэ сылдьар Филипп Соловьев бириистээх миэстэлэргэ тигистилэр; дьахталларга 38 очколаах Уус-Алдантан Мария Федорова, Бүлүүттэн төрүттээх университет студенката Наталья Трофимова, Людмила Кириллина иккис-үһүс миэстэлэргэ тигистилэр. Муҥутуур бастыыр иһин ытыыларга Филипп Соловьев тэҥнээҕин булбата. Тимир-мас уустара саха оҕун оҥорон сыал ытыыга күрэхтэсппиттэригэр ааспыт Олоҥхо ыһыаҕын кыайыылааҕа Чурапчыттан Павел Попов кыайыыны ситистэ. Иккис миэстэҕэ Уус-Алдантан Роман Готовцев, үһүскэ Амматтан Александр Терентьев таҕыстылар. Бэйэ оҥорбут оҕунан ырааҕы ытыыга Павел Попов ыппыт оноҕоһо 184 м 70 см кыырайа көтөн бастаата.
Быйылгы Олоҥхо ыһыаҕын илии-атах оонньуулара Бэрдьигэстээххэ буолар Манчаары оонньууларыгар бэлэмнэнии быһыытынан буолан аастылар. Онон бу Аанньаах хочотугар күөн-күрэс былдьаһыыларга кэлэн кыттыыны ылбыттарга уонна олохтоох Өлүөхүмэлэргэ улахан сэргэхситиини таһаарбыттара саарбахтаммат. Ордук үүнэр эдэр көлүөнэ ыччат спорт сахалыы көрүҥнэрин сөбүлүөҕэ, дьарыктаныаҕа диэн баҕа санаабытын, эрэлбитин тиэрдэбит. Сахалыы спорт көрүҥнэрэ олус умсугуулаахтар, киһи эт-хаан, өй-санаа өтүүнэн буһуутугар-хатыытыгар биэрэрэ үгүс. Күрэхтэһиилэри ыытарга бары кыахтары үөскэппит Өлүөхүмэ дьонугар-сэргэтигэр махтал буоллун!
Эһиил Үөһээ-Бүлүүгэ буолар Олоҥхо оонньууларыгар көрсүөххэ диэри!
Баһылай Посельскай
Бэс ыйын 25-27 күннэрэ, 2021 сыл.
Өлүөхүмэ куората
