16 диэри саастаах уолаттарга Россия “ТОП-24” күүстээх оонньооччуларын күрэхтэһиитигэр Санкт-Петербургтан, Нижнэй Новгородтан, Оренбургтан, Татарстантан, Екатеринбургтан уо.д.а. куораттартан түмүстүлэр. Күрэхтэһии Сахабыт сирин спордугар үөрүүнү аҕалла.
Москва 1 № олимпийскай солбук Училищетыгар иккис сылын үөрэнэр Чурапчы Хатылытыттан төрүттээх, 6-с рейтиннээх, 15 саастаах Изот Кривошапкин бэккэ кытынна. Бэйэтин бөлөҕөр тахсыылаахтык оонньоото. 14 утарсааччыларыттан 13-н хотуталаата. Хардарыта хотуһууларга Павел Киселев Игорь Гордиҥҥа, Изот Кривошапкин Павел Киселевка кыайтарар уонна Игорь Гордины кыайар. Гордин иккиэннэригэр кыайтарар. Онон, Кривошапкин Самараттан Киселев Павеллыын очколара тэҥнэһэн баран, хаачыстыбанан сабырыйтаран, Изот Кривошапкин үрүҥ көмүс мэтээлгэ тигистэ. Үһүс миэстэҕэ Екатерибургтан Игорь Гордин таҕыста. Саха сириттэн маннык көрдөрүүнү ким да ситиһэ илигин санатар тоҕоостоох.
Изоту кыра эрдэҕиттэн элбэх оҕолоох ыал аҕалара Геннадий Изотович Кривошапкин эрчийбитэ. Билигин да эрчийэр. Кэккэ ситиһиилэрдээхтэр. Өрөспүүбүлүкэ оҕолорун кыайаллар, миэстэлэһэллэр. Бастыҥнара Аркадий Никифорович Иванов сүрүн тренердээх Саха сирин сүүмэрдэммит хамаандатыгар киллэриллибитэ. Дальнай Восток уолаттарыгар чөмпүйүөннээбитэ, Германияҕа норуоттар икки ардыларынааҕы оҕолор турнирдарын, Бүтүн Россиятааҕы күрэхтэһиилэри кыайбыта.
Тренер Анатолий Ефремов көҕүлээһининэн, Саха Өрөспүүбүлүкэтин спорка Мнистиэристибэтин (Г.Р. Балакшин) уонна остуол тенниһин Федерацията (А.И. Поисеева) Кытайга үөрэттэрбиттэрэ. Харахха быраҕыллар гына эбиллибитэ. “Туймаада-нефть” (С.М. Чепалов) спонсордаабыта.
Соҕуруу күрэхтэһэ сырыттаҕына Москва тренера Лев Николаевич Ступаченко таба көрөн бэйэтигэр Москваҕа ыҥыран Изот Кривошапкины иккис сылын дьарыктыы сылдьар. Былырыын Россия “ТОП-24” күрэхтэһиитин кыайбыта.
Геннадий Изотович эрчийэр оҕолоро Дальнай Восток зонатыгар күүстээх оонньооччуларынан биллэллэр. Билигин улахан уола, кыра кыыһа өрөспүүбүбүлүкэҕэ күүстээх оонньооччуларынан биллэллэр.
Изот Кривошапкин аны сайын "Азия оҕолорун" оонньууларыгар Сахатын Сирин аатын көмүскүөҕэ.
Изот, кытаат!
Баһылай Посельскай
