IMG 3092

Көҥүл тустууга олимпийскай чөмпүйүөн Роман Михайлович Дмитриев биһиги кэккэбититтэн букатыннаахтык «барбыта» сэттэ сылыгар аналлаах дьаһаллар олунньу 11 күнүгэр Р.М. Дмитриев аатынан олимпийскай солбугу бэлэмниир училищеҕа ыытылыннылар

Өрөспүүбүлүкэ спордун салайааччылара, училище үлэһиттэрэ,  тустуук оҕолор, тренердэр, спорт ветераннара, тустууга сүгүрүйээччилэр, тапталлаах кэргэнэ Антонина Софроновна Дмитриева, чугас аймахтара, бииргэ үөрэммит доҕотторо, үөлээннээхтэрэ түмүстүлэр.

Ахтыы линейката

Саха омугу аан дойдуга дорҕоонноохтук ааттаппыт аатырбыт тустуук уҥуоҕар сибэкки дьөрбөтүн ууруу кэнниттэн, ахтыы линейката буолла. Роман Дмитриев «СССР» диэн суруктаах, киһи эрэ барыта көрөн билэр спортивнай форматын кэтэн, түспүт мэтириэтэ киэҥ саалаҕа тардыллыбыт сценаҕа бу баардыы мичээрдиир. Аан дойду уһулуччулаах бөҕөстөрүн кытта сытыы хапсыһыыларын түгэннэрин көрдөрөр видеокиинэ, эдэркээн тустуук уолаттар улуу бөҕөскө анаммыт литературнай уус-уран ааҕыылара болҕомтону тартылар.

IMG 3115

IMG 3117

Олимпийскай чөмпүйүөн аатын сүгэр училище иитиллээччилэрэ саха норуотун киэн туттар бөҕөһө Роман Дмитриев аатын-суолун түһэн биэрбэккэ, Россия, Европа, аан дойду түһүлгэлэригэр кыайыылаахтык, тахсыылаахтык тусталларын туһунан училище дириэктэрэ Алексей Алексеевич Филиппов бэйэтин киирии тылыгар санатта уонна биир мүнүүтэ саҥата суох туруунан бэлиэтииргэ ыҥырда. 

Ахтыы тыллары Саха Өрөспүүбүлүкэтин спорка миниистирин бастакы солбуйааччы Семен Сергеевич Чердонов, 1976 с. Монреаллааҕы Олимпийскай оонньуулар үрүҥ көмүс призера Александр Николаевич Иванов, 1976-1985 сыллардаахха Саха АССР спорка кэмитиэтин бэрэссэдээтэлэ Афанасий Егорович Алексеев, 1986 с. 1 Үтүө дьулуур оонньууларын чөмпүйүөнэ Василий Николаевич Гоголев, Р.М. Дмитриев аатын үйэтитии Общественнай сэбиэтин бэрэссэдээтэлэ Родион Иннокентьевич Федоров, Роман Михайлович Дмитриев кэргэнэ Антонина Софроновна Дмитриева ахтыылары оҥордулар.

Чуолаан, кулун тутар 4-5 күннэригэр Роман Михайлович Дмитриевка аналлаах норуоттар икки ардыларынааҕы турнирга элбэх дойду бөҕөстөрө кыттыыны ыларга кэлэллэрин; Роман Дмитриев тустууларын үөрэтиэххэ, билиэххэ наадатын; турнир саха ыччатын иитиигэ, буһарыыга-хатарыыга үктэлинэн буолуоҕар; Роман курдук үчүгэйдик үөрэнэргэ, муударай, толкуйдаах буоларга; ситиһии кэлэр тустууктартан бэйэлэриттэн тутулуктааҕын; олимпийскай чөмпүйүөн хайаан да баар буоларыгар; тэрийээччилэргэ махтал тыллар, этиилэр туһаайылыннылар.

IMG 3132

Төгүрүк остуол тула кэпсэтии

Линейка кэнниттэн буолбут чэй иһиилээх, атах тэпсэ олорон төгүрүк остуол тула кэпсэтиини училище дириэктэрэ Алексей Алексеевич Филиппов салайда. Р.М. Дмитриев аатын үйэтитэр общественнай сэбиэт салайааччыта Родион Иннокентьевич Федоров, спорт музейын салайааччы Михаил Егорович Друзьянов, Монреаллааҕы Олимпиада үрүҥ көмүс призера Александр Николаевич Иванов, Үтүө дьулуур оонньууларын кыайыылааҕа Василий Николаевич Гоголев, Ис дьыала министиэристибэтин ветераннарын сэбиэтин бэрэссэдээтэлэ Анатолий Генеров, бииргэ үөрэммит доҕотторо Роман Степанов, Роман Шамаев, Москваттан Иннокентий Корякин, общественность бэрэстэбиитэллэрэ, чугас аймахтара, доҕотторо кытыннылар.

IMG 3101

IMG 3095

Кэпсэтии Роман Михайлович Дмитриев аатын үйэтитиигэ туһуланна. Олоххо киириэн сөптөөх, интэриэһинэй этиилэр бааллар. Роман Дмитриев төрөөбүт-үөскээбит Эдьигээнин улууһун, Бэстээҕин бөһүөлэгин кытта олимпийскай эрэл училище ыкса сибээһи олохтууллара сөптөөҕүн; норуоттар икки ардыларынааҕы турнирга тустуулар кэнниттэн, Дьокуускайга кэлбит омук тустууктарын улуустарынан сырытыннаран, матчевай көрсүһүүлэри тэрийэн ыытар тоҕоостооҕун; 2005 сыл эргин, ССРС спордун үтүөлээх маастардара Роман Дмитриев уонна Василий Гоголев икки күнү быһа оҥорон көрдөртөөбүт техникаларын, албастарын-ньымаларын уһуллубут киинэни булар наадатын; Дьокуускай куорат мээрэ баһылыга Айсен Николаев дьаһала тахсан, пааматынньыгы уонна сквери оҥоруу үлэтигэр үс скульптордар ылсыбыттарын; Р.М. Дмитриевкэ аналлаах Фондатын регистрациялаан, промышленнай бөдөҥ хампаанньалары кытта үлэлэһэн, үүбүн-аһын булуунан дьарыктанары түргэтэргэ; Р.М. Дмитриев аатынан Государственнай бириэмийэни бастыҥ спортсменнарга, тренердэргэ, атын да үлэһиттэргэ олохтуурга; Роман Михайлович Ил Түмэҥҥэ депутаттыы сылдьан сөргүппүт саха итэҕэлин тенгрианствоны духуобунай сокуоҥҥа тиһэн, сахалар итэҕэллэрин быһыытынан ылыннарарга; улуу бөҕөскө ананан саҕаламмыт, олоҕун бүтүннүүтүн арыйан көрдөрөр уус-уран киинэни оҥоруу хаамыытын өйүүргэ; үс олимпиецтэр тустарынан кинигэ суруллан бүтэн эрэрэ, уо.д.а. үтүө дьыалалар оҥоһуллаллар, туһалаах этиилэр киирдилэр.

IMG 3110

Роман Михайлович Дмитриев тапталлаах кэргэнэ Антонина Софроновна Дмитриева ыытыллыбыт тэрээһиннэринэн астыммытын, сүргэтэ улаханнык көтөҕүллүбүтүн биллэрдэ, көхтөөхтүк кыттыбыт дьоҥҥо махтанна.

Үйэтитиигэ бэртээхэй дьаһал буолан ааста.

Саха норуотун аар-саарга аатырдыбыт улуу бөҕөс, саха омук дьиҥнээх геройа Роман Дмитриев аата-суола саха тыллаах баарын  тухары аата үйэлэргэ ааттана туруоҕа!

Баһылай ПОСЕЛЬСКАЙ

Поделиться:

Добавить комментарий

#Новости