Күрэхтэһиини үөрүүлээх быһыыга-майгыга Саха Өрөспүүбүлүкэтин физическэй культураҕа уонна спорка миниистирин солбуйааччы Гаврил Мохначевскай, физкультура уонна спорт үлэһиттэрин профсоюһун бэрэссэдээтэлэ Гаврил Сивцев, комплекснай Спартакиада сүрүн судьуйата Ариан Тарасов, волейболга өрөспүүбүлүкэ сүрүн тренерэ, күрэхтэһии сүрүн судьуйата Константин Гаврильев эҕэрдэ тыллары этэн астылар.
Саха Өрөспүүбүлүкэтин үлэҕэ кэлэктииптэрин комплекснай Спартакиадаларын икки төгүллээх кыайыылаахтара физкультура уонна спорт үлэһиттэрин 100-кэ оонньооччулардаах дьахталларга уонна эр дьоҥҥо тоҕустуу хамаандалара икки бөлөххө хайдыһан, үс балассаакканан күрэхтэстилэр. Икки күннээх киирсиилэр түмүктэринэн дьахталларга Айыына Жерготова, Екатерина Попова, Изабелла Массаева, Лилия Петрова, Ольга Николаева, Сардаана Прокопьева, Клавдия павлова, Раиса Негнюрова састааптаах уонна эр дьоҥҥо Айсен Жерготов, Семен Ядрихинскэй, Николай Кейментинов, Владислав Попов, Семен Васильев, Павел Обутов, Эдуард Дьяконов оонньооччулардаах Намнар бастаатылар, дьахталларга физкультура уонна маассабай спорт управлениета иккис, “Эллэй Боотур” (кыһыҥҥы көрүҥнэр), “Чолбон” (харбааһын) холбоһуктаах хамаандалара үһүс; эр дьоҥҥо “Триумф” (сүүмэрдэммит хамаанданы бэлэмниир киин) иккис, физическэй культура уонна спорт управлениета үһүс бириистээх миэстэлэргэ тигистилэр.
Семен Васильев (Нам), Айыына Жерготова (Нам) “Бастыҥ кимээччи”, Денис Шестаков (“Триумф”), Тамара Аммосова (маассабай спорт управлениета) “Бастыҥ көмүскээччи”, Гаврил Захаров (маассабай спорт управлениета), Наталия Иванова ( “Эллэй Боотур”, “Чолбон”) “Туһалаах оонньооччу” анал бириистэринэн биһирэннилэр.
Нам хамаандатын хапытаана, Олимпийскай эрэл оҕо спортсокуолатын волейболга отделениетын сүрүн тренерэ Айсен Жерготов: “Волейболга аналлаах оскуолалаах буоламмыт кыайыахтаахпытын кыайдыбыт. Фавориттар этибит. Волейбол тренердэрэ бэйэлэринэн оонньооннор оонньуу хаачыстыбатын тупсаран биэрдилэр. Салайааччыларбыт спортоскуолабыт дириэктэрэ Семен Ядрихинскэй, үөрэххэ дир.солбуйааччы Раиса Негнюрова хамаандабыт түмсүүлээҕин көрдөрдүлэр, үс волейбол тренердэрэ хаачыстыбаны тупсардылар, атах оонньуутун маастара Владислав Попов төбөтүнэн сиэккэттэн быга сылдьан, эдэр тренер Семен Васильев, өрөспүүбүлүкэ чөмпүйүөнэ Павел Обутов кыахтаахтык оонньоотулар.
Эр дьон финаллара сүрдээх сытыытык ааста. Маҥнай утаа, Намнар кыайалларыгар бүк эрэмньи санаа баара. Дэлэҕэ, биир да хотторуута суох иһэр Нам хамаандатын сүрүн тренерэ Айсен Жерготов: “Туох-айылаах чуумпутай?”,- диэн бэккиһээн саҥа аллайыа дуо. Ону эрэ күүппүт курдук, “Триумф” хамаандатын салайааччыта, көҥүл тустууга ССРС үс төгүллээх призера Михаил Ноговицын ыһыытаан-хаһыытаан, ыйан-кэрдэн, хамаандалаан, оонньуу күүрээнин үрдэттэ. Өрөспүүбүлүкэ таһымнаах оонньооччу, Амма волейболга оскуолатын иитиллээччитэ Денис Шестаков күүстээх охсууларынан биир партияны ыла сырыттылар. Сэргэхсийии буола сырытта. Намнар бодолорун тардынан, хомуллан оонньооннор кыл-мүччү кыайдылар. Чахчы, кыраһыабай киирсии буолла!
Физкультура уонна спорт үлэһиттэрин комлекснай Спартакиадалара бу сыл ахсынньы ыйга түмүктэниэҕэ.
Баһылай Посельскай
