Бу олох соторутааҕыта Мэҥэ Хаҥалас улууһун Хара бөһүөлэгин уола Вася Егоров Аан дойдуга Россия аатыттан кыттан үрүҥ көмүс мэтээли боксаҕа ылан төрөөбүт сахатын норуотугар бэлэх уунна уонна 2016 сыллаахха Бразилияҕа буолар Олимпийскай оонньууларга кыттарга именной путевка ылары ситиһэн биһигини олус диэн үөртэ, эрэлбитин өссө күүһүртэ. Маладьыас, оонньуур тактикаҥ, стилиҥ, кимэн киирииҥ дохсуна, хорсуна, биир-икки охсуунан бүтэн, тохтоон хаалбата киһини астыннарар, үөрдэр. Спорка, олоххо ситиһиини, доруобуйаны баҕаран бу хоһоону эйиэхэ аныыбын.
Улахан үөрүү!
Саха омук аатыттан
Арассыыйаны, Дьобуруоппаны
Уҥуор-маҥаар дайбаата,
Кыайыы суолун солоото.
Улаханнаах бу хардыы
Кини кыаҕын көрдөрдө,
Инникигэ эрэли
Норуотугар иҥэрдэ.
Аан дойду ааттаахтарын
Тэбис тэҥҥэ кииристэ,
Барыларын, үксүлэрин
Сабырыйар дуу диигин.
Оскуолата, кылааһа
Кыра оҕо сааһыттан,
Үөрэтиллэн, такайыллан
Сөптөөх суолу булбуттар.
Мэҥэ сирин Харатыттан
Манчаарылыы сураҕыр,
Хорсун, хоодуот кимиигинэн
Түөрт муннугу баһылаа!
Спорт үрдүк чыпчаала –
Олимпийскай оонньуулар,
Онно кыайан биир эмит
Мэтээл тиксиэн баҕарабыт!
25.10. 2015 с.
Бүөтүр ЗАХАРОВ, үлэ, спорт ветерана,
Мэҥэ Хаҥалас улууһун бочуоттаах олохтооҕо, Майа с.
