2308

Дмитрий Эверстовка аналлаах республика атах оонньуутугар күрэхтэһии

Бу ааспыт өрөбүлгэ Чурапчы Хайахсытыгар Дмитрий Дмитриевич Эверстовка аналлаах республика атах оонньуутугар күрэхтэһии, ахтыы киэһэтэ үрдүк тэрээһиннээхтик ыытылыннылар. Бу күннээххэ күннээн-күөнэхтээн ойо сылдьар кылыыһыттар уонна ветераннар саастарынан биэс бөлөхтөрө сэттэ туоска илин-кэлин түстүлэр.

2309

Киирээти кытта оскуола фойетыгар, өрүүтүн буоларын курдук, Дмитрий Эверстов быыстапката тардыллыбыт. Аныгылыы сиэринэн, уһун көрүдүөргэ эрэһиинэ тэлгэммит. Онон, күрэхтэһээччилэр уруккулуу кеданан буолбакка, шиповкаларынан ойдулар. Эр дьоҥҥо, Майа спорт оскуолатыгар тренердиир Иван Пестряков кылыыга 29 м 36 см, ыстаҥаҕа 28 м 51 см түһүтэлээн бастаата. Чурапчы институтун студеннара Владислав Попов (Чурапчы) 27 м 83 см, Петр Бабиченко (Орто-Халыма) 27 м 56 см; ыстаҥаҕа Мичил Яковлев (Чурапчы) 26 м 65 см, Виктор Тихонов (Мэҥэ) 26 м 26 см) түһүтэлээннэр иккис-үһүс миэстэлэри ылаттаатылар. Армияҕа сулууспалаан икки хонуктааҕыта кэлбит Чурапчы Кытаанаҕыттан Мичил Яковлев куобахха 24 м 34 см түһэн бастаата. Чурапчы институтун студеннара Александр Уаров (Сунтаар) 24 м 00 см, Күндүл Карбаканов (Бүлүү) 23 м 59 см көрдөрүүлэрдээх иккис-үһүс миэстэлэннилэр.

2310

Сүһүөхтэрин үрдүгэр ойо-тэбэ сылдьар 35 - 55-тэн үөһэ саастаах ветераннар биэс бөлөҕүнэн куоталаспыттарыгар, Александр Карманов (Уус-Алдан), Владимир Софронов (Чурапчы, Хадаар), Дмитрий Макаров (Чурапчы, Кытаанах), Иван Посельскай (Чурапчы, Хоптоҕо), Владимир Алексеев (Дьокуускай), Гаврил Шелковников (Уус-Алдан), Андрей Федоров (Уус-Алдан) бастакы миэстэлэри ылаттаатылар. Спорт ветеран-маастардара Амматтан кус быһый Иннокентий Онуфриев, Дьокуускайтан Россия үөрэҕириитин туйгуна Михаил Петров, бэйэтин кэмигэр 43 м кирбиини ылбыт Егор Колесов, тыа хаһаайыстыбатын министиэристибэтиттэн саха ынаҕын боруодатын тэнитэр-ууһатар отдел салайааччыта Андрей Турантаев уо.д.а. миэстэҕэ тиксэннэр билигин да "буорахтара кураанаҕын" көрдөрдүлэр.

Кыайыылаахтарга уонна бириистээх миэстэлэргэ тиксибиттэр өйдөбүнньүк мэтээллэринэн, дипломнарынан мото-эрбии, телевизор, мультиварка, спальнай мешок уо.д.а. курдук, 17 спонсордар туруорбут сыаналаах бириистэринэн наҕараадаланан, үөрэн-көтөн, сүргэлэрэ көтөҕүллэн, астыммыттарын биллэрдилэр.

Дмитрий Эверстов турнира республика календарнай былааныгар киллэриллэн, Баһылай Манчаары аатынан спорт национальнай көрүҥнэргэ Киин мантан ыла көрөр-истэр буолбута, саныахха үчүгэй. Хоптоҕо нэһилиэгин баһылыга, көҥүл тустууга спорт маастара Дмитрий Дмитриевич Дьячковскай икки сылынан Дмитрий Эверстов турнирын үрдүк тэрээһиннээхтик ыытар туһунан этиитэ ытыс тыаһынан доҕуһуолланна.

Ахтыы киэһэҕэ үгүс киһи кытынна. 

Эверстовтар түөрт оҕолоро билигин бары үлэһит дьон, сиэннэр улааталлар. Ыал ийэтэ-эбэтэ Мария Константиновна, бу аан бастаан ыытыллыбыт турниры көҕүлээбит-тэрийбит, Дмитрий Дмитриевич үөрэнээччитигэр Афанасий Петрович Дорофеевка, бары тэрийээччилэргэ, Дмитрий Дмитриевич үөлээннээхтэригэр, үөрэнээччилэригэр, атастарыгар-доҕотторугар махталын биллэрдэ.

Хоптоҕо, Хайахсыт нэһилиэктэрин баһылыктара Дмитрий Дмитриевич Дьячковскай, Василий Васильевич Прудецкай, оскуола дириэктэрэ Федор Игнатьевич Борисов, бииргэ алтыспыт үөлээннээхтэрэ "Учууталлар учууталлара" Николай Афанасьевич Оконешников, Саха Республикатын физическэй культураҕа уонна спорка үтүөлээх үлэһиттэрэ Афанасий Петрович Илларионов, Николай Николаевич Адамов, Павел Федорович Митин, атах оонньуутугар маастардары чочуйан таһаартыыр Чурапчы институтун тренерэ Иван Иванович Чиркоев, ССРС культуратын туйгуна Афанасий Дмитриевич Аммосов  уо.д.а. истиҥ-иһирэх ахтыылары оҥордулар. Уус-уран самодеятельнос кыттыылаахтара ахтыы киэһэни киэргэттилэр.

Дмитрий Дмитриевич Эверстов - Дмитрий Диринскэй Чурапчы чулуу спортсменнарын үйэтитиигэ, республика спордун историятыгар тиспит кылаата сүҥкэн. Чахчы, кэрэ, чаҕылхай киһи этэ. Үтүө киһи аата умнуллубат!

Баһылай Посельскай

 

Поделиться:

#Новости