Ийэ дойду көҥүлүн,
Эйэлээх олох үтүөтүн
Көмүскээбит аармыйа
Күнэ үүннэ бу бүгүн.
Биһиги эмиэ улаатан
Күүстээх-уохтаах буолуохпут,
Эһэбит, аҕабыт курдук
Сулууспалыы барыахпыт!
Уол оҕону кыра сааһыттан эр киһи курдук тулуурдаах, күүстээх, сымса, сылбырҕа, булугас өйдөөх буоларыгар хас бирдии иитээччи, төрөппүт үлэлэһэр буолуохтаах. Сэттэ түһүмэхтээх киирсиигэ кырачаан боотурдарбыт илин-кэлин түсүһэн сытыытык киирсэннэр, көрөөччүлэри сэргэхситтилэр. Түһүмэхтэри көрдөххө кырдьык да бэлэмэ суох оҕо кыттыа суоҕун тэҥэ.
Бэйэни билиһиннэрии, кыайыыга кынаттыыр хоһооннору ааҕыы, өбүгэ оонньуута «ойбонтон уулааһын», «мин саха оҕотобун» өркөн өй күрэҕэ, күүһү холонон гантели өрө көтөҕүү, уһуну ыстаныы, байыаннай таҥастаах хаамыы – итиннэ барытыгар тулуур, дьулуур, эр санаа көмөтүнэн кыттыы буолар.
Ити түһүмэхтэри сэттэ кырачаан уолаттарбыт биир киһи курдук илин-кэлин түсүһэн кыттыбыттарын бэлиэтиир тоҕоостоох. Түмүккэ барыларыттан чорбойон «Үрүҥ Уолан-2020» ааты ылары ситистэ биэс саастаах Эрсан Иванов.
«Дыырай Бөҕө» ааты ылла Вова Винокуров, «Быһый атах» - Афанасий Владимиров, «Хомоҕой тыллаах» - Слава Захаров, «Чуор Боотур» - Эрчимэн Иванов, «Эр Хоһуун» - Харысхан Федоров, «Иэҕэй Бөҕө» - Эрэл Васильев.
Кырачаан уоланнарбытыгар төрөөбүт дойдуларын үтүөтүгэр чэчирээн, үүнэн-улаатан иһэллэригэр, өссө да үгүс ситиһиилэри баҕарабыт.
Людмила ТИМОФЕЕВА, «Айылгы» уһуйаан иитээччитэ,
Күөрэлээх, Горнай улууһа
