Тохсунньу 14-15 күннэригэр, Александр Федотов аатынан ыспартыыбынай уораҕайга СӨ физическэй култуураҕа уонна успуорка үтүөлээх үлэһитэ, РФ физическэй култууратын туйгуна, СӨ үөрэҕириитин туйгуна Николай Петрович Федоров сырдык кэриэһигэр өрөспүүбүлүкэтээҕи оҕолорго волейбол турнира түмүктэннэ.
Улуус баһылыга Степан Саргыдаев, хара маҥнайгыттан оҕо успуорда сайдарыгар болҕомтону уурбута үтүө саҕалааһыннардаах буолла. Икки күн устата сэттэ улуустан 16 хамаанда, ол иһигэр Дьокуускай куораттан үс уонна Өлүөхүмэ курдук ыраах сиртэн кэлэннэр уопсайа – 20 хамаанда, 190 кыттааччы ол иһигэр аҥардас Чурапчы улууһуттан 40 үөрэнээччи күрэхтэстилэр. Манна уолаттарга 9 хамаанда оттон кыргыттарга 11 хамаанда иккилии бөлөххө арахсан Чурапчытааҕы судаарыстыбаннай физическэй култуураҕа уонна успуорка үнүстүүтүн манеһыгар, Семен Новгородов аатынан Чурапчы орто оскуолатын уонна Александр Федотов аатынан ыспартыыбынай уораҕай былаһааккаларынан тарҕанан бэрт сэргэх оонньууну көрдөрдүлэр. Бэҕэһээ тыҥааһыннаах уонна быһаарсыылаах полуфиналлар, финаллар буолуталаатылар.
Уопсай түмүккэ, уолаттарга тоҕус хамаандаттан:
1 миэстэ – Чурапчы 1-кы хамаандата;
2 миэстэ – Таатта улууһа;
3 миэстэ – Амма улууһа.
Кыргыттарга уон биир хамаандаттан:
1 миэстэ – Чурапчы 1-кы хамаандата;
2 миэстэ – Өлүөхүмэ куората;
3 миэстэ – Амма улууһа.
“Түгэнинэн туһанан тэрийээччилэргэ күрэхтэһиибит кыайыы көтөллөөх түмүктэммитинэн төлөннөөх эҕэрдэбитин тиэрдэбит. Кыайыылаах хамаандаларга уонна тириэньэрдэргэ Саргылана Семеновнаҕа, Альберт Павловичка, Семен Юрьевичка өссө төгүл дьарыктарын утумнаахтык, тиһигин быспакка дьарыктааннар ситиһии кэлэ турдун. Кинилэри сэргэ күрэхтэһии кылаабынай судьуйатыгар Владислав Николаевичка, сүүрэн-көтөн күрэхтэһии үрдүк таһымҥа барарыгар үтүө кыһамньытын биэрбитигэр дириҥ махталбытын тиэрдэбит”, - диэн Чурапчы улууһун үөрэҕин управлениетын иитэр үлэҕэ салаата алгыһын тиэрдэр.
Источник: "Сана Олох"
