Оҕо үөрэтиититтэн, иитиллиититтэн, ханна-тугунан дьарыктанарыттан улааттаҕына хайдах-туох киһи буолан тахсара улахан тутулуктаах. Маныаха, оҕо спортоскуолалара, тренердэр быһаарар оруоллаахтар. Тренердэр үлэлэрэ ситиһиилэринэн сыаналаналлар. Уус-Алдан Бороҕонугар спорт уонна культура быстыспат ыкса ситимнээхтэр. Туох-баар спортивнай дьаһаллар ырыанан-үҥкүүнэн доҕуһуолланаллар. Егор Федорович Габышев аатынан Бороҕоннооҕу оҕо спортоскуолатын аэробикаҕа тренер-преподавателэ Туйаара Ларионова салайар *Энергия* оҕо үҥкүү ансаамбылын 2000 с. салайарын былаһын тухары, оҕолор өрөспүүбүлүкэҕэ, Россияҕа, норуоттар икки ардыларынааҕы конкурстарга кэккэ ситиһиилэрдээхтэр.
Туйаара Лаврентьевна аан бастаан Мындааба спорт хайысхалаах оскуолатыгар *Энергия* үҥкүү ансаамбылын тэрийбитэ уонна ритмика учууталынан үлэтин айымньылаахтык саҕалаабыта. Эрчимнээх эдэр специалист культурология үөрэхтээх, ону таһынан, Чурапчы институтугар аэробикаҕа үөрэммитэ. Оҕо эрдэҕиттэн оҕо музыкальнай оскуолатыгар, *Кэнчээри* оҕо народнай ансаамбылыгар дьарыктаммыт буолан сценаттан түспэт, общественнай дьаһалларга көтүппэккэ кыттар. Спортивнай оскуолаҕа үлэлиир буолан, үҥкүүтүн хамсаныылара уратылар. Тэтимнээхтэр, акробатическайдыҥы хайысхалаахтар. Сонуннар. Ол да иһин, биһирэбил ылан, *Мүрү* уонна өрөспүүбүлүкэ конкурстарыгар элбэх төгүллээх дипломаннарынан, лауреаттарынан буолуталаатылар. Ансамбыл кэккэтэ сыллата хаҥыыр. Билигин оскуола уонна гимназия 65 оҕолоро үс бөлөҕүнэн дьарыктаналлар. Аэробикаҕа ылсыбыттара сэттис сылыгар барда. Өрөспүүбүлүкэ конкурстарыгар миэстэлэһэллэр.
Москваҕа тиийэн Норуоттар икки ардыларынааҕы *Президентская Звезда* конкурсугар тэтимнээх саха оһуохайа улаханнык биһирэнэн, Гран-при үрдүк аатын ылан кэлбиттэрэ. Россия, Польша, Финляндия, Корея куораттарынан сылдьыталаабыттара. Үп-харчы үөһэттэн кэлэрин кэтэһэн олрботтор. Таҥастарын-саптарын, сырыыларын-айаннарын бүүс-бүтүннүүтүн төрөппүттэр уйуналлар. Киэҥ сиринэн-дойдунан сырыылаах оҕолор билиилэрэ-көрүүлэрэ ол сиэринэн. Тэҥ саастыылаахтарын кытта күн-бүгүнүгэр диэри билсэ тураллар. Ыкса доҕордуу сибээстээхтэр. Үөрэх-билии аартыгын дабайарга дьулуһаллар, ол иһигэр, английскай тылы үөрэтэр инстэриэстэрэ улахан.
Улахан кылаас оҕолоро улаатаннар, ыал-уруу тэринэннэр, номнуо, төһө да бэйэлэрэ төрөппүт буоллаллар, сылдьа үөрэммит, уһуйуллубут куруһуоктарыгар Туйаара Лаврентьевнаҕа кэлэ тураллар, салгыы дьарыктаналлар. Инньэ гынан, оҕолор уонна улахан дьон бөлөхтөрө дьарыктаналлар. Аэробика – спорт ыарахан көрүҥэ. Киһиттэн бэйэни кыаныы, имигэс буолуу, музыканы сатаан истии, үрдүк техника курдук хаачыстыбалар ирдэнэллэр. Ол да иһин, уустук хамсаныылары оҥоруохтарын сөптөөх оҕолор үҥкүүттэн үрдээннэр аэробикаҕа сүүмэрдэнэллэр. Баҕалаахтар элбэхтэр. Бороҕоннооҕу оҕо спорт оскуолатын спортивнай саалатыгар түмсэн, расписание быһыытынан дьарыктаналлар.
Өскөтүн, юу дьоһун көрүҥҥэ федерация баара эбитэ буоллар, стимул да баар буолуо этэ, көрдөрүүлэр, ситиһиилэр өссө элбэх буолуо эбиттэр. Холобур, чугастыы ылан көрдөххө, ыаллыы улуустарга спортивнай үҥкүүгэ уонна аэробикаҕа федерациялардаахтар. Спортоскуола дьаһалтата, төрөппүттэр өйөбүллэринэн үлэ-хамнас барар. Сайыҥҥы ыйдарга *Энергиялар* буор-босхо аһаан, лааҕырга үрдүттэн дьарыктаннылар. Инньэ гынан, спортивнай формаларын ыһыктыбакка, техникаларын өссө чочуйан, эттэрин-сииннэрин сайыннаран, көстүүлүүн тупсан-киэркэйэн, саҥа үөрэх дьылыгар оскуолаларын боруогун атыллаатылар. Оҕолор билиилэрэ-көрүүлэрэ да кэҥээтэ, быдан сэргэхсийдилэр, сынньаннылар, күүс-уох ылыннылар. Боксер оҕолор, мас тардыһааччылар эмиэ лааҕырга эрчилиннилэр, сайыннарын туһалаахтык атаардылар.
Билигин сыал-сорук – эһиил Аммаҕа буолар Саха сирин норуоттарын VII сайыҥҥы спортивнай оонньууларыгар бэлэмнэнии, салгыы конкурстарга көтүппэккэ кыттыы!
Баһылай Посельскай.
