Муус устар тохсус күнүгэр Амма улууһугар, Д.Н. Трифонов аатынан «Муона» ипподромҥа сааскы ат сүүрүүтэ буолан ааста

Манна Чурапчы, Горнай, Мэҥэ Хаҥалас, Уус Алдан, Таатта, Амма «Давидофф» уонна «Строд» хамаандалара  кыттыыны ыллылар. 

Ол курдук, уопсайа 7 сүүрүү буолла:

Бастакы сүүрдүү 1600 миэтэрэҕэ, Амма улууһун Бөтүҥ нэһилиэгин ат баайааччыта Николай Михайлович Петров аатынан бириис турда. Манна Чурапчы ааттааҕа, Ил Дархан 3 төгүллээх кыайыылааҕа Майн Кёниг (Майншафт — Тзе Куин Стемп) тэҥнээҕин булбакка, биэтэккэ бастаан кэллэ. Кини бириэмэтэ – 1,47,56 (сүүрдээччи Анатолий Куличкин, тренерэ Дмитрий Осипов).

Иккис кэлбит горнайдар эрэллэрэ Райзинг Кинг (Орб — Он Тзе Сэйм Пейдж) 1,48,06, сүүрдээччи Владимир Яндреев, тренер Эдуард Варламов уонна бочуоттаах үһүс миэстэҕэ Свидетель Барс Амма улууһун «Давидофф» хаһаайыстыба 1,49,56, сүүрдээччи Евдокимов, тренерэ үрдүк категориялаах ат баайааччы, мадьыны Анатолий Баишев.

1600 миэтэрэҕэ «Амма» совхоз сылгыһыта Иван Николаевич Новиков аатынан иккис сүүрүү ыытылынна.

Бастакы миэстэни  «Давидофф» хаһаайыстыба ата Йортен (Шторм Шептер — Фэнтесист) бириэмэтэ – 1,49,16, иккискэ Тааттаттан Голд Фарт (Форевер Олигарх — Дидактика) 1,52,79, сүүрдээччи Геннадий Мордовской, тренер С.Васильев, үһүс  миэстэҕэ Борисоглебск (Баритон — Кампэйн) Горнай улууһа, 2,06.

Сылгыһыт, «Строд» хаһаайыстыба тренерэ Гаврил Михайлович Семенов аатынан бириис, үһүс сүүрүү маннааҕы төрүөх аттарга ананна.

Бу дистанцияҕа сэттэ ат илин-кэлин түһүстэ. Бастаан кэллэ Блэк Грек (Бабар — Госпожа Березуцкая) 1.55´02, Амма «Давидофф», иккис Галилей (Франциско Гоя — Бурда) Амма, «Строд» 1.55´7, сүүрдээччи Иннокентий Иванов, үһүс Атланта (Бабар — Алина) Мэҥэ-Хаҥалас улууһа, маастар сүүрдээччи Егор Оконешников.

Төрдүс сүүрүү 3 саастаах тиҥэһэлэргэ Болугур нэһилиэгин сылгыһыта, тренерэ Гаврил Николаевич Непомнящий аатынан бириис. Горнай улууһуттан Максимус Тайм (Йорк Тайм – Эйр Эджин) кыайда 1,53´03, иккис Франка (Франциско Гоя — Аркана) 2,03,06, үһүс Амматтан Громобой – 2,06,67.

10000 миэтэрэҕэ сиэнчэрдэргэ сүүрдүү, кыайыылаах Дохсун, Таатта улууһуттан, бириэмэтэ – 16 мүнүүтэ 47 сөкүүндэ. Иккис Мэҥэ Хаҥаластан Уолчаан 16,53´04, үһүс миэстэҕэ Мэҥэ Хорсуна – 17,31,03.

Кэлэр сүүрүүгэ 1600 миэтэрэҕэ Аммаҕа төрөөбүт саха аттарыгар ыытылынна. Манна бастакы миэстэҕэ Барон (2,13’20), иккискэ Чолбон (2.17’2), үһүскэ Кэрэ Сиэр (2.23) таҕыстылар.

Уонна бүтэһик, сэттис сүүрүүгэ 4800 миэтэрэҕэ Уус Алдан Арчыта тэҥнээҕин булбата.

Ат сүүрдүүтүн сэҥээрээччилэрин, бу үөрүүлээх тэрээһин ыытыллыбытынан итиитик-истиҥник эҕэрдэлиибин!

Кэлэр сүүрүү ыам ыйын 9 күнүгэр Арктикатааҕы университет ипподромугар буолара бигэргэтилиннэ.

Ангелина Посельская.

Катя Дмитриева хаартыскаҕа түһэриитэ.

Поделиться:

#Новости