Ол курдук дуобат 50-тэн тахса араас көрүҥэ норуоттарга баара биллэр. Кини араас көрүҥүттэн аан дойдуга саамай сэҥээриини ылбыт 100 харахтаах (французскай) буолар.
Дмитрий Сыромятников-Кэрэһиннээх сахалартан бастакынан дуобакка аан дойдутааҕы кылаастаах судьуйа буолбута. Дмитрий Васильевич- чөл олох, успуорт ахсаабат пропагандиһа, Саха республикатын физическай культураҕа уонна успуорка үтүөлээх үлэһитэ, Мэҥэ-Хаҥалас улууһун Бочуоттаах олохтооҕо, РФ үөрэҕириитин туйгуна, биллиилээх коллекционер буолар. Бу күннэргэ кини бирииһигэр өрөспүүблүкэ бэтэрээннэрин ортотугар үбүлүөйдээх ХХV-c төгүлүн тэриллэн Дьокуускайга дуобат- саахымат киинигэр барда. Манна 11 улуустан 43 дуобатчыт кытынна. Кинилэр истэригэр 8 успуорт маастара бааллар.
Күрэхтэһии үөрүүлээх аһыллыытыгар Ил Түмэн депутата Андрей Находкин эҕэрдэлээтэ уонна Бочуотунай грамоталары Михаил Петровка (Мэҥэ-Хаҥалас), Розалия Егорова (Нам), Николай Саввиновка (Дьокуускай), Дмитрий Сыромятниковка-Кэрэһиннээх туттарда. I Наахара нэһилиэгин баһылыга Алексей Григорьев, I Мэлдьэхси нэһилиэгин баһылыга Валерий Никифоров нэһилиэк Бочуоттаах олохтооҕо бэлиэ знактары Дмитрий Сыромятниковка туттардылар. Бу тэрээһини СӨ дуобакка Федерациятын Президенин солбуйааччы Юрий Никифоров салайан ыытта.
Эр дьоҥҥо 33 киһиттэн биллиилээх маастар Валерий Хорин эрэллээхтик бастаата. Иккискэ Дьокуускайтан Николай Жирков, үһүскэ Бүлүүттэн Бороҕон нэһилиэгин баһылыга Андрей Иванов таҕыстылар. 70 саастан үөһээ ветераннарга Василий Куприянов (Мэҥэ-Хаҥалас), Николай Саввинов (Дьокуускай), Дмитрий Сыромятников-Кэрэһиннээх (Мэҥэ-Хаҥалас) бириистээх миэстэлэри ыллылар.
Дьахталларга 10 дуобатчыт оонньоото. Бастакы миэстэни тоҕустан тоҕус очкону ылан Мария Бырдыннырова (Дьокуускай) инникилээтэ. Иккискэ Намтан Акулина Беляева, үһүскэ Чурапчыттан Анастасия Собакина тахсары ситистилэр.
100 харахтаах дуобаты таһынан аны «Кэрэһиннээх дуобата» -«Кэрэ-дуо» түһүлгэтэ 7-с төгүлүн тэриллэн ыытылынна, 18 киһи кытынна. Эр дьоҥҥо Николай Климентов (Мэҥэ-Хаҥалас) холкутук бастаата, анал кубогынан, сыаналаах бирииһинэн наҕараадаланна. Биир дойдулааҕа Михаил Петров иккис, Иннокентий Ефимов (Верхоянскай) үһүс буоллулар. Дьахталларга Акулина Беляева инникилээн анал кубок, иистэнэр массыына хаһаайына буолла. Анастасия Собакина, Павлина Дорофеева (Дьокуускай) иккис, үһүс буоллулар.
Күрэхтэһии сабыллыытыгар маассабай успуорт управлениетын саҥа салайааччыта Роман Оконешников ветераннары истиҥник эҕэрдэлээтэ. Кыттааччылар күрэхтэһии үрдүк таһымҥа барбытын, элбэх сыаналаах бириистэр оонньоммуттарын бэлиэтээтилэр. Дмитрий Васильевич сүрүн тэрийээччилэригэр барыларыгар, ол иһигэр улуус физкультураҕа уонна успуорка управлениетын начаалынньыгар Константин Захаровка, управление исписэлииһигар Виталий Пестряковка, күрэхтэһии бары спонсордарыгар, кыттааччыларга күүс-көмө, тирэх, өйөбүл буолбуттарыгар Махталын биллэрдэ.
Степан Андреев, Майа с.
РФ сурналыыстарын сойууһун чилиэнэ
