Дьокуускай куоракка өтөрдөөҕүттэн үлэлиир Ф.И. Авдеева аатынан Оҕо Айымньытын Дыбарыаһын үөрэтэр корпуһугар алтынньы 23 күнүгэр оҕолор дуобакка күрэхтэстилэр.
Өрөбүллэри көтүппэккэ күрэхтэһэллэр.Сүрүн сыал-сорук “юношескай” разряды толоруу. Бу сырыыга күрэхтэһии Саха Өрөспүүбүлүкэтин үөрэҕин туйгуна, тренер Акулина Гаврильевна Беляева үбүлүөйдээх 65 сааһыгар ананна.
Аан дойду, Европа, Россия чөмпүйүөннэрин иитэн-үөрэтэн таһаартыыр тренер Акулина Гаврильевна Беляева Бүлүү Хампатыттан төрүттээх-уустаах, оҕо эрдэҕиттэн Намҥа олохсуйан, дуобакка уонна саахымакка уһуйуллубута. Магадааннааҕы пединституту бүтэрэн математик идэлээх. Учууталлыырын таһынан дуобат уонна саахымат куруһуоктарын үлэлэппитэ. Ити сөбүлээн дьарыктанар көпүҥнэригэр Нам улууһугар, Магадан институтугар уонна Сахатын сиригэр элбэхтик бастаабыта, миэстэлэспитэ. Билигин пенсияҕа тахсан, куоракка Оҕо Дыбарыаһыгар тренердиир. Дуобат иккис идэтинэн буолла. “Нуучча дуобатыгар” уонна “Сүүс харахтаахха” дэгиттэр оонньооччу. Тус бэйэтэ ылаттаабыт 100-тэн тахса мэтээллэрэ, грамоталара, дипломнара, чемпионскай лиэнтэлэрэ спорка олоҕун байытан-тупсаран биэрэллэр. Нам саахымат сайдыбыт улууһа. Дойдутун дьоно Бүлүүлэр, дьэ “булан” ыланнар Бороҕоннооҕу Саха сирин норуоттарын спортивнай оонньууларыгар саахымат хамаандатыгар уонна өрөспүүбүлүкэ ветераннарын Спартакиадатыгар киллэрэн оонньоппуттарыттан сүрдээҕин үөрэр, киэн туттар. Бу ааспыт өрөбүлгэ өрөспүүбүлүкэ ветеран-дьахталларыгар “100-харахтаах” дуобакка, үтүөлээх тренер Мария Никитична Бырдыннырова бастаата, Акулина Беляева иккис, Чурапчыттан Анастасия Собакина үһүс буоллулар.
Онон, соло булбат, көхтөөх олоҕунан олорор.
Үлэлээбитин былаһын тухары бэрт элбэх улахан таһымнаах дуобаччыт оҕолору иитэн-үөрэтэн таһаартаата. Кинилэр ортолоругар бааллар: Саха Өрөспүүбүлүкэтин, Россия, Европа, аан дойду чөмпүйүөннэрэ, призердара Данил Ермолаев, Влад Егоров, Айыына Протопопова, Витя Степанов, Коля Попов, Николаев Егорка, Колесова Виталина, Перевалова Алена, Кириллина Айна, Быкина Вика, Николаев Байдам, Оконосова Айталина, Саввинов Айаан, Афанасьева Сандаара, Мартынов Всеволод, Федоров Дьулустаан, Алексеев Саша, Тимофеев Айаар, Скрябина Ангелина, Барахов Айсен, Скрябина Аня, Кириллин Максим, Махатырова Нарыйаана, Александров Степа, Прокопьев Гаврил, Ильин Вася, Дормидонтов Айсен, Габышев Айтал, Манжула Саша уо.д.а.
Оҕолор детсад саастарыттан дьарыктаналлар. Холобур, Саша Алексеев биэс саастааҕар тобугар олорон задачалары суоттуура, оҕолорго өрөспүүбүлүкэҕэ бастаабыта. Дьоҕурдаах оҕону бэлиэтии көрөннөр 5 № спортоскуолаҕа ылбыттара. Маҥнай утаа, Акулина Гаврильевна соҕуруу буолар күрэхтэһиилэргэ оҕолору бэйэтэ илдьэ барара, кэлин Вячеслав Павлович Варламов, Иван Олегович Павлов илдьэттииллэр. Оҕолор бардаллар эрэ “илии тутуурдаах, өттүк харалаах кэлэллэр”.
Көрдөрүүлэр сыл аайы эбиллэн иһэллэр.
Билигин Оҕо Айымньытын Дыбарыаһыгар 300-кэ оҕо саастарынан түөрт бөлөххө дуобатынан дьарыктанар. Тренердэр Иван Олегович Павлов, Айаал Владимирович Саввинов), Альбина Алексеевна Большакова, Вячеслав Павлович Варламов орто уонна улахан саастаахтарга, Акулина Гаврильевна Беляева кыра саастаахтарга 80-лыы оҕолордоохтор. Былааннара элбэх.
Бу үбүлүөйгэ анаммыт турнир 5-7, 8-9 уонна 10 саастаахтарга ыытылынна.
Акулина Гаврильевна эрчийэр кыра саастаах бөлөх уолаттарыгар Габышев Эрхан, Цой Илья, Бучугасов Андриан, кыргыттарга Кузьмина Лиза, Дроздович Наташа, Чирикова Ариана; орто белех уалаттарыгар Макаров Максим, Захаров Дамир, Большаков Саша, кыргыттарга Потапова Марина, Кычкина Амелия, Матвеева София; улахан уолаттарга Васильев Артур, Васильев Тимур, Халгаев Айсиэн кыайыы үөрүүтүн биллилэр, “юношескай” разряды толортоотулар.
Максим Макаров дуобат оонньуута толкуйдуурга, болҕомтолоох буоларга үөрэтэрин иһин сөбүлүүрүн, Наташа Дроздович дуобаты сөбүлүүрүн, улааттаҕына парикмахер буолар баҕалааҕын, Эрхаан Габышев күрэхтэһэрин сөбүлүүрүн, тренердэрин Акулина Гаврильевнаны үчүгэйдик үөрэтэрин иһин таптыылларын кэпсээтилэр.
Евдокия Семеновна Иванова бэрэссэдээтэллээх, Нина Петровна Николаева, Гаврил Гаврильевич Уваровскай чилиэннэрдээх төрөппүт кэмитиэтэ кыайыылаахтарга уонна миэстэлэспиттэргэ кубоктары, өйдөбүнньүк мэтээллэри, дипломнары туттардылар. Бары кыттыыны ылбыт дуобаччыттар Акулина Гаврильевна илиититтэн кыттыбыттарын туоһулуур сертификаттарынан уонна “вкусняшкаларынан” наҕараадаланнылар.
Үбүлүөйдээх сааһын туолбут тренергэ эҕэрдэлэр этилиннилэр, сибэкки дьөрбөтө туттарылынна. Түгэнинэн туһанан дэгиттэр дьоҕурдаах дуобаччыты-саахымаччыты, тренери Акулина Гаврильевнаны эҕэрдэлиибит!
Баһылай Посельскай
