Ол - тренертэн тутулуктаах. Кэбээйи улууһун кэрэ айылҕалаах, Улуу Өлүөнэ өрүһү кытта Бүлүү Эбэ Хотун көрсүһэр ытык сиригэр, Унаардаах Эбэ үрдүгэр, үтүөкэн үлэһит дьонноох, сайдар саргылаах Сайылык нэһилиэгэр дьоллоох дьоро күн буолла.
"Сахам сирэ 21 үйэҕэ" программа чэрчитинэн, Кэбээйи улууһа көҕүлээһининэн, саха төрүт көрүҥүн хапсаҕайы сайыннарар сыаллаах-соруктаах, республикаҕа аан маҥнайгынан, ахсынньы 2 күнүгэр Кэбээйи улууһун Мукучутугар "Хапсаҕай түһүлгэтэ" спортивнай саала аана үөрүүлээх быһыыга-майгыга нэлэччи аһылынна. Эркиҥҥэ Мукучу хапсаҕайдьыттара хапсыһа сылдьар бөдөҥ хаартыскалардаах, хапсаҕай хоһоонунан хоһуллубут тыллардаах иитэр-үөрэтэр хапсаҕай оскуолатын дириэктэрин солбуйааччы Саргылаана Николаевна Иванова айбыт суруктара-бичиктэрэ, 26х16 иэннээх сиэдэрэй хапсаҕай саалата оҕо-аймаҕы, ыччат-дьону, эр-бэртэрин угуйа сандаарда! Ыраахтан-чугастан ыҥырыллан кэлбит ытыктабыллаах ыалдьыттар, хапсаҕайга күрэхтэһии кыттыылаахтара, олохтоохтор, кэрэ-бэлиэ түгэҥҥэ түмүстүлэр.
Саха Республикатын спорка миниистирэ Михаил Дмитриевич Гуляев, Кэбээйи улууһун баһылыга Игнатий Николаевич Спиридонов, Мукучу үүнэн иһэр кэскиллээх хапсаҕайдьыт оҕото, республика хас да төгүллээх чемпиона Айсен Поскачин, Саха Республикатын хапсаҕайга федерациятын президенэ Николай Иннокентьевич Румянцев, Мукучу нэһилиэгин баһылыга Анна Ивановна Сысоева, тутуу биригээдэтин биригэдьиирэ Максим Владимирович Семенов, саха төрүт көрүҥнэригэр Мукучутааҕы оҕо спорт оскуолатын дириэктэрэ Михаил Васильевич Иванов "Хапсаҕай түһүлгэтин" арыйар лиэнтэни дохсун ытыс тыаһын ортотугар быстылар.
Уруй-айхал үлүскэнэ, Бүлүү бөлөх улуустар күүстээх хапсаҕайдьыта Прокопий Семенович Обутов алгыс киэнэ маанытын-талыытын оҥордо, ырыа-тойук, ол иһигэр, бу кэрэ-бэлиэ түгэҥҥэ анаан айыллыбыт "Аатырар хапсаҕай түһүлгэтэ" ырыа Аграфена Павлова тылларыгар, Роман Степанов матыыбыгар ылланна, Саха эстрадатын сулустара Байбал Сэмэнэп, Лэгэнтэй толоруулара, үҥкүү-битии сиэдэрэйэ көҕүллэриттэн тутулуннулар, эҕэрдэлэр эгэлгэлэрэ этилиннилэр. "Мукучу хапсаҕайын эдэр бөҕөстөрүн чаҕылхай кыайыылара" видео-киинэ кэтит экраҥҥа көрдөрүүгэ туруорулунна.
Кэбээйини, Мукучуну эрэ буолбакка, тапталлаах Сахаларын сирин, бүтүн Россияҕа, ону ааһан, аан дойдуга суон сураҕырдыбыт, Бразилия Сан-Паулу куоратыгар хапсаҕайга уонна мас-тардыһыытыгар аан дойду икки төгүллээх чемпиона, 2013 с. "Манчаары оонньууларын" үрүҥ көмүс призера Геннадий Степанов, 2015 с. Румыния Мангалия куоратыгар Аан дойду кумахха тустууга боруонса призера Ньургустан Николаев уо.д.а. Бүтүн Россиятааҕы хапсаҕай түһүлгэлэрин кыайыылаахтара, призердара, бу күннээххэ албан аатырда сылдьар, түллэҥниир түөстэригэр кылыгырыы тыаһыыр мэтээллэри иилиммит хапсаҕайдьыт уоланнар, үөрүүлээх түгэн ыытыллыбыт үс чааһын былаһын тухары сүһүөхтэригэр туран кэккэлээн турбуттара, көрүөххэ эриэккэс көстүү буолла!
Ил Түмэн депутата Юрий Петрович Михайлов, Чурапчы институтун ректора Иннокентий Иннокентьевич Готовцев, үөрэх министиэристибэтин иһинэн оҕо спордун салайааччыта Михаил Семенович Томскай, "Сахам сирэ 21 үйэҕэ" Үтүө Дьыала хамсааһын салайааччыта Иван Софронович Емельянов, Саха Республикатын хапсаҕайга федерациятын толорооччу дириэктэрэ Алексей Егорович Мостахов, Мукучулар биир дойдулаахтара мас тардыһыытын бастакы маастара Петр Дмитриевич Каратаев, Ойуунускай аатынан Саха театрын дириэктэрэ Анатолий Павлович Николаев уонна да атын республикабыт биллиилээх дьоно итии-истиҥ эҕэрдэлэрин тиэртилэр, саҥа тутуллан үлэҕэ киллэриллибит спортивнай саалаҕа мөлүйүөнүнэн үп-харчы киирдэ.
"Хапсаҕай түһүлгэтигэр" салгыы өссө таһаарыылаахтык үлэлииригэр үгүс-бэлэх туттарылынна, наҕараадалар бэйэлэрин дьиҥнээх геройдарын буллулар. Саха Республикатын Ил Дархана Е.А. Борисов бу сэтинньи 30 күнүгэр таһаарбыт "буруолуу" сылдьар Ыйааҕынан Мукучуттан саха хапсаҕайын аар-саарга таһаарар айылгылаах тренер Михаил Васильевич Ивановка Саха Республикатын Үтүөлээх тренерин үрдүк аата иҥэрилиннэ. Хапсаҕай добун түһүлгэлэрин кыайыылаахтарыгар Петр Николаевка уонна Петр Ивановка Саха Республикатын хапсаҕайга спорт маастардарын нуорматын толорбуттарын туоһулуур дастабырыанньалары уонна түөскэ кэтиллэр бэлиэлэри бар-дьоннорун ортотугар ыллылар.
Нөҥүө иккис-үһүс күннэргэ Кэбээйи улууһа туруорбут бириистэригэр хатыйсыылаах, халбархай бырахсыылардаах республика хапсаҕайга түһүлгэтигэр Мэҥэ-Хаҥаластан, Чурапчыттан, Горнайтан, Бүлүүттэн, Кэбээйиттэн уонна Дьокуускай куораттан оҕолор тоҕус ыйааһыҥҥа, улахан дьон үс ыйааһыҥҥа күөн көрүстүлэр.
Дьоро түгэн оһуохайынан түмүктэннэ.
Мукучутааҕы "Хапсаҕай түһүлгэтэ" өтөрүнэн умнуллубат үтүө өйдөбүлү хаалларда.
Баһылай Посельскай
