Бүлүү, Горнай, Мэҥэ Хаҥалас, куораттан “Аргыс”, “Виктория”, “Туймаада”, “Урожай” волейбол кулууптарын спортсменнара күөн көрүстүлэр. Бастакы миэстэҕэ “Урожай” хамаандата таҕыста. “Аргыс” – иккис миэстэ. Биһиги, “Оленск” хамаанда, үһүс миэстэҕэ тигистибит.
Хамаандабыт састаабыгар Бүлүү куоратын чиэһин көмүскээтилэр Валентина Львова, Розалия Нюрбинцева, Августина Павлова, Наталья Доранова, Татьяна Протопопова, Николай Гоголев, Константин Прокопьев, Вячеслав Прокопьев, Александр Корякин, Николай Саввинов.
Валентина Львова уонна Константин Прокопьев “Бастыҥ көмүскээччи” аатын ылбыттарынан итии-истиҥ эҕэрдэбитин тиэрдэбит.
Августина Павлова сүрүн бириис хаһаайката буолбутунан эмиэ эҕэрдэлиибит.
Күрэхтэһии сүрүн судьуйата – Василий Эверстов, тэрийээччи – “Урожай" ВК бэрэссэдээтэлэ Виталий Никитин. Кыайыылаахтарга кубоктар, мэтээллэр уонна анал бириистэр – тыа хаһаайыстыбатын ас-үөл бородууксуйата туттарылынна.
Күрэхтэһиигэ кэлэрбитигэр тэҥҥэ эрчиллэр биир дойдулаахпыт Николай Осипов хомоҕой тылынан хоһоон хоһуйан, ис иэйиитин бу курдук эппитэ.
Хотууттан хотууга дьулуһар
Эрдьигэн эр бэрдэ уолаттар,
Кыайыыттан кыайыыга дабайар
Эрчимнээх нарын куо далбардар!
Хотойдуу хотоойу санаанан,
Хоодуоттук-хорсуннук турунуҥ!
Хайаан да ситиһии туһа диэн,
Хатыһыҥ! Дьулуһуҥ! Тулуһуҥ!
Розалия НЮРБИНЦЕВА,
Бүлүү куората
