Бастакы көлүөнэ күүстээх бөҕөһө, көҥүл тустууга ССРС, Россия чөмпүйүөнэ, ССРС Сэбилэниилээх Күүстэрин уонна Варшавскай дуогабар Доҕордуу армияларын чөмпүйүөнэ, Болгарияҕа норуоттар икки ард.турнир кыайыылааҕа, саха тапталлаах бөҕөһө, ССРС сүүмэрдэммит хамаандатыгар үс сыл тустубут Петр Егорович Попов үбүлүөйдээх 80 сааһынан Бырабыыталыстыба 2 № Дьиэтигэр спортивнай общественность эҕэрдэлээһинэ үөрүүлээх быһыыга-майгыга бэлиэтэннэ.
Саха Өрөспүүбүлүкэтин спорка миниистирэ Леонид Спиридонов, Ил Түмэн физическэй культураҕа уонна спорка Сис кэмитиэтин бэрэссэдээтэлэ Михаил Гуляев, Олимпийскай оонньуулар үрүҥ көмүс призера Александр Иванов, Сунтаар улууһун баһылыга Анатолий Григорьев,
Дьокуускай куорат физическэй культураҕа уонна спорка Управлениетын начальнига Эдуард Ефимов, көҥүл тустууга аан дойду ветераннарын чөмпүйүөнэ, тустууга аналлаах 3 № оҕо спортоскуолатын бочуоттаах дириэктэрэ Федот Соловьев итии-истиҥ эҕэрдэлэрин тиэртилэр. Саха Өрөспүүбүлүкэтин народнай артыыһа Александр Емельянов күүстээх модун куолаһынан ыллаан, виртуоз-скрипачка Елена Березовская дьикти оонньуутунан үөрүүлээх түгэни киэргэттилэр.
Спорт Министиэристибэтин иһинэн үлэлиир спорт Музейын дириэктэрэ, көҥүл тустууга ССРС спордун маастара Михаил Друзьянов Петр Егорович Попов 1990-1993 сылларга спорка миниистирдииригэр отдел начальнигын быһыытынан бииргэ үлэлээбиттэр. Бастатан туран, өрөспүүбүлүкэ спордун бастакы миниистирэ диэтэ. Бу иннинэ Госкомспорт бэрэссэдээтэллэрэ диэн ааттаналларын санатта. Ол бииргэ үлэлээбит кэмнэригэр туох үлэлэр ыытыллыбыттарын, миниистир Петр Попов туох-ханнык сорудаҕы биэрэрин барытын блокнотугар суруна сылдьыбытын кэпсээн сэргэхситтэ.
Бастатан туран, өрөспүүбүлүкэ спордун бастакы миниистирэ буоларын эттэ. Бу иннинэ Госкомспорт бэрэссэдээтэллэрэ диэн ааттаналлара. Ол бииргэ үлэлээбит кэмнэригэр туох дьаһаллар ыытыллыбыттарын, миниистир Петр Попов туох-ханнык сорудаҕы биэрэрин барытын блокнотугар суруна сылдьыбыт. Онно туран, 1990 с. миниистиринэн саҥа анан кэлээт, эппит: “Биһиги федерациялары кытта күүскэ үлэлиэхтээхпит” диэн. Инньэ гынан, спорт федерациялара хаһан мунньахтыылларын, отчуоттуулларын Михаил Друзьянов ол блокнотугар барытын бэлиэтэнэ сылдьыбыт. Сүрдээх элбэх мероприятиелар буолаллар эбит. Ону, Петр Егорович үчүгэйдик үлэлииллэрин билэн, “спорт сайдыытын федерациялар эппиэттиэхтэрэ, Министиэристибэ буолбатах” диэбит. Сөпкө эппит эбит диэн Михаил Друзьянов ааҕар. Федерациялар сүрдээҕин хамсанар, үлэлиир буолбуттар.
Петр Егорович “лихие 90-е годы” - саамай ыарахан кэмҥэ өрөспүүбүлүкэ спордун салайбыт. Үп-ас суох кэмигэр. Оройуоннарга грамота, мэтээл да суох кэмигэр. Биир күн Михаил Друзьяновы ыҥыран ылан сорудахтаабыт: “Михаил Егорович, урут кыайбыт спортсменнарга жетоннары биэрэр этилэр, онон, жетонна сакаастаа уонна Москваҕа баран булан кэл” диэн. Инньэ гынан, Москваҕа командировкаланан “Первенство района. Якутская АССР” диэн суруктаах, чороонноох, кубоктаах, үөһэ өттүгэр I, II, III диэн суруктардаах 60 тыһ. жетон аҕалан 34 оройуоннарга барыларыгар түҥэппиттэр. Оннук кыһыл, халлаан күөҕэ, от күөҕэ өҥнөрдөөх жетоннары оройуоннарыгар бастаабыт уонна миэстэлэспит спортсменнар наҕараадаламмыттара. Ол чуолкай, тоҕо диэтэххэ, мин тус-бэйэм хас да оннук жетоннардаахпын. Петр Егорович тыһыынчанан спортсменнар өйдүү-саныы сылдьалларыгар бэртээхэй наҕараадалары оҥотторбут эбит. Сахабыт сирин спордун историятын биир кэрчигэ чуолкайданнаҕа ити!
Петр Егорович сорудаҕынан миниистир солбуйааччыта Виктор Петрович Ноговицынныын Михаил Друзьянов Саха сиригэр “Спорт Сокуонун” оҥороннор, Верховнай Сэбиэккэ киллэрэннэр бигэргэттэрбиттэр. Оччолорго, Петр Егорович бииргэ төрөөбүт убайа Климент Егорович Иванов Верховнай Сэбиэт бэрэссэдээтэлэ этэ. Биллэрин курдук, Сокуон баар буоллаҕына үп-харчы кэлиитэ-барыыта быһаарыллар. Онон, физкультураҕа уонна спорка харчы баар буолуута ситиһиллибит.
Саха сирин спордун историятыгар аан-бастаан, физкультура уонна спорт үлэһиттэрин сийиэстэрин тэрийэн ыыппыттарын, түөртүү сыл буола-буола сийиэстэр буолан иһиэхтээхтэрин туһунан Михаил Друзьянов салгыы кэпсиир. Эмиэ, аан-бастакынан, норуоттар икки ардыларынааҕы национальнай конференцияны ыыппыттар. Ол конференцияҕа мас тардыһыыта, хапсаҕай курдук спорт национальнай көрүҥнэрэ аан дойдуга тахсыахтаахтарын туһунан кэпсэтиилэр буолбуттар. Биирдэ Михаил Друзьянов кабинетыгар мас тардыһыы маастардара Виктор Николаев-Хотой Бииктэр уонна Петр Каратаев тэбилик мастарын сүкпүтүнэн киирэн мас тардыһыытын саҥа быраабылатын кэпсээбиттэр, онтон, Министиэристибэ коллегиятыгар дьүүллэспиттэр. Ити курдук, мас тардыһыыга уҥа-хаҥас сүүрүү былаабылата Петр Егорович Попов баарына аан-бастаан олоххо киирбит.
“Баал чемпионов” ыытаннар өрөспүүбүлүкэ бастыҥ спортсменнарын ыҥыраннар, эмиэ аан-бастаан күргүөмнээхтик чиэстээһини Нуучча театрыгар ыытыыны саҕалаабыттар. Онуоха анал сыаллаах-соруктаах уопут ыла Эстонияҕа Таллин куоракка командировкаланан кэлбит. Ол кэлэн, бастыҥнары чиэстээһин шоу курдук бырааһынньыктыы быһыыга-майгыга өрө күүрүүлээхтик барыыта ситиһиллибит. Сценарийын суруналыыс Вячеслав Степанов суруйан, бэйэтэ салайан үрдүк таһымҥа ыыппыт. Ол үгэс күн бүгүнүгэр диэри тутуһуллар.
Миниистир хаста да Михаил Друзьяновы омук дойдуларыгар командировкалаабыт. Петр Егоровичтыын Чехословакияҕа бииргэ сылдьыбыттар. Спортивнай инбэнтээр ыларга дуогабар оҥорсубуттар. Көрсүһүү, сырытыннарыы бөҕө, бултаппыттар эҥин. Петр Егорович онно үрдүк культуралааҕын, сэмэйин көрдөрбүт. Аны туран, элбэх конкурсу ааһан, 1990 с. Америка Сиэтл куоратыгар “Игры Доброй воли” баран көрөн кэлбит. Ыйтан ордук үлэлээн Вашингтон уонна Auburn куораттар бочуоттаах олохтоохторун аатын ылаттаабыт.
Дьэ, ити курдук, үбүлүөйдээх дьаһалга бэрт интэриэһинэй чахчылар иһилиннилэр.
Өрөспүүбүлүкэ спортивнай общественноһа саха аатырбыт, тапталлаах бөҕөһүн Петр Егорович Попову үбүлүөйдээх 80 сааһынан эҕэрдэлээн, билигин бочуоттаах сынньалаҥҥа олорор бөҕөскө уонна кини дьиэ-кэргэнигэр үөрүүлэрин үрдэттэ.
Баһылай Посельскай
