Сунтаар улууһун баһылыгын Кубогар эстафетаҕа улуус оскуолалара 19 хамаанданы туруораннар сытыы киирсиини көрдөрдүлэр. Биир хамаанда бастакы кылаастан саҕалаан уон биирис кылааска диэри биирдии сүүрүктээх, ол аата 11 кыттааччылаах – алта уол уонна биэс кыыс.
Күрэхтэһээччилэр үс аҥы арахсан сүүрдүлэр. Маҥнайгы бөлөххө Хадан, Күндэйэ, Кириэстээх, Сунтаар 1, 2, 3 №-дээх орто оскуолаларын хамаандалара киирдилэр. Бастакынан биэтэги Сунтаар 1 №-дээх оскуолатын сүүрүктэрэ буллулар. Иккис бөлөххө Түбэй, Аллыҥа, Сиэйэ, Тойбохой, Күүкэй, Кутана орто оскуолалара илин-кэлин түһүстүлэр. Тойбохой орто оскуолатын хамаандата бастаата. Тиһэх сүүрүүгэ Илимниир, Элгээйи, Устье, Бордоҥ орто оскуолалара, Сунтаар, Бүлүүчээн лиссиэйдэрэ күрэхтэстилэр. Манна бүлүүчээннэр иннилэрин кимиэхэ да биэрбэтилэр.
Хас биирдии хамаанда бириэмэтэ көрүллэн уопсай түмүккэ үс бириистээх миэстэҕэ бөлөхтөрүгэр бастаабыттар тигистилэр. Ол курдук, ырааҕынан эрэллээхтик ситэн, В.Г. Акимов аатынан Бүлүүчээн лиссиэй-интэринээт хамаандата I миэстэ буолла. Көрдөрүүтэ – 10 мүн. 14,41 сөк. II миэстэҕэ Г.Е. Бессонов аатынан Тойбохой орто оскуолатын хамаандата таҕыста. Көрдөрүүтэ – 10 мүн. 22,86 сөк. Оттон А.П. Павлов аатынан Сунтаар 1 №-дээх орто оскуолатын хамаандата III миэстэни ылла. Кини көрдөрүүтэ – 10 мүн. 26,92 сөк.
Онон Сунтаар улууһун баһылыга А.В. Григорьев илиититтэн Кубок Бүлүүчээҥҥэ барда. Маннык эстафетаҕа күрэхтэһиини аны сылын аайы ыытыыллыаҕа.
Газета «Сунтаар сонуннара»
